شنە پێنجوێنی

ئەو رۆژەی بەهۆی گرفتە ناوخۆییەكانی یەكێتی نیشتمانییەوە، بەناچاری تۆ كرای بە سەرۆكی حكومەتی هەرێمی كوردستان، لە زۆرلاوە تێبینی زەق دەبوەوە، تەنانەت رەخنەی توندیشت لێدەگیرا، بەتایبەت هەر لەگەڵ سوێندخواردنەكەت، (25)پەرلەمانتار هۆڵی دانیشتنەكەیان بەجێهێشت. دوای ئەوەش پارتی و دواتر یەكێتیش بە شێوازی جودا جودا كۆسپ و بەربەستیان بۆ دروستدەكردی، بەڵام تۆ هەمو ئەو سەرنج و رەخنە و تێبینییانە و هەمو ئەو كۆسپانەی دەیانهێنایە سەر رێگات، گوێت پێنەداو هەر خەریكی دروشمی بریقەدار بویت، دیاربو زۆر دڵت بەوپۆستە خۆشبو، نازانم حیكمەت لەچیدا بو، ئەو هەمو خۆشییەت پێیدەهات! بۆ سنگ دەرپەڕاندنی سەرشاشەی تیڤییەكان بو، یان كۆكردنەوەی پارەبو، ئەمە خۆت باشتر دەیزانی.

 ئەوكاتەی لە بەغدا جێگری سەرۆكی ئەنجومەنی وەزیران بویت، وامدەزانی پیاوێكی دیبلۆماسی و سیاسەتمەدارێكی هەڵكەوتو، هەروا بێتەوە، پیاوێكی قسەزان و زیرەكی، كەچی ماوەیەكی باشە، هەمو ئەو خوێندنەوە و ئەو تێڕوانینەم بۆ بەڕێزت تەواو پێچەوانە بوەتەوە. من، وامدەزانی تۆ پەروەردەی دەستی ئەمه‌ریكای، كەچی ئەوەندە لە رەخنە دەترسای، قەت بیرم بۆ ئەوە نەدەچو، لەبەرخاتری وتارێك یان راپۆرتێكی رەخنەیی، كۆبونەوەی ئەنجومەنی وەزیران نەكەیت و سوربیت لەسەر ئەوەی كە یان گۆڤارەكە دابخرێت، یان سەرنوسەر لابدرێت، ئەمە دیاریی بەڕێزت بو كە لە ئەمه‌ریكای دیموكراسی هێنابوتەوە دكتۆر؟!، بەڵام ئێستا بە بەرچاوی بەڕێزتەوە، لولەی تفەنگەكان دەكرێنە سینگی لاوانی ئەو شارەی كە تۆ خۆتی پێهەڵدەكێشی، بەڵام ناڵێی ئەگەر بكوژەكان راپێچی دادگا نەكرێن، من دەست لەكار دەكێشمەوە!

 ئێستا، دیسان دەتەوێت چی بكەیت، دیسان چاوبەستمان دەكەیتەوە، ناتوانی دكتۆر ناتوانی، تۆ پێش دوساڵ زۆر زۆر خۆشەویستتر بوی لە ئێستا، بەڵام ئەها كورسی دەسەڵات (جا ئەو كورسییەی جەنابیشت كە زۆر لاوازە) چی لە هەمو ئەوانە دەكات كە هەندێك گەرای دیكتاتۆرییەتیان لەناخدا شین بوە، كاتێك قەزافی دەڵێت، ئەو گەلەی منی خۆش نەوێت، شایانی ژیان نییە، ئێوەش لە ناوەڕۆكدا و بە كردەوە هەروا دەڵێن، تەنها جیاوازییەكە ئەوەیە كە هێشتا بە زار دەرتان نەبڕیوە.

دەزانی زۆر بەو بڕیارە پێكەنیم كە گوایە تۆ موڵكی گشتی دەگەڕێنیتەوە بۆ حكومەت، من تەنها ئەوەندە دەڵێم، ئەگەر راست دەكەیت، جارێك واز لەم قوتابخانە و ئەو ماڵ بهێنە، تۆ وەرە لە شتە زەبەللاحەكانەوە دەست پێبكە، تۆ وەرە پێش هەمو شتێك قەڵاچۆلان و سەری رەش وەرگرەوە و بیكە بە جوانترین سەیرانگا و وەرە سكرتارییەتەكەی نێچیرڤان بارزانی بكە بە كۆمەڵگەیەكی پزیشكی و وەرە دەباشان و دوكان، باشترین شوێنن بۆ سەیرانگا.

 جەنابی بەناو سەرۆكی ئەنجومەنی وەزیرانی هەرێمی كوردستان، د. پشتیوانت بینی هەر لە ختوخۆڕایی بە چ دەردێكیان برد، ئەی تۆ لەكوێ بوی، تا كەی ئاسایش بە بەرچاوی خەڵكەوە و لەناو جەرگەی پایتەختدا، خەڵك بە لێدان دەڕفێنن و لەناو بارەگای ئاسایشی گشتی حەپسی دەكەن. باشە بۆچی موحاسەبەی وەزیری ناوخۆت نەكرد كە بۆچی ئەو كارەیان كردوە؟ دەزانم كە ناتوانی ئەو كارە بكەی، قەتیش ناتوانی، دەنا بەڵگە زۆرە.

 دەزانم كە تۆ گوێ لە كەس ناگریت و هەمیشە خەریكی وشەی باقوبریقی بۆ خەڵكی ستەمدیدەی دەڵێیتەوە، بەڵام ئەگەر چەند مانگی یەكەم گوێمان لێدەگرتی، دڵنیابە ئێستا كەس گوێت لێناگرێت، ئەگەر جاران كەمێك دڵمان دەهات سەیرت بكەین و گوێت لێ رابگرین، بەڵام ئێستا وردە وردە روخساریشت رۆژ لە دوای رۆژ ناشیرینتر دەبێت و كەسیش گوێت لێناگرێت، بۆیە بۆئەوەی روخسارت لەوە زیاتر ناشیرین نەبێت، دەست لەكار بكێشەوە. دەست لەكار بكێشەوە، ئەو كورسییە تۆی لەبەرچاوی میللەتەكەت خستوە، رۆژی (17)ی شوبات هیچی كەمتر نەبو لە رۆژی رەشی شەشی ئەیلولی (1930)، باشترین ساتەوەختیش بو بۆتۆ كە هەڵوێستت بنواندایە و دەستت لەكار بكێشایەوە، بەڵام دیارە كورسی زۆر موغرییە!

 بەڕێز، تۆ هەر دەبێت وازبهێنی!، بەڵام بەر لەو كاتەی وازت پێدەهێنن، خۆت دەست لەو كارە بكێشیتەوە باشترە، ئەگینا داواكاریی خۆپیشاندەران و هەروەها داواكاریی حیزبە ئۆپۆزسیۆنەكانیشە كە ئەم حكومەتە دەبێت هەڵبوەشێتەوە، چونكە خەریكە لەسەردەمی تۆ، وا دو ئیدارەیی دروستدەبێتەوە، نەشتتوانی وەزارەتەكانی پێشمەرگە و ناوخۆ و دارایی بكەیتەوە یەكو نەتتوانی پڕۆژە وەهمییەكان نەهێڵی، نەتتوانی باڵادەستی حیزب لە ناو حكومەتەكەتدا دور بخەیتەوە، نەتتوانی خزمەتگوزاریی بگەیەنیتە ئەو شوێنانەی كە خەڵكەكە هاواری لێهەڵدەستێت و كەسیش بە هانایانەوە ناچێت، نەتتوانی تەندەرە بێحساب و كتابەكان رابگریت و ئیتر هەمو پڕۆژەكان لەم كوردستانە، تەنها بۆچەند كەسێك نەبن كە لە پەنجەی دەست تێناپەڕن، نەتتوانی دەزگای زانیاری و پاراستن بكەیتە دەزگایەك بۆ ئەمنی قەومی وڵات و كەسێكی پسپۆڕ، نەك كوڕی هەردو سەرۆك سەرۆكی ئەو دو دەزگایە بن، بەڕێز ئەوەی خەڵك داوای دەكات، تۆ ناتوانی بیكەیت، ئەوەی خەڵك دەڵێت، مەیكەن، تۆ دەیكەیت، بەڕێز زۆر شتت نەتوانی، دكتۆر زۆرشتت نەتوانی!

 دكتۆری بەڕێز، لەو رۆژەوەی تۆ بوی بە سەرۆكی ئەو حكومەتە، داوا دەكەین، بودجەی راگەیاندنی سێبەر ببڕە و خۆشت لە چەندین بۆنەدا وتوتە دەیكەین، بەڵام خۆت گوتەنی، كردار شەرتە، ئەی بۆ نەتكرد؟ تا كەی؟ ئەم هەمو بودجەیەی دەچێتە قوڕگی راگەیاندنی حیزبەكانەوە، بۆ نایبڕی؟ دكتۆر بۆ نایبڕی؟، ئەم هەمو كادرە نەخوێندەوارانەی بەپۆستی باش باش دامەزراون و خانەنشینكراون، خۆ حەتمەن لیستی ناوەكانیشت لایە، ئەی بۆ نایبڕی؟ دكتۆر، با لەبیرم نەچێت، توخوا گەرمیانی (11) ساڵان، هی ئەوەبو چەكداری بارەگاكان گولەی تێبگرن؟، كوشتنی ئەم منداڵە، هیچ تۆی نەجوڵاند، بۆچی؟، ئاخر خوێنی ئەم منداڵە لە ئەستۆی تۆ و سەرۆكی هەرێمە، ئینجا بكوژ و ئەو چەكدارە رەزاقوڕسانەی لولەی تفەنگیان دەكەنە میللەت. سەرۆكی حكومەت، تائێستا یەك بكوژت بۆ نەگیراوە؟، ئەی ئافەرین سەرۆكی حكومەت، بەراستی حكومەتی كوردی دەبێت هەر وا بێت.

هەر ئەوەندەت پێ دەڵێم، تكایە دەست لەكاربكێشەوە، ئەگەر نا، میللەت پێت دەكێشێتەوە، تكایه‌.