ژ سه‌رهلدانا 1991ێ تا 2011ێ بیست سال بتمامى بورین، بیست سال بۆ ژیێ ملله‌ته‌كى ده‌مه‌ك كێمه، لێ ژبۆ تاكه كه‌سێ كورد بكێمى سێكا ژیێ وى یه، له‌ورا ده‌مێ هزرا خۆ د ڤان بیست سالان دا دكه‌ین و د پڕسین: مه وه‌كو كورد چ كرییه؟
راسته كارێن باش هاتینه‌كرن و ئه‌و كار د به‌رچاڤن و رۆژانه د مه‌دیایێن دیتى و بهیستى و خویندى ده‌هـ باره‌دبن، ئه‌ڤ كاره جهێ سۆپاسى و رێزگرتنێ یه، لێ ئه‌نجامدانا وى كارى مانه ئه‌ركێ ده‌ستهه‌لاتێ یه؟ ئه‌گه‌ر خواندنگه‌هـ و نه‌خوشخانه... نه‌هێنه ئاڤاكرن، جاده نه‌هێنه ڤه‌كرن، گوند نه‌هێنه ئاڤه‌دانكرن، مووچه‌یێن فه‌رمانبه‌ران نه‌هێنه‌دان، پا..كارێ ده‌ستهه‌لاتێ چییه و هه‌بوونا حوكمه‌ت و په‌رله‌مان بۆچییه؟
ئه‌گه‌ر وه‌رگرتنا مووچه‌ى به‌رامبه‌ر كاركرنێ ئه‌ركێ فه‌رمانبه‌رى بیت، ئه‌و قه‌نجیێ ل كه‌سێ ناكه‌ت، به‌لكو ئه‌ركێ خۆ بجهـ دئینیت، هه‌روه‌سا وه‌رگرتنا وى بۆ مووچه‌ى مافێ وییه و كه‌س قه‌نجیێ ل وى ناكه‌ت، وه‌سان بجهـئینانا ده‌سته‌لاتێ بۆ بروژه‌یان ئه‌ركێ وێیه و قه‌نجیێ ل ملله‌تى ناكه‌ت، به‌لكو ئه‌و ب پله یه‌ك مفادارن و یا دروست ئه‌وه ب باشترین شێوه ئه‌ركێ خۆ جێبه‌جێبكه‌ن و بۆ ملله‌تى ببنه پێشره‌و و نموونه، ئه‌گه‌ر نه‌ء ئه‌و دبیته كه‌مترخه‌مى.
ده‌مێ هزرا خۆ دكارێن د بیست سالان دا هاتینه‌كرن دا بكه‌ین، ژبلى هه‌بوونا چه‌ندین كونسولخانه‌یان ل هه‌ولێرا پایته‌خت و هنده‌ك پروژه‌یێن د به‌رژه‌وه‌ندا گشتى دا، كو مایه‌یى رێزگرتنێ نه.
لێ د بیست سالان دا ئایا ئه‌م كورد شیاینه هه‌ستا نه‌ته‌وه‌یى یا فیریایى لجه‌م جه‌ماوه‌رێ سه‌رهلداى بكه‌ینه هوشیارییا نه‌ته‌وه‌یى؟
د بیست سالان دا ئه‌م شیاین جڤاكه‌ك كوردى لسه‌ر بنه‌مایه‌ك نه‌ته‌وه‌یى (زمانه‌ك فه‌رمى) رێكبێخین یان زاراڤێ (كرمانجى ژوورى، كرمانجى ژێرى) ژێكڤه‌قه‌تیانه؟
د بیست سالان دا مه كارییه حزبایه‌تیا ته‌سك بكه‌ینه زێ یه‌ك ڤه‌رێژته رووبارێ كوردینیێ یان مه نه‌ته‌وایه‌تى كره جۆیه‌ك د كۆن مشكێن حزبایه‌تیێ دا وندا دبیت؟
د بیست سالان دا پتریا ده‌ستهه‌لاتداران دانپێدانێ ب هه‌بوونا خلتێ گه‌نده‌لیێ دكه‌ن، ئه‌رێ دانپێدان ب گه‌نده‌لیێ بێى كاركرن بۆ چاكسازیێ ژ گه‌نده‌لیێ ب خۆ خراپتر نینه؟
د بیست سالان دا ئه‌ڤ ئاسایش و ته‌ناهییا كوردستان تێدا به‌رامبه‌ر ئاژاوه و كوشتن و تێكدان یا ل ئیراق و ده‌ڤه‌رێ به‌ربه‌لاڤ یان بارێ نه‌خوشێ ل پارچێن دى یێن كوردستانێ كورد تێدا دژین، باره‌كێ ئیكجار باشه، لێ قه‌نجییا ته‌ناهیێ بۆ ده‌زگایێن ئاسایش و پۆلیسان... ڤه‌دگه‌ریت یان ب پله یه‌ك بۆ ملله‌تى كو ل گه‌ل خرابكاران نه‌یێ هاریكاره؟
د بیست سالان دا چاوا ئه‌م دبێژینه جیهانێ مه كوردان دۆزه‌ك سیاسى هه‌یه، نه ئاریشه‌یه‌ك مرۆڤینى یان قه‌یرانه‌ك ئابوورى...، وه‌سا خه‌لكێ مه ل هه‌رێما كوردستانێ نه برسیێ نانى یه، به‌لكو تێهنى و برسیێ دادوه‌ریا جڤاكییه و یا سه‌یرتر ئه‌وه كه‌سێن د بیست سالان دا مفادارتر، پتر گله‌یى و گازندان دكه‌ن!