(سبه‌ی):
زێده‌تر ژ 250 خویندكارێن كۆلیژێن جودا جودایێن سه‌ر ب زانكۆیا دهۆكێ ڤه ، پشته‌ڤانیا خۆ بۆ داخوازیێن خۆنیشانده‌رێن ده‌ڤه‌رێن جودا جودایێن پارێزگه‌ها سلێمانیێ ڕادگه‌هینن و ئیدانا راوه‌ستاندنا ده‌وامێ ل زانكۆ و په‌یمانگه‌هێن هه‌ولێرێ دكه‌ن .
د به‌یاننامه‌كێ دا خویندكارێن زانكۆیا دهۆكێ ، زێده‌باری پشته‌ڤانی كرنا خۆنیشاندانێن مامۆستا و خویندكارێن زانكۆیا سلێمانیێ ژی، دلگرانیا خۆ ژی دیار كریه ل سه‌ر ده‌ستێوه‌ردانێن حزبی د كاروبارێن وه‌زاره‌تا خواندنێن بلند و ڤه‌كۆلینێن زانستی دا.
هه‌ر د وێ به‌یاننامێ دا كو ژ 4 خالان پێك هاتیه ، ئاماژه ب هندێ هاتیه كرن كو ژ ئالیێ زێده‌تر ژ 250 خویندكارێن سه‌رجه‌م كولیژێن زانكۆیا دهۆكێ ڤه هاتیه ده‌ركرن و ژبۆ پاراستنا خۆیندكاران ژ هێزێن چه‌كدارێن حزبی ل ده‌ڤه‌رێ، ب پێدڤی زانیه ئیمزا و ناڤێن وان به‌ڵاڤ نه‌كه‌ن .
بناڤی خودێ مه‌زن و دلۆڤان
ئه‌م وه‌ك به‌شه‌ك ژ خوێندكارێن زانكۆیا دهۆكێ, ژ ئه‌گه‌رێ هه‌ستكرن ب به‌رپرسیاریه‌تیا مێژوویی و گرنگیا كارێ مه وه‌كو ته‌خه‌كا پێشه‌نگ و دیارا ناڤ جڤاكی دا , مه ب پێدڤی زانی ئێدی بێده‌نگ نه‌مینین و رابین ب كومكرنا ئیمزایێن هه‌ژماره‌كا زۆرا وان خوێندكارێن كه ده‌مه‌كێ درێژه ئازادییا را ده‌ربڕینێ دناڤ جه‌رگی واندا هاتیه گرێدان و ژلاێی ده‌زگه‌هێن حیزبی و حكومی ڤه رێێگری لێ هاتیه كرن كو ب ئازادانه بیرو بۆچوونێن خۆ بۆ رایا گشتی ده‌رببڕن, و ل دوماهیێ و ژ ئه‌گه‌رێ ڤێ ره‌وشا سه‌ر ده‌ڤه‌رێدا هاتی,مه بریاردا هه‌ڵوێستێ خۆ یێ جێگیرو ئاشكرا دچه‌ند خاله‌كێن ڤێ به‌یاننامێدا ئاراسته‌ی رایا گشتی یا كوردستانێ و په‌رله‌مانێ كوردستانێ و هه‌ردوو سه‌رۆكایه‌تێ هه‌رێمێ و حكومه‌تا هه‌رێمێ كوردستانێ بكه‌ین:
1) ده‌نگێ خۆ ددینه دگه‌ل ده‌نگێ خۆ نیشانده‌رێن پارێزگه‌ها سلێمانیێ ب تایبه‌تی خه‌لكێ خۆ راگرو چاڤ نه‌ترسێ باژێرێ سلێمانیێ و پشتگیریا هه‌می داخوازێین وان یێن ره‌وا دكه‌ین.
2) پشته‌ڤانیا خۆ بۆ مامۆستاو خوێنكارێن زانكۆیا سلێمانیێ دوپات دكه‌ین د ده‌مه‌كێ دا پشتگیریا هه‌می داخازیێن وان دكه‌ین و خه‌بات و تێكۆشانا وان بۆ دیتنا چاره‌سه‌رییه‌كا ژیرانه ب كاره‌كی پیرۆز ل قه‌له‌م دده‌ین.
3) دژی ب كارئینانا هه‌می جۆره توندوتیژییه‌كێینه ژ لاێی ده‌سه‌ڵاتیڤه بۆ سه‌ر خۆنیشانده‌ران و هه‌روه‌سا ژلاێی خۆنیشانده‌ران ڤه بو سه‌ر دام وده‌زگه‌هێن حكومی و حیزبی, داخازێ ژ خۆنیشانده‌ران دكه‌ین ب شێوه‌كێ شارستانیانه به‌رده‌وام بن و د هه‌مان ده‌م دا داخازێ ژ ده‌سه‌ڵاتێ دكه‌ین ب شێوه‌یه‌كێ شارستانیانه به‌رسڤا خۆنیشانده‌ران بده‌ن.
4) ئیدانا راوه‌ستاندنا ده‌وامێ دكه‌ین ل زانكۆ و په‌یمانگه‌هێن باژێرێ هه‌ولێرێ و دلگرانیا خۆ به‌رامبه‌ر هه‌ر ده‌ستێوه‌ردانه‌كا حیزبی د كارو بارێن وه‌زاره‌تا خوێندنا بلند و ڤه كۆلینێن زانستی دا دكه‌ین.
تێینی: ئه‌ڤ به‌یاننامه‌یه ژ لاێی زێده‌تر ژ (250) خوێنكارێن سه‌رجه‌م كۆلیژێن زانكۆیا دهۆكێ ڤه هاتیه ئیمزا كرن ,به‌لێ بۆ پاراستنا گیان و پاشه‌ڕۆژا خوێندكاران ژ هێزێن چه‌كدارێن حیزبی مه ب پێدڤی زانی ناڤ و ئیمزایێن خوێندكاران نه‌هێنه به‌ڵاڤ كرن.
لوتفی دۆسكی