|
|
لای وەزارەتی پەروەردە، بەشی کەرکوک = ٣%
مه‌لا فه‌رمان |
|
23/11/2014 |
وەزارەتی پەروەردەی هەرێمی کوردستان ٤٠٠٠ پلەی وەزیفی بۆ بواری پەروەردە راگەیاند، واتە دامەزراندنی ٤٠٠٠ مامۆستا. پەروەردەی بەشی کوردی لەکەرکوک داوای ٤٠٠ پلەی وەزیفی کردبو کە دەکاتە ١٠%.
ژمارەی قوتابخانەی ئامادەیی، سەرەتایی و باخچەی ساوایان نزیکەی ٥٧٠ دەبن. لەهەمو قوتابخانەکان بەڕێژەی بەرچاو کەمی مامۆستا هەیە بە تایبەتی بۆ وانەکانی کوردی، ئینگلیزی، فیزیا، بیرکاری و کیمیا.
وەزارەتی پەروەردە لەدوا بڕیاردا بریاری دامەزراندنی: ١٣٠ مامۆستای دا بۆ کەرکوک و سەرجەم قەزاو ناحیەکانی. ئەم ژماریە بەڕێژەی سەدی لە ٤٠٠٠ مامۆستا:
بۆ کەرکوک و سەرجەم قەزاو ناحیەکانی = ( ١٣٠/٤٠٠٠) *١٠٠ = ٣% (واتە ٣ لە سەدی هەرێمی کوردستان)
بۆ قەزای دوزخورماتو = ( ٢٠/٤٠٠٠ ) *١٠٠ = ٠،٥% (دەکاتە ٥ پێنچ لە١٠٠٠ هەزار )
وەزارەتی پەروەردەی هەرێمی کوردستان
وەزارەتی پەروەردە پێیوایە تاکە وەزارەتە کە ئەم رێژەیە بۆ کەرکوک دادەنێ و خەڵکی کەرکوک دادەمەزرێنێ و هیچ وەزارەتێکی تر لە هەرێم ئەم هەنگاوەی نانێت. بەڵێ ئەم قسەیە راستە، دەبو هەمو وەزارەتەکان لایەکیان لەکەرکوک بکردایاتەوە، بەڵام هیج وەزارەتێک نەهاتوە لە کەرکوک بەش بکاتەوە، تا پلەی وەزیفی بۆ کەرکوک دابنێت.
حیزبەکانیش بۆ بەرژەوەندی حیزبی خۆیان لەدوای ٢٠٠٣ داودەزگاکانی خۆیان هێنایە کەرکوکەوەو ئەزمونی ٥٠ بە ٥٠ کوردستانیان گواستەوە کەرکوک. دو ئاسایش، کۆمپانیاکان ... تاد.
ئەمساڵ پەرلەمانی کوردستان بۆ یەکەمینجار نوسینگەی خۆی لەکەرکوک کردەوە، دوابەدوای پەرلەمانیش وەزارەتی خوێندنی باڵا هەمان هەنگاوی پەرلەمانی نا. ئەگەرچی ئەرکیانە، بەڵام جێی دەستخۆشی و پێزانینە و نمونەیان زۆربێت.
لە ٢٠٠٣ مامۆستاکانی کەرکوک لەڕێگەی حیزبە کوردیەکان و دو حکومەتەکەی هەولێر و سلێمانیەوە هەنگاوی پەلەیان نا بۆ دەستپێکردنی خوێندن بە زمانی کوردی لەکەرکوک. ئەم هەنگاوە ئەگەرچی زیاتر حیزبیانە بو، بەڵام لەسایەیدا خوێندنی کوردی هەنگاوێکی نا، دوای ئەم هەنگاوە ساردیەکی زۆر بیندرا لەدابینکردنی کەرەستە پێویستیەکان و تەواوکردنی هەنگاوەکانی سەرەتا، لەوانە:
1- خوێندکاری کورد دوای شەشی ئامادەیی لەبەر نەبونی زانکۆ بە زمانی کوردی و وەرنەگرتنیان لەزانکۆکانی کەرکوک ناچاربون رو لەزانکۆکانی عێراق بکەن و بە زمانی عەرەبی بخوێنن.
2- لەشارەکانی تکریت و بەغدا ... تاد خوێندکارانی کەرکوک توشی کێشەی ئەمنی و هەڕەشە دەبونەوەو لەسەرەتادا بەشێکیان لەخوێندن دورکەوتنەوە بە تایبەتی کچان.
ئەو خەمساردیەی وەزارەتی پەروەردە و وەزارەتی خوێندنی باڵا لەهەرێمی کوردستان بەرامبەر خوێندنی کوردی لەکەرکوک دەرئەنجامی خراپی لێکەوتەوە، گرنگترینیان:
- جارێکی تر روکردنەوەی دایبابەکان (دایک و باوک) و خوێندکارانی کورد بەرەو خوێندن بە زمانی عەرەبی و دورکەوتنەوە لەخوێندن بە زامنی دایک.
- داخستنی چەندین قوتابخانەی کوردی بەهۆی کەمی مامۆستای کوردیزان و خوێندکارەوە.
ئیدارەی کەرکوک
ئیدارەی کەرکوک لەمیانی پەروەردەدا کەمتەرخەمی بەرچاوی هەیەو کاریگەری زۆر نەرێنی کردۆتە سەر پەروەردەی کوردی لەهەمو رویەکەوە. لەئاستی زانکۆوە تا دەگاتە باخچەیەکی ساوایان. دیارترین کەمتەرخەمی ئەم ئیدارەیە: بۆ ماوەی زیاتر لە ٤ ساڵ دەچێت ١٢ دوازدە بینای قوتابخانە بە مەبەستی تازەکردنەوە و نۆژەنکردنەوە تێکدراون، بەڵام تائێستا بۆ دروسکردنەوەیان یەک بەرد نەخراوەتە سەر بەردێک.
پێشنیار
بۆ ئەمساڵی خوێندن حکومەتی هەرێم بە گوێرەی ژمارەی قوتابخانەکان لەکەرکوک پلەی وەزیفی دیاری بکات. واتە ٥٧٠ مامۆستا، ئەم ژمارەیە لەدەرەوەی ئەو چوار هەزارەی هەرێم بێت.
پرسیاری ئەمڕۆ ئەمەیە:
ئایا رەوایە لە ٤٠٠٠ مامۆستا، کەرکوک ١٣٠ مامۆستای بەرکەوێ کە دەکاتە ٣%. دوزخورماتوش لە ٠،٥%. لەکاتێکدا، ئێمە و حکومەتی کوردستانیش دەمانەوێ کەرکوک بگەڕێنینەوە سەر هەرێمی کوردستان و پێشمەرگە بە کردەوە خوێنی بۆ دەڕێژێ.
|
|
|
|