|
|
|
كوربه‌ندی زانستی و هیڤیێن ئێك رێزیا ناڤمالا كوردی |
|
نوسه‌ر: محسن عه‌بدولره‌حمان
|
|
Wednesday, March 4, 2015 |
كوربه‌ندی زانستی ل ژێر ناڤێ (ئێك رێزیا ناڤمالا كورد وه‌ك ستراتیژی بو به‌رنگاربونا گه‌فێن هه‌نوكه‌یی) ل ژرۆا 2/3/2015ێ ل هۆلا كونفرانسان – زانكۆیا دهۆك، هاته به‌ستن، تێدا چه‌ندین بابه‌تێن كه‌رمێن رۆژه‌ڤێ ژ لایێ ماموستایێن زانكۆیێ ڤه هاتنه پێشكێشكرن، تێدا گه‌له‌ك كه‌ساتیێن ژ لایه‌ن و سازیێن جودا به‌رهه‌ڤبون، لێ ناڤه‌رۆك لدور چاوانیا ئێك رێزیا ناڤمالا كوردی رێكبێخین هه‌ڤدگرت، د ڤان ته‌وه‌ران دا هاتنه گه‌نگه‌شه‌كرن، وه‌ك ئابورا كوردستانێ و مه‌دیا كوردی و باندورا وێ ل سه‌ر ئێك رێزیا ناڤمالا كوردی، ئاسته‌نگێن هه‌ڤدو قه‌بولكرنێ د جڤاكێ كوردی دا...، بدیتنا من كێماسیا ئێكانه یا كوربه‌ندی گه‌له‌كیا بابه‌تێن گه‌رم و گرنگ و كێمیا ده‌می بو، كو هه‌ر ته‌وه‌ره‌ك جودا هه‌ژی بو، رۆژه‌ك تایبه‌ت بۆ هاتبا ته‌رخانكرن و پتر كه‌سێن تایبه‌تمه‌ند بهه‌ر ته‌وه‌ره‌كی تێدا به‌رهه‌ڤببان.
ناڤه‌رۆكا بابه‌تان ل دور هه‌بونا مه‌ترسییه‌كێ دزڤرێن، ئه‌وژی گه‌فێن داعش و په‌یدابونا حه‌شدا مللییه، بدیتنا من ژ ئه‌گه‌رێ نه‌پێشكه‌فتنا ملله‌تێ مه ب شێوه‌ك سرۆشتێ ئانكو پێنگاڤ ب پێنگاڤ و سیاسه‌تا وێرانگه‌را داگیركه‌ران بو كه‌ساتیا تاكێ كورد بكارئینای، ره‌وشه‌نبیرییه‌ك پاشڤه‌مایێ لپه‌ی خۆ هێلایه، له‌ورا پشتی سه‌رهلدانێ ده‌ستهه‌لاتا كوردی وه‌ك رێخۆشكه‌ر بو به‌لاڤكرنا ره‌وشه‌نبیریا لێبورین و قه‌بولكرنا یێ دی و هه‌ر لاوازییه‌ك د ژییاتی بۆ وه‌لاتی، ئه‌مه‌كداری بۆ ده‌وله‌تێ، ملكه‌چی بۆ قانونێ؛ ب پله ئێك به‌رپڕسیاره، چنكو حزبێن كوردی پتر ژ هه‌ڤڕكیێ دوژمناهیا هه‌ڤ كرییه، ژ لایه‌ك دیڤه ده‌زگایێ دینی و كه‌رتێ په‌روه‌ردێ ژبۆ مه‌ره‌م و به‌رژه‌وه‌ندا خۆ یا به‌رته‌نگ بكارئینایه، داهاتیێ وه‌لاتی ب شێوه‌یه‌ك به‌ره‌للا وه‌كو دامه‌زراندیێن بندیوار و به‌خشیێن تایبه‌ت، ده‌ستا و ده‌ست نه‌بونا ده‌ستهه‌لاتێ و...، كو ره‌نگڤه‌دانه‌ك نه‌رینی ل سه‌ر بیروباوه‌رێن تاكێ كورد كریه، هه‌روه‌سا ژ لایێ مه‌دیایی ڤه سیاسه‌تا (ته چ دڤێت بێژه، من چ دڤێت دێ كه‌م) په‌یره‌وكرییه، و ژ ئه‌نجامێن وێ ته‌خا روناكبیر و نڤیسه‌ر و رۆژنامه‌ڤان و....، ته‌سلیمی ئیراده‌یا حزبان بون یان به‌ره‌ڤ هانده‌ران راته‌قیان، زێده‌باری چه‌ندین سه‌ره‌ده‌ریێن دی وه‌كو په‌سه‌ندا حزبی/ مزكه‌فت، خواندنگه‌ه، رێكخراوێن جڤاكێ مه‌ده‌نی، سه‌نته‌رێن ره‌وشه‌نبیری، ئێكه‌تی و سه‌ندیكایێن پیشه‌یی/ بوینه رێكخراوێن حزبی، هه‌روه‌سا مرۆڤكانێ و عه‌شیره‌تگه‌ریێ / من ب هه‌لگره دێ ته بلندكه‌م/ بونه خوراك بۆ عه‌قلییت و ره‌وشه‌نبیرییه‌ك په‌ككه‌فتی، لده‌مێ به‌رفره‌هیێ / ئه‌ز، من ، خۆ/ و لده‌مێ به‌رته‌نگیێ / ئه‌م هه‌مو / د ماوه‌یێ بیست سالان دا نه هه‌ستا نه‌ته‌وه‌یی بو هوشیارییا نه‌ته‌وه‌یی، به‌لكو هشكباوه‌ریا حزبی، سه‌رڕقیا عه‌شیره‌تگه‌ری، ژێك دور كه‌فتنا دینی ... د ناڤ جڤاكی دا به‌ربه‌لاڤبو.
ب هزرا من تا نها د ناڤبه‌را هاولاتی و ده‌ستهه‌لاتێ دا بۆشاهییه‌ك مه‌زن ژ نه‌هه‌ڤسه‌نگی و نه‌هه‌ڤتێگه‌هشتنێ هه‌یه، و تانها ب شێوه‌یه‌ك پراكتیكی ده‌ستهه‌لاتێ دیتنه‌ك روهن بۆ مه‌ودایه‌ك درێژ كو وێ ڤالاهیێ پڕبكه‌ت و سپێنه‌یێن هه‌ین بهه‌لكێشیت، بره‌نگێ پرۆگرامه‌ك رێكخستی یان پلانه‌ك دارشتی نینه، و ئه‌ڤه بشێوه‌یه‌ك ئاشكرا به‌رچاڤ دبیت، ده‌مێ ملله‌تێ كورد پێكڤه ژ كوبانێ تا جه‌له‌ولا بخوینێ ئێك رێزی یا خۆ بۆ دونیایێ دسه‌لمینیت، ئانكو ملله‌ت د سه‌نگه‌رێن شه‌ری دا ئێكگرتنا خۆ پێكدئینیت، دهه‌مان ده‌مدا سیاسه‌تڤان و سه‌ركرده ب ناكوكییان و جاران هه‌ڤدژیێ لدور مێزا دانوستاندنان ژێكجۆدادبن، مینا ناكوكیێن ل دور به‌ستنا كونگره‌یێ نه‌ته‌وه‌یی و هه‌ڤڕكیێن لێڤه‌گه‌را سیاسی ل رۆژئاڤا. لێ هه‌ر ملله‌ت بهیڤییه‌ك مه‌زن چاڤه‌ریێ ئێك رێزی یا ناڤمالا كوردی یه.
 |
|
|
|