(سبه‌ی):
لەکاتێکدا ئێمە سەرقاڵی کاری هەماهەنگی بووین، بۆ پشتگیری پەیامە حەوت خاڵییەکەی بزوتنەوەی گۆڕان، سەبارەت بە رزگارکردنی ئەزمونی هەرێمی کوردستان‌و چارەسەری ریشەیی سەرجەم گرفتەکان، بە تاوانگەلێکی تری دەسەڵات (بەتایبەتی هی پدك) ئاشنابوین، سەبارەت بە کوشتنی مرۆڤی کورد، چەپاندنی خۆپیشاندەران‌و لێدان‌و دەستبەسەر کردنیان، سوتان‌و تاڵانکردنی بارەگاکانی بزوتنەوەی گۆڕان؛ ئەمە جگە لەوەی کە لە هەڵمەتێکی گوماناویدا لەلایەن ژمارەیەکی زۆر چەکدارەوە تەلاری رادیۆو تەلەفیزیۆنی (نالیا) تەفروتونا کراو سوتێنرا.   
ئەزمونی هەرێمی کوردستان بە پەرلەمان‌و میری‌و هەمو دامەزراوە دێموکراسیەکانەوە، بەرهەمی خوێنی شەهیدان‌و دەنگە ئازادیخوازەکان‌و رەنج‌و چەرمەسەری سەدان هەزار مرۆڤی بەلەنگازی کوردستانە.
گەر لە ساڵانی رابردوشدا تکاو پاڕانەوەی لایەنە دڵسۆزەکانی نێوخۆ و فشاری دەوڵەتانی رۆژئاوا نەبانایە، دەمێك بو دو پارتەکەی دەسەڵات (پدك و ینك) ئەو ئەزمونەیان زیندەبەچاڵ کردبو، یاخود لە کورەی شەڕی براکوژیدا سوتاندبویان.
لەکاتێکدا هەرگیز لە هەرێمی کوردستان میریەکی خاوەن قسەی دور لە کۆنترۆڵی ئەو دو پارتە بونی نەبوە، هەرچی سوکایەتییش هەیە هەر لە سەرەتای دامەزراندنیەوە بە پەڕلەمانی کوردستان کراوە.
دەسەڵاتدارانی هەرێم نەك هەر لە ماوەی نۆزدەساڵدا (نۆزدەڕۆژ) ئەو ئەزموونەیان پێش نەخستووە، بەڵکو بەردەوام لە دواخستن‌و لەکەدارکردنیدا بوون، تا کردیانە مایەی تەوس‌و لاقرتێی نێوەندەکانی ناوەو دەرەوە. ئەو تاوانە دژی ئەزموونی هەرێمی کوردستان‌و پەڕلەمانەکەی، تەنهاو تەنها لەئەستۆی پارتەکانی (پدك و ینك)ە.
ئێمە تاڕادەیەك گەشبین بووین بەوەی، کە هەڵبژاردنەکانی ٢٥ی ٧ دەبنە وانەو پەندی مێژوویی گرنگ بۆ بەخۆداچوونەوەی پارتەکانی دەسەڵات‌و دەستهەڵگرتنیان لە بینەقاقای پەڕلەمان‌و دەسەڵاتی دادوەری‌و میری‌و راگەیاندن. دڵخۆشبووین بەوەی، کە ئیدی ئەزموونەکەمان سەرپێ دەکەوێت‌و لەنێو سیستمێکی دێمۆکراسیدا بەرەوپێشەوە هەنگاو دەنێت.
بەڵام بەداخەوە دەسەڵات ئەو قۆناغە مێژووییەشی چەوت بەکارهێنا، زیاتر کەوتە گاڵتەپێکردن‌، بەردەوام پەڕلەمانی کوردستان‌و دامودەزگا دێمۆکراسیەکان لە چوارچێوەی کارتۆنیی نەخشییندا بۆ شاردنەوەی تاڵانوبڕۆی سەرکردەو بەرپرسە دەستپیس‌و مشەخۆرەکان بەکار دەهێنێت. ئەوان بە کارکرد سەلماندیان کە لە بەرژەوەندیی بەرتەسکی پارتەکانیان‌و قەڵەوبوون‌و خەنیبوونی زیاتری بەرپرسەکانیان لەڕێگەی تاڵانوبڕۆی کوردستانەوە، خەمێکی دیکەیان نییە.
ئەو ئەزموونە کە هەموومان بۆی لەخەمداین، پێویستی بە رزگارکردنە.
پێویستمان بەوەیە رێزو بەهاو پێگەی راستەقینە بۆ پەڕلەمان‌و میری‌و دەسەڵاتی دادوەریی بگێڕینەوە.
پێویستمان بەوەیە، دادپەروەری یاسایی بەرقەرار بێت‌و یاسا بەسەر هەمووماندا وەکویەك بەبێ جیاوازیی جێبەجێ بکرێت. سامان‌و داهاتی زۆروزەبەندی نیشتیمانەکەمان بەفیڕۆ نەچێت‌؛ چۆن هەموو مرۆڤی ئازادیخوازی کورد قوربانییان بۆ دا، ئاواش لێی سوودمەند بن.
تەماشای دەوڵەتی میسر بکەن، سەرەڕای ٣٠ ساڵ دیکتاتۆریی، هێشتا رژێمەکەی هێندەی رەوشت تێدا مابوو، کە سوپا نەکاتە دوژمنی گەل؛ ئێستاش لە گەرمەی مەزنترین شۆڕشی جەماوەریی ئەو وڵاتەدا، بۆتە مایەی رێزو خۆشەویستی هەموو گەلانی ئازادیخوازو وەک سوپایەکی بێلایەنی نیشتمانپەروەر ستایشی دەکەن.
لای ئێمەش پێشمەرگە، کە جوانترین بوونەوەری رۆژهەڵاتی ناوەڕاست بوو؛ تەنها ناوەکەی بە دەیان رایەڵ بە وشەی ئازادیەوە بەسترابوو، ئێستا (پدك و ینك) کردوویانەتە رمووزن‌. بە دەبابەو تۆپەکانی پێشمەرگە، هەوڵی تۆقاندنی جەماوەرو ئۆپۆزیسیۆنی ئازادیخواز دەدەن. پێویستە لە نیشتمانەکەماندا رێزو بەها بۆ وشەی پێشمەرگەو کارەکتەری پێشمەرگە بگێڕینەوە. دەبێت پارتی رامیاری لە میلیشیاکانی وەك (زێڕەڤانی‌و...تد) داماڵەخاس بکرێت.
گەر گۆڕان لە ئەزموونەکەماندا روونەدات، لەنێودەچێت. ئەوکاتەش دڵنیاین هەر مرۆڤی بەلەنگازی کورد باجەکەی دەدات‌و ناسۆرەکەی هەڵدەگرێت، بەرپرسە گەندەڵەکانیش بە پارەوپوولی دزراوەوە بۆی دەردەچن.
بزووتنەوەی گۆڕان، لە ٢٩ی ١ی ٢٠١١دا، پەیامێکی ٧ خاڵیی بۆ پاراستنی ئەزموونی هەرێمی کوردستان‌و رزگارکردنی پەڕلەمان‌و میری‌و دادگاو دەزگاکانی ئاساییش‌و پۆلیس لەژێر چەپۆکی رەشی (پدك و ینك)دا راگەیاند.
چەوساندنەوەی بەردەوام، مرۆڤی کۆمەڵگەی ئێمەی زۆر لەوە زیاتر وریاکردۆتەوە کە بە درۆو پڕوپاگەندەی دەسەڵات، ئازادییخوازان‌و تینووانی دادپەروەریی وەك تێکدەرو ئاژەوەگێڕ‌و تاڵانچی تەماشا بکات!
ئێمە کە لە خوارەوە واژۆمان کردووە، پشتگیریی تەواوی خۆمان بۆ پەیامە دڵسۆزانەکەی بزووتنەوەی گۆڕان بەمەبەستی پاراستنی ئەزموونی بەلاڕێدابراوی هەرێمی کوردستان‌و رزگارکردنی دەسەڵاتەکانی یاسادانان‌و جێبەجێکردن‌و دادوەریی، هەروەها گەڕانەوەی هێزەکانی پێشمەرگەو پۆلیس‌و ئاسایش بۆ پێگەی بەڕێزی خۆیان رادەگەیەنین‌.
هاوکات وزەو توانستی خۆمان لە وڵاتانی خانەخۆ دەخەینەگەڕ، بۆ ئاشناکردنی دەوڵەتەکانیان بە رەوشی سیاسی هەرێمی کوردستان‌و‌ بەیاننامەکەی بزوتنەوەی گۆڕان‌و وەڵامی دەسەڵات بۆی‌. هەروەها رای گشتیی‌و نێوەندە فەرمییەکانی دەرەوە، بە زانیاریی پێویست سەبارەت بە ناڕەزایی کۆمەڵگەو خۆپیشاندانەکان‌و تاوان‌و سەرکوتکردنیان ئاشنا دەکەین؛ جگەلەوەی بە کەمپین‌و پەیامی نووسراو، هەوڵی بەدەستهێنانی پشتگیری‌و چاودێرییان بۆ بارودۆخەکە دەدەین.
داوا لە کۆمەڵانی خەڵکی کوردستان دەکەین، سنووری خواستە تایبەتیەکانیان تێبپەڕێنن‌‌، بەدەر لە جیاوازیی دیدو بۆچوونیان‌، بە گیانێکی باڵای نیشتمانپەروەرییەوە، دەست لەنێودەست، بە شێوازی شارستانیانەی ئاشتیخوازانە، دوور لەهەرجۆرە زەبروزەنگێك، تێبکۆشن بۆ رزگارکردنی ئەزموونی هەرێمی کوردستان‌و پچڕینی بەهاو رۆڵ بۆ پەڕلەمانی کوردستان‌و دامودەزگا دێمۆکراسیەکان.
داوا دەکەین هێزی پێشمەرگەی کوردستان رێگەنەدات لەوە زیاتر سوکایەتی پێبکرێت‌و بکرێت بەگژ مرۆڤی کورددا؛ تەنها لایەنگری نیشتمان بێت‌و بەهای جوانی خۆی وەدەست بهێنێتەوە.
داوا لە ژمارەیەکی زۆر رۆڵەی دڵسۆزی گەلەکەمان لەنێو هەردوو پارتی دەسەڵاتداردا دەکەین، بە زوڕنای پارتەکانیان هەڵنەپەڕن‌و گوێ بۆ دنیای دەرەوەی نێو پارتەکانیان رادێرن‌و تێبگەن کە بەڕاستیی لە هەرێمی کوردستان چ باسە.
داوا دەکەین، بزووتنەوەی گۆڕان لەسەر فشارەکانی بەردەوام بێت. ئەو دەسەڵاتە پێویستی بە راچەنینی گەورەیە تا بێتەوە هۆش خۆی!
رەوەندی کوردیی دەرەوەی کوردستان
٢٠ی ٢ی ٢٠١١
راسته‌وخۆ واژۆکان بنێرن بۆ ئه‌م ئێمایله‌‌:  [email protected]