|
|
|
ئیخوان ئه‌لموسلمینی میسر؛ ئه‌و ئیسلامیانه‌ی جبه‌یان داكه‌ندوه و به‌رگی یاسا و دیموكراتیان پۆشیوه |
|
Tuesday, February 1, 2011 |
(سبه‌ی):
له‌گه‌ڵ ده‌ستپێكردنی خۆپیشاندانه‌كاندا، ئیخوانه‌كان خه‌مساردیه‌كیان پێوه دیاربو و هیچ گرنگیه‌كیان پێنه‌دا. به‌ڵام ته‌شه‌نه‌كردنی مانگرتن و به‌رفراوانبونی و گواستنه‌وه‌ی بۆ شارو شارۆچكه‌كانی تری وڵات له ده‌ره‌وه‌ی قاهیره و ئه‌سكه‌نده‌ریه و سویسدا، ناچاری كردن به به‌شداری كردن تا له جه‌ماوه‌ر دوانه‌كه‌ون و به شه‌مه‌نده‌فه‌ره‌كه‌دا رابگه‌ن. كاتێك نزیك به 100 هه‌زار دانیشتوی وڵاته‌كه بانگه‌وازێكیان واژۆ كرد و داوای گۆڕانكاریان كرد، 2 رۆژی پێچو تا ئیخوان بڕیاری به‌شداری كردنی دا، به‌ڵام به‌شداریكردنیان ژماره‌كه‌ی گه‌یانده 300 هه‌زار و ئه‌وه‌ش ده‌رخه‌ری ئه‌و راستیه‌یه كه ئیخوان هێزێكن ناكرێت پشتگوێ بخرێن.
كاتێك (محه‌مه‌د به‌دیع) به رابه‌ری حیزبه‌كه هه‌ڵبژێردراو جێگه‌ی (مه‌هدی عاكیف)ی گرته‌وه، رایگه‌یاند: هیچ كاندیدێك بۆ سه‌رۆكایه‌تیه‌كان كاندید ناكه‌ن و ته‌نها مه‌به‌ستیان به‌شداریكردنێكی ئه‌كتیڤی سیاسیانیه له ژیانی كۆمه‌ڵگادا، به‌ڵام ئێستا كه ره‌وشه‌كه ئاڵۆز بوه و به‌ره‌و گۆڕینی ده‌سه‌ڵات ده‌ڕوات هه‌مو لێكدانه‌وه‌كان خۆیان له‌و گومانه نادزنه‌وه كه گه‌وره‌ترین حیزبی سیاسی ناكرێت ئه‌م چركه‌ساته مێژویه له‌به‌رچاو نه‌گرێت و گوڕ نه‌داته خۆی بۆ قۆستنه‌وه‌ی بارودۆخه‌كه و له په‌نجه‌ره‌وه هه‌وڵی گرتنه‌ده‌ستی ده‌سه‌ڵات نه‌دات.
له‌گه‌ڵ گۆڕینی هه‌ڵوێستی ئه‌مه‌ریكادا له ده‌ربڕینه‌كه‌ی هیله‌ری كلینتۆنه‌وه كه وتی: میسر پێویستی به‌چاكسازییه، بۆ وته‌كانی (رۆبه‌رت گیبس)ی وته‌بێژی كۆشكی سپی كه داوای هه‌ڵبژاردنێكی بێگه‌رد و ئاڵوگۆڕێكی ئاشتیانه‌ی ده‌سه‌ڵات ده‌كات، جارێكی تر مێرده‌زمه‌ی ئیسلامی سیاسی له رۆژئاوادا خه‌وی له بۆرسه و بازاره‌كانی دراو زراندوه، هۆكاره‌كه‌شی مه‌ترسی گرتنه ده‌ستی ده‌سه‌ڵاته له لایه‌ن ئیخوانه‌كانه‌وه له میسردا.
ئه‌م هێزه سیاسییه له‌م ساڵانه‌ی دوایدا كه‌م تا زۆر خۆی له پێشینه‌ی دامه‌زرێنه‌ره‌كانی و به‌تایبه‌ت (كلتوری سه‌ید قوتبیانه) رزگاركردوه و له هه‌وڵدابوه خۆی له‌گه‌ڵ سه‌رده‌می نوێدا بگونجێنێت، ئێستا قسه‌كردن له دیموكراتیه‌ت وه‌ك سه‌رده‌می كۆنی بنیاتنه‌ره‌كانی به كوفر له‌قه‌ڵه‌م نادرێت، بۆچون به‌رانبه‌ر به ژنان به‌ته‌نها ئاماده‌كردنی نه‌وه‌یه‌كی خواپه‌رست نیه. له‌لایه‌كی تره‌وه هه‌وڵێكی زۆر دراوه بۆ خۆگونجاندن له‌گه‌ڵ لیبرالیزمی سه‌رمایه‌داریدا و چه‌ندین ده‌وڵه‌مه‌ندی زۆری لێكۆبۆته‌وه كه یارمه‌تی دارایی ئه‌ده‌ن به رێكخراوه‌كه و كه‌سانێكی زۆری چینی ناوه‌ڕاست به ژیانێكی بۆرجوازیانه‌وه پێكهێنه‌ری بنه‌ڕه‌تی ئه‌مڕۆی حیزبه‌كه‌ن، له‌گه‌ڵ هه‌مو ئه‌مانه‌دا گومان نیه كه ئیخوان داوای پراكتیكردنی شه‌ریعه‌ت ده‌كات و ئیسلام به رێبازێك بۆ ژیانی كۆمه‌ڵایه‌تی له قه‌ڵه‌م ئه‌دات و تائێستاش زۆرینه‌ی هێزه توندڕه‌كان له‌م حیزبه‌وه له دایك بون.
له‌مڕۆشدا كه كێشه‌ی جه‌ماوه‌ر و ده‌سه‌ڵات توندبۆته‌وه، ئیخوانه‌كان له هه‌وڵدان ئاشتی نێوان میسر و ئیسرائیل كه له سه‌رده‌می ئه‌نوه‌ر ساداتدا واژۆكراوه، كۆتایی پێ بهێنرێت و ئه‌م بابه‌ته‌ش بكه‌نه داوایه‌كی جه‌ماوه‌ری، ئه‌مه‌ش یه‌كێكه له ترسه‌كانی رۆژئاوا له گرتنه‌ده‌ستی ده‌سه‌ڵات له میسردا، كه ره‌نگه سه‌راپای هاوكێشه‌كانی رۆژهه‌ڵاتی ناوه‌ڕاست ئاڵوگۆڕێكی ریشه‌ییان تێدا بێته‌وه كایه‌وه، له‌م روه‌وه پسپۆڕان كۆكن له‌سه‌ر ئه‌وه‌ی رژێمه‌كه‌ی حوسنی موباره‌ك شه‌رعیه‌ته نێوده‌وڵه‌تیه‌كه‌ی له به‌ربه‌ست كردنی ئیخوان و نه‌هێشتنی گه‌یشتنه ده‌سه‌ڵاتیان به‌ده‌ستهێناوه، به‌ڵام روداوه‌كانی ئه‌مڕۆ ئه‌و راستیه ده‌خه‌نه‌ڕو كه ئه‌و ئیخوان نین سه‌ركردایه‌تی خۆپیشاندانه‌كان ده‌كه‌ن، به‌ڵكو ئه‌وه جه‌ماوه‌ره ئیخوان له‌گه‌ڵ خۆیدا په‌لكێش ده‌كات. |
|
|
|