تەها جاف
بەینی خۆمان بێت، نەم و یست ئەم وتارە بنوسم، بەڵام وەک پەیڕەوانی فەلسەفەی سلێمانیزم، خۆم بۆنەگیرا.
* دەسەڵاتی موحتەرەم...!
هەقەتەن شورەییە بۆ جەنابتان، کە بەمیراتگری رۆحی یاخی، چل و شەش ئێماراتی کوردی (سلێمانی) بوترێت تێکدەر و ئاژاوه گێڕ...
بەڕاستی ئێوە دەقاودەق، کۆپیکراوی ستەم هێنەرە بێگانەکانن. ئێوەش ساڵی جارێک وێنای ئەوان، سلێمانی دەکەنە. فتنەچی و فەوزاچی...
(ده‌بێ ئاسایشی نه‌ته‌وه‌ی بپارێزرێ و سلێمانی ئاسای بکرێته‌وه. سه‌رچاوه‌ی فتنه و فه‌وزای سیاسی ده‌بێ له(سلێمانی)یه‌وه بنبڕبکرێت. رۆژنامه‌ی هه‌ولێر ژماره / 784 / 19 / 5 / 2010/ ئه‌م مانشێته، لێکچوکراوی مه‌قوله‌که‌ی حيزبی به‌عسه. (من الاجل الاستقرار الشمال، یجب أن نقطع رأس الحیة في السلیمانية)... (سلێمانی نۆخبەیە، ئەژدیهایە، فەوزای خەلاق، بەرپا دەکا... سلێمانی سێگۆشەی بەرمۆدەیە، دوابەدوای یەک، لەئۆقیانسەکەیدا و نتان دەکا).
*پێمان دەڵێن ئێمە لەگەڵ میسر و ...هتد جیاوازین. ئەی جیاوازی کوڕەکانی ئێوە لەگەڵ جەمالی موبارەک و سەیفەکەی قەزافی چیە؟ ئەی جیاوازی ملیارەها لە دۆلارەکەی ئێوەو ئەوان چیە؟ ئەوەی ئەوان وێنەی فرانکلینە، ئەوەی ئێوە وێنەی...!
مانه‌وه‌ی ده‌سه‌ڵاتێک له‌م مۆدیله، ته‌نها گیروه‌ست بو، به‌پێوه‌ر و پێوانه‌ی کاته‌وه، چونکه ده‌سه‌ڵاتێکی له قاڵب دراو بو، ئاگای له‌کات نەمابو، کە چۆن تیژڕۆیی کات سه‌ری خواردن.
* لەم شارەدا بەمنداڵی زۆر کات لەنێوان ئەم گەڕەک و ئەوگەڕەکدا، کە هەر بۆکات بەسەر بردنش بوایە شەڕە بەردێکمان دەست پێدەکرد. جاروباریش سەری یەکترمان دەشکاند و چەند بریندارێکیشی لێدەکەوتەوە، لەولاشەوە (حەباوە خانی) ناتق رەسمی گەڕەک، هەربەدەم بنێشت تەقاندنەوە، دەکەوتە بەینەوە و دوقسەی خێری لە مەوزوعەکەدا دەکرد، ئیتربەوشێوەیە کۆتایی بەشەڕی ئەو ئێوارەیە دەهات.
* دەسەڵاتی موحتەرەم...! بەداخەوە ئەم جارەیان ئێوە رێسا و یاسای گەمەکەتان شکاند، لەبری بەرد هاویشتن، بەگولەی مەترەلۆز، (رێژوانی کوڕی عەولەسیس)تان شەهید کرد، چەندین لە هاوڵانتان خەڵتانی خوێن کرد. هەربەوەشەوە نەوەستان و بەدوای ئەودا، شەهید لەدوای شەهید و خوێن لەدوای خوێن. سلێمانیتان خەڵتانی خوێن کرد، کەوتنە وتی وتی و سوکایەتی پێکردن بە خۆپیشاندەران، ئەمە (ژانی گەل)ه. ئێوە ژانتان بۆ گەل هێناوە. ئەمە بەشی دوەمی رۆمانەکەی مامۆستا برایم ئەحمەدە، جه‌بری نه‌فسی پێ ئه‌‌وێ خه‌ڵکینه که‌سری ئیعتیبار، ئیعتیبار و نه‌فس ئه‌که‌ن له‌م باسه چونکه ئینکیسا،- روی زه‌مانه‌ڕه‌ش بێ له‌مه‌ردان رو که وه‌رگێڕێ ئیتر، دێنه مه‌یدان بڵح و نامه‌رد تێک ئه‌ده‌ن ره‌سم وشیعار... حەزرەتی حەمدی وای وت.
* لەم وڵاتەدا، چەندە گێلێتی دەسەڵاتی ئەم دو حيزبە لەپێش کەوتندا بێت، دەهەندە ژیری بۆ کۆمەڵگا دەگەڕێتەوە. پێش هەزار ساڵێک، حەجاجی سەقەفی مرۆڤ کوژ، لەدوای قەتڵ و عامی خەڵکێکی زۆر، گەڕایەوە بۆلای خەلیفە و بە خەلیفەی وت: جەناب، ئەوەی خاوەن زمان و دەنگی بەرز بو کوشتمان، ئەوەشی وسکت بو، بۆ خۆی لەبێدەنگیدا سەردەنێتەوەو دەمرێت، دەسەڵاتی موحتەرەم...! سلێمانی عەکسی (اصحاب الکهف)ە، خەو قەدەغەیە، دەبێت هەمیشە زیتەڵ بێت، بێدەنگی قەدەغەیە، دەبێت هەمیشە زوڵاڵ بێت، پێدەچێت ئەمەش موعجیزە بێت بێ ئەوەی هەستی پێبکەین.
* وشەی دوەم: خۆتان واتەنی (بەناو) خۆپیشاندەر ئەی بەئەرک نەبێت (بێ ناو) خۆپیشاندەر کێیە...؟ بەڕای ئێوە، دەبێت سلێمانی بەملکەچیەوە، لەحزوری مەقامی عالیتاندا، ئیزن بخوازێت، ئەوکاتێ ئێوەش لوطف بفەرمون تابە سلۆیی خۆپیشاندێکی ناسک بەڕێوەبەرین، تالەمەوە ببینە مواطنی صالح...! یان دەبێت بەشەرعی بونی خۆپیشاندان، لە پارچە پەڕۆی (زەرد و سەوز و سپی و نیلیەوە)بێت. ئەی لەبیرتان چۆتەوە، کە ئەم رەنگانە (ته‌سنیع محه‌لی) شاری سلێمانی بون.
- هەرساڵی جارێ ئەم شارە دەبێتە مەزهەلە، یان بەتۆپ باران یان بەبارانی پەڵه... حەزرەتی حەمدی وای وت.
* ئێمە ئاژاوه گێڕنەبوین، ئێوە ئوممی و نەخوێندەوارن، بۆیە بەجارێ ئاوابون لە کۆمەڵگا و لە مرۆڤایەتی هەقەتەن ئێوە ئەهلی کتێب و دایەلۆکنین؟ ئێوە لەبیرتان چو بو کە حامی خاک و ماڵی (کورد)ی سلێمانیە...! نەک ئێوەی سەر رەفەی بان مرۆ. سلێمانی ئاراگۆنە، ئەژدیهایەک کەسەرجەم هاوکێشەکان دەگۆڕێت، پێتان وابو کە زۆر بەئاسانی بتوانن سلێمانی بێدەنگ بکەن، نەتانزانی کە چنگی تیژی سلێمانی، تەنها موڵکی ئەهلی نوخبەیە، پێتان وابو کە زۆر بەئاسانی بتوانن، سەرجەم قەڵەمەکانی نیشتمان بکڕن، سەرجەم ئیرادەکان لاواز بکەن، شەقام کپ بکەن، ئەی هزری نۆخبە و ئیرادەی هاوڵاتی، ئەی چنگی تیژی جەماوەری شەقام، هەقەتەن ئێوە دەسەڵاتێکی گێل ولاژک بون.
* بەڕاستی شورەیی بو بۆ جەنابتان، بەتۆمەتی فەوزا و غەوغاو شەڕەنگێزی وەڵامتان داینەوە، ئەی فەوزا و غەوغا نەکەین چیبکەین...؟
- دڵ له به‌ندی سینه‌دا دوباره واوه‌یلا ئه‌کا، (نور به‌خشی) ناسره‌وێ، مه‌یلی شه‌ڕو غه‌وغا ئه‌کا، ئینتقامی قه‌ومی لێقه‌وماو به‌هه‌ق داوا ئه‌کا، مەلیکی نەمر وای وت.
ئەی سلێمانی ئینتقامی قه‌ومی لێقه‌وماو به‌هه‌ق داوا نە‌کا، چیبکا...؟
قوڕی کوێ بکەین بەسەرماندا...! ئێمەش حەزمان دەکرد، کە میراتگری غەوغا و فەوزای خەلاق نەبوینایە، حەزمان دەکرد، لەتەڕمان بخواردایە، بەڵام بێ تام و بێ هزر لەوشکایشدا بخەوتینایە، بەڵام بێ جەستە و بێ رۆح.
* لە وشکە ساڵیدا سلێمانی شاری بوکەبەبارانێ و نوێژە بەبارانێیە، لەوشکە ئازادی و بونی گەندەڵیشدا، سلێمانی شاری نوێژە بە دیموکراتیزە و نوێژە دژ گەندەڵیە، ئەمەشیان فەوزایەکی نوێیە. سه‌رهه‌ڵدانی فه‌وزای خه‌لاق لە سلێمانیدا بەرامبەرە، به‌بونی هەرسته‌مێک کە له کوردستاندا دەخولقێت، زەنگ لێدانی فه‌وزای خه‌لاق له سلێمانیدا بۆ هه‌ر ده‌سه‌ڵاتێک، ئاماژەیە بەبونی پیلانێک لە سته‌م و لە ملهوڕی بەرامبەر بەم خاکە، لەگەڵ پیادەکردنی هەرستەمێک ده‌رهه‌ق به سەروەری هاوڵاتیانی کوردستان، راستەوخۆ پلانی فەوزایەکی خەلاق لە سلێمانیدا لەدایک دەبێت، ستەم و ملهوڕی هەر ستەمە، ستەم رەشبێت و سپیبێت، عەرەبی بێت و کوردیبێت، خۆماڵیبێت و داگیرکەریبێت، ستەم هەر ستەمە، بۆیە له‌لایه‌ن بیرمه‌ندانه‌وه، خولقاندنی پلانی فه‌وزای خه‌لاق، پەرچدانەوەی پیلانەکانی سەرانی ستەمکارانە، ئێمە ئاژاوه‌گێڕنەبوین... تەنها لەڕێگای گەمەیەکی شەڕە بەردەوە، داوای سوکە چاکسازیکمان کردو بەس... بۆ یاریەکەتان کردە بیکەیسی، بۆ هێندە ئەترسن لەچاکسازی،چرکەیەکەو بەس.
* ده‌سه‌ڵاتی به‌ڕێز...! ئێمە ئاژاوه‌گێڕنین، سلێمانی خێر لەخۆ نەدیوە، خێر لەخۆ نەدیو بەمانای خێرپێکردن و پوڵ و پڕۆژەنیە، ئێمە بۆخۆشمان گیرمان خواردوە لەنێوان (دو هاوکێشەی دژا و دژدا) (هەڵمەت و قوربانی) و (بایتەختی نوخبە) ئایا کامەیانین...؟ (هێزی جەستە و بازو، یان هزر و کارمای مێشک)، پێدەچێت هەردو جەمسەرەکە بین، جەمسەرگیری و میراتگیری، بۆتە سلێمانگیری.
جیهانگیری بۆهەبێت، ئەی سلێمانگیری بۆنەبێت...؟ سلێمانی ئەوهایە فەوزایە غەوغایە.
ئێوەش نامەی ئەعمالتان،غەیری خیانەت و فەسادی چی ترە؟
- که نه‌ته‌وه‌م گه‌یشته دوا مه‌به‌ستی، هه‌رکه‌س نامه‌ی (ئه‌عمال)! درایه ده‌ستی، ئه‌وسا تێده‌گه‌ین له‌خه‌بات و تێکۆشان، که‌بۆ کورده و بۆ ڤزگاری کوردستان... حه‌زره‌تی دیلان وای وت.
* ئێمەی ئەهلی ئەم شاره... نە فیسبوکین و نەتویتەر، نەگۆڕەپانی تەحریرین و نەبنغازی. نەئاژاوەچیشین و نەگێرەشێوێن، سلێمانی تەنها شارێکەو بەس. سلێمانی کوردستانە و کوردستانیش دڵی سلێمانیە، فەوزای خەلاقی شاربوکەکەی ئێمە، پێش فیسبوکە و بەردەرکی سەراکەی عەولە سیسەکانشمان، پێش ساحەی تەحریرە. مەڕجەعی فەلسەفەی رۆشنگەری و رۆشنبیریەکەشمان ئۆقیانوسێکە لەحەزرەتەکان...
خولیای گۆڕین و گۆڕانکاریەکانی سەرجەم تێکستەکانی ژیانیش لای ئێمە، بۆ ماوەیە و هەر بەمیراتیش بۆمانماوەتەوە. (ئەی مەزدا ئێمە خوازیارین لە و کەسانەبین کە روخساری ژین دەگۆڕن) زەرادەشت وای وت... کێ دەیکات و کێ دەیخوات، خۆزگە هەر نەبویتایە سلێمانی، وەک هەرناشبیت...!