قادر نادر
چەند ساڵێکە گۆڕانی سیاسی، پانتایی سیاسی کوردستانی باشوری گرتۆتەوە، بەهۆکاری:
١. جەماوەر زیاتر هوشیار بۆتەوە
٢.نەگۆڕینی ئەقڵە کۆنە سیاسیەکان (ئەکتەرە نەگۆڕەکان)
٣. نەبونی عەدالەتی کۆمەڵایەتی (گەیشتۆتە لوتکە).
٤.پێشکەوتنی تەکنەلۆجیا
٥.هاتنە سەرخەتی چەندین ناوەندی جیهانی لە مافی مرۆڤ و رۆژنامەنوس و داکۆکی لە ئازادی رادەربرین.
٦.بونی هەزاران کوردی سیاسی و ئۆپۆزسیۆن لە هەندەرانەوە ململانێی سیاسی گەورە لەگەڵ دەسەڵات دەکات، کاریگەری خۆشی لەناو نیشتمان هەیە.
سەرجەم ئەمانە گۆڕانکاری سەرەتاییه، بەڵام بەشێنەیی لەناو زۆرینەی حیزب و رێکخراوەکان لە چەند ساڵی رابردو گۆڕانی هێناوەتە ئاراوە، وەک:
١. یەکێتی باڵێکی هەرە بەهێزی کادیر و سەرکردایەتی لێ جیابۆوە و چوه ناو گۆڕانه‌وه، چاوەڕوانی زیاتریشی لێ دەکرێت.
٢.پارتی سەرەتای ئەو جیابونەوە و هەژانە سیاسیەی دەستی پێکردوە زو یان درەنگ دەتەقێتەوە.
٣.شیوعی جیابونەوە و هەژانێکی گەورەی تری بەڕیوەیە (شەڕی گەنج و پیرەکان).
٤.زەحمەتکێشان جیابونەوەو لێکترازانی خۆی بینی.
٥.ئیسلامیەکان بە هەمو باڵه‌کان بەردەوام ناڕەزایەتی و ململانێی ئەندام و کادیرانیان لەگەڵ سەرکردایەتی هەی.
٦.رۆژنامە و میدیای ئەهلی ئەمڕۆ بۆتە هێزێک کە رۆڵی لە هاوکێشە سیاسیەکان هەیە. ٧.سەرەتای تێکشکانی جەبەروتی دەسەڵات لەناو خەلک دەستی پێ کردوە.
٨. شەقام دەستی بەناڕەزایەتی دەربڕین کردوە بەتایبەتی خوێندکاران.
سەرجەم ئەمانە پێمان دەڵێن ئاسۆیەکی رون چاوەڕێی ئەم گەلەیە، کە ئەگەر ئەم دەسەڵاتە بە ساختەکاری درێژە بە دەسەڵات بدات، ئەوا ناڕەزایەتی بەرفراوانی جەماوەری زو یان درەنگ دەست پێ دەکات، مەحاڵە تاسەر بتوانن تاڵانی ئابوری وڵات و دەستکەوتە نەتەوەییەکانیان له‌ده‌ست بدرێت و خەڵکیش دەستەوەستان یان سوکە رەخنەیان لێ بگرێت.
ئاخر ئەو گۆڕانانەی دەیبینن سەرەتایە، هەر سەرەتاکەشی کە دەستی پێکرد مەحاڵە بوەستێ، ئەوەی بەراوردی کوردستانی باشور لە ١٠ ساڵی رابردودا بکات، دەبینێت دەسەڵات لە ململانێی لەگەڵ ئازادیخوازان لەکوێوە گەیشتۆتە کوێ!؟.