ئه‌بوبكر ئه‌حمد سلیمان
كاتێك كه ژماره‌یه‌ک پارله‌مانتاری فراكسیۆنی كوردستانی له‌ژیر فشاری په‌رله‌مانتارانی ئۆپۆزسیۆندا، ده‌كه‌ویته حاڵه‌تی به‌رگری له گه‌نده‌ڵی ده‌سه‌ڵات له هه‌رێمی كوردستان، من له‌دوره‌وه قورگم پڕده‌بیت له‌گریان و شه‌رم دام ده‌گرێت، به‌لامه‌وه زۆر سه‌یره، كه‌سێك كه خۆی به‌ئه‌ندامی پارله‌مان و نوێنه‌ری گه‌ل بزانێت، ئه‌و هه‌مو گه‌نده‌ڵی و ناعه‌داله‌تیه نابینێت له كوردستان و زۆر بێشه‌رمانه داكۆكی و به‌رگری له گه‌نده‌ڵیه‌كانی ده‌سه‌ڵات ئه‌كات...
نوێنه‌رانی گه‌ل، ئه‌گه‌ر له رێگای ته‌زویر و ساخته‌كاریشه‌وه چوبنه پارله‌مان، بیانه‌وی و نه‌یانه‌وی به‌رپرسیاریه‌تێكی ئه‌خلاقی و مێژویی ده‌كه‌وێته سه‌رشانیان، هه‌رله‌سه‌ره‌تای دروستبونی حكومه‌تی هه‌رێمی كوردستان، پارتی و یه‌كێتی به‌به‌رچاوی هه‌مو خه‌ڵكی كوردستان و پارله‌مانه‌وه، ماوه‌ی 20 ساڵه سه‌روه‌ت و سامانی ئه‌م وڵاته به‌تاڵان ده‌به‌ن، به‌ڵام ته‌نها یه‌ك كه‌س له ئه‌ندامانی فراكسیۆنی لیستی كوردستانی له پارله‌مان، نه‌ك هه‌ر بۆیه‌كجاریش ورته‌یان لێوه‌نه‌هاتوه، به‌ڵكو هه‌میشه به‌رگای دیماگۆجیانه به‌رگری له‌و ده‌سه‌ڵاته گه‌نده‌ڵه ده‌که‌ن و خۆڵ ده‌كه‌نه چاوی خه‌ڵكه‌وه، پارله‌مانتارانی لیستی ده‌سه‌ڵات ده‌یانه‌ویت له رێگای پارله‌مانه‌وه شه‌رعیه‌ت به‌و گه‌نده‌ڵكاری و ناعه‌داله‌تیه بده‌ن .
ئه‌ندامانی پارله‌مان له فراكسیۆنی كوردستانی، پرۆگرامی هه‌مو دانیشتنه‌كان ده‌به‌نه‌وه لای پارتی و یه‌كێتی و پێشتر له‌گه‌ڵ مه‌كته‌بی سیاسی هه‌ردو حیزب، ته‌وافقاتی سیاسی له‌سه‌ر ده‌كرێت، ئینجا ده‌چێته‌وه هۆڵی پارله‌مان و گفتوگۆی شه‌رمنانه‌ی له‌باره‌وه ده‌كرێت، بۆیه ئه‌ندامانی پارله‌مانی ئه‌م دوحیزبه بێ ئیراده‌و بێ ده‌سه‌ڵاتن له بڕیاردان و ئه‌و جوغزه‌ی له‌لایه‌ن حیزبه‌وه بۆیان كێشراوه بۆیان نیه لێی لابده‌ن .
هاوپه‌یمانی ستراتیژی نێوان یه‌كێتی و پارتی ته‌نها دو خاڵی گرنگی تیایه، كه به‌رژه‌وه‌ندی ئه‌م دوحیزبه‌ی به‌یه‌كه‌وه به‌ستۆته‌وه، ئه‌ویش دابه‌شكردنی كورسی ده‌سه‌ڵات و پاره و داهاتی ئه‌م وڵاته‌یه، ئه‌م دو حیزبه بۆئه‌وه‌ی له كورسی ده‌سه‌ڵاتدا بمێننه‌وه و سه‌روه‌ت و سامانی ئه‌م وڵاته‌یان له‌ده‌ست نه‌چێت، هه‌میشه به‌ڕێگای چه‌ك و كوشتار ده‌سه‌ڵاتی خۆیان به‌سه‌ر خه‌ڵكی كوردستاندا ئه‌سه‌پینن، تازه‌ترین به‌ڵگه بۆ راستی ئه‌م قسه‌یه روداوه‌كانی دوای 17 شوباته.
ئه‌وه‌ی كه له كوردستان پێی ده‌ڵێن پارله‌مان و دیموكراسی و هه‌ڵبژاردن، جگه له سیناریۆ و شانۆگه‌ری دیماگۆجیانه و چه‌واشه‌كردنی راستیه‌كان شتیكی دیكه‌نیه، حیزب به‌هه‌ڕه‌شه‌ی نانبڕین و ساخته‌كاری له هه‌ڵبژاردنه‌كاندا، ده‌نگی زۆرینه‌ی بۆخۆی كۆكردۆته‌وه، هه‌ر له رێگای ئه‌و پارله‌مانه حیزبیه‌شه‌وه شه‌رعیه‌تی داوه به گه‌نده‌ڵی و ناعه‌داله‌تی ده‌سه‌ڵات...
ئه‌وه‌ی كه هه‌ردو حیزبی ده‌سه‌ڵات پێی ده‌ڵێن ئه‌زمونی گه‌له‌كه‌مان، خێر و بێره‌كه‌ی به ته‌نیا بۆ ئه‌م دو حیزبه‌یه، ئه‌م حكومه‌ته دوسه‌ره، هیلكه‌كه‌ی بۆ هه‌ردو حیزبی ده‌سه‌ڵاته و ناعه‌داله‌تی و زیندانی ئینفرادی و بێكاری و ره‌شه‌كوژی نه‌داریش به‌شی خه‌ڵكی كوردستانه، به‌نسبه‌ت خه‌ڵكی كوردستان ئه‌م ئه‌زمونه، جگه له ته‌جروبه‌یه‌كی تاڵ شتێكی دیكه نیه، شه‌ڕی چه‌ندین ساڵه‌ی نێوان ئه‌م دوحیزبه، به‌تاڵانبردنی سه‌روه‌ت و سامانی وڵات، قۆرخكردنی كه‌سب و كه‌سابه‌ت و بازرگانی ناوخۆ و ده‌ره‌وه له‌لایه‌ن هه‌ردو حیزبه‌وه، داسه‌پاندنی ده‌سه‌ڵاتێكی دیكتاتۆریانه به‌سه‌ر خه‌ڵكی كوردستاندا، ئه‌مانه مشتێكه‌له خه‌رواری ئه‌و ئه‌زمونه كه پارتی و یه‌كێتی شانازی پیوه‌ده‌كه‌ن، ئه‌م ئه‌زمونه له‌ماوه‌ی رابوردودا سه‌رتاپا ئه‌رك و ئازار بوه بۆخه‌ڵكی ئه‌م وڵاته...
ئه‌گه‌ر ئیوه پێمان ده‌ڵین، به‌ده‌نگی زۆرینه چوینه‌ته پارله‌مان و حكومه‌تمان پێكهێناوه، ئاخرخۆ دیكتاتۆره‌كانی تونس و مسر و لیبیاش هه‌رده‌یانوت به‌شه‌رعیه‌تی ده‌نگی زۆرینه‌ی خه‌ڵك كورسی ده‌سه‌ڵاتمان به‌ده‌ستهیناوه، به‌ڵام له‌كاتی راپه‌رینه جه‌ماوه‌ره‌یه‌كاندا ده‌ركه‌وت، كه جگه له هاوچاره‌نوسه‌كانیان كه‌سیان له‌گه‌ڵدا نه‌بو، هه‌مو ئه‌و قسه‌و باسانه جگه له درۆ و خۆخه‌ڵه‌تاندن شتێكی تر نه‌بون، بۆ هه‌مو دنیا ده‌ركه‌وت كه ئه‌وانه جگه له مشه‌خۆر و دیكتاتۆر شتكی ترنه‌بون و وه‌ك شێره‌به‌فرینه به‌رگه‌ی تینی هه‌تاوی به‌هاری ئازادی و به‌رخۆدان و راپه‌ڕینی جه‌ماوه‌ریان نه‌گرت و به‌ناچاری كورسی ده‌سه‌ڵاتیان به‌جیهیشت...
نوێنه‌رانی راسته‌قینه‌ی خه‌ڵك له پارله‌مانی كوردستان ته‌نها فراكسیۆنه‌كانی ئۆپۆزسیۆنه، كه سه‌رسه‌ختانه داكۆكی له مافه‌كانی خه‌ڵكی كوردستان و چاره‌نوسی سیاسی ئه‌م وڵاته ئه‌كه‌ن، فراكسیۆنی لیستی كوردستانی له‌ژیر فشاری ئه‌ندامانی فراكسۆنه‌كانی ئۆپۆزسیۆن به‌جۆرێك ئیحراج بوه، كه جورئه‌تی گواستنه‌وه‌ی روداوه‌كانی ناو هۆڵی پارله‌مان ناكه‌ن به‌شێكی راسته‌وخۆ بۆ خه‌ڵكی كوردستان .
ئه‌وه نوێنه‌رانی راسته‌قینه‌ی گه‌لن له فراكسیۆنه‌كانی ئۆپۆزسیۆن، كه‌هه‌مو كه‌ین وبه‌ین و نهێنیه‌كانی گه‌نده‌ڵكاری هه‌ردو حیزبی ده‌سه‌ڵات بۆ خه‌ڵكی كوردستان ئاشكراده‌كه‌ن، ئیتر سه‌رده‌می ئه‌وه به‌سه‌ر چو له ژوره تاریك و داخاوه‌كاندا بۆ به‌رژه‌وه‌ندی هه‌ردو حیزب بڕیار له‌سه‌ر موقه‌درات و چاره‌نوسی گه‌ل و نیشتیمان بده‌ن، له‌چه‌ند ساڵی رابوردوداو به‌رله‌وه‌ی ئۆپۆزسیۆنێكی كارا بێته ناو هۆڵی پارله‌مان، كێ ده‌یزانی بودجه‌ی ئه‌م وڵاته چه‌نده‌و چۆن خه‌رج ده‌كرێت و ده‌چێته گیرفانی چه‌ند كه‌سێكه‌وه، كێ ده‌یزانی سه‌روه‌ت و سامانی ئه‌م وڵاته چۆن له‌نێوان ئه‌م دوحیزبه‌دا ته‌خشان و په‌خشان ده‌كریت، كی ده‌یزانی هیزه كانی پیشمه‌رگه‌و پۆلیس و ئاسایشی ناوخۆ، چۆن كراونه‌ته مولكی حیزب و له‌هه‌مو ئینتیمایكی نه‌ته‌وه‌یی و نیشتیمانی دورخراونه‌ته‌وه‌و وه‌لای حیزب به‌سه‌ریاندا سه‌پیندراوه .نیگه‌رانی هه‌ردوحیزبی ده‌سه‌ڵات له هه‌بونی ئۆپۆزسیۆن له‌ناو هۆلی پارله‌ماندا، هه‌رئه‌وه‌یه كه ئه‌م ئۆپۆزسیۆنه جیاوازه له حیزبه بچكۆله‌كانی ترو له‌به‌رامبه‌ر پۆستی ده‌سه‌ڵات و پاره‌دا بۆ ئه‌م دوحیزبه ماڵی نابن .
ئێستا خه‌ڵكی كوردستان وشیاربۆته‌وه و هاتۆته مه‌یدان، بۆ ئه‌‌وه‌وه‌ی ته‌سویه حسابی گشتی له‌گه‌ڵ ئه‌حزابی ده‌سه‌ڵاتدا بكات، ئێستا داخوازیه‌كانی خه‌ڵك له‌دابینكردنی ئاو كاره‌باو خزمه‌تگزاری تیپه‌ڕاندوه بۆ چاكسازی سیاسی و داوای هه‌ڵوه‌شاندنه‌وه‌ی حكومه‌ت و هه‌ڵبژاردنه‌وه‌ی پێشوه‌ختی پارله‌مان ده‌كات، ئیستا خه‌ڵكی كوردستان ده‌یه‌وێت، سه‌ره‌وت و سامانی وڵات و هێزه‌كانی پێشمه‌رگه و پۆلیس و ئاسایشی ناوخۆ، له‌ژیرده‌ستی حیزب بێته‌ده‌ر و مقدرات و چاره‌نوسی ئه‌م وڵاته ته‌سلیم به‌ده‌ستیكی ئه‌مین بكریته‌وه .
خه‌ڵكی كوردستان و ده‌سه‌ڵاتیش باش خۆی ئه‌زایت، سلێمانی قسه‌ی دڵی خۆی له‌مه‌یدانی سه‌رایی ئازادی كرد، ئه‌و قه‌ره‌باڵغیه‌ی له‌به‌رده‌م مه‌ڵبه‌ندی یه‌كێتی نیشتیمانی كوردستان بینرا، بۆ هه‌موكه‌س ئاشكراو رون بو كه ئه‌وانه موچه‌خۆری ده‌سه‌ڵات بون، هه‌مو ئه‌و سه‌ربازو پۆلیس وئاسایش و كارمه‌نده بێچاریه له شار و شارۆچكه‌كانی ده‌وروبه‌ره‌وه به هه‌ڕه‌شه‌ی فه‌سڵكردن و نانبڕین له‌به‌رده‌م مه‌ڵبه‌ندا كۆكرابونه‌وه، له‌راستیدا ئه‌و خه‌ڵكه بێچاره‌یه هیچ قسه‌یكیان پێ نه‌بو جگه له دوپاتكردنه‌وه‌ی گوێڕایه‌ڵی و ئیتاعه‌ت بۆ ده‌سه‌ڵات به ناچاری.
ئه‌وه خه‌ڵكی سه‌ربه‌ست و ئازادیخوازی مه‌یدانی سه‌رایی ئازادییه ماوه‌ی زیاترله 20 رۆژه قسه‌ی دڵی هه‌مو خه‌ڵكی كوردستان به‌گوێی دنیا راده‌گه‌ێنی، ئه‌وه خه‌ڵكی مه‌یدانی سه‌رایی ئازادیه، كۆتوبه‌ندی ده‌سه‌ڵاتی زۆردارانه‌ی له‌ملی خۆی داماڵیوه و سه‌ربه‌ستانه هاوار ده‌كات بۆ عه‌داله‌ت و ئازادی .
ئه‌گه‌ر پێتان وابێت ئه‌و خه‌ڵكانه‌ی كه به‌هه‌ڕه‌شه‌ی نانبڕین هیناتانه به‌رده‌م مه‌ڵبه‌ند هه‌مو له‌گه‌ڵ ئیوه‌دایه به‌هه‌ڵه‌دا چون، ئه‌گه‌ر ئه‌تانه‌ویت ئه‌و قه‌ره‌باڵغیه‌ش هه‌روه‌ك ته‌زویرو ساخته‌كاری هه‌ڵبژاردنه‌كان به‌خه‌ڵكی بفرۆشنه‌وه دیسان به‌هه‌ڵه‌داچون ئه‌و خه‌ڵكانه‌ی كه به هه‌ڕه‌شه‌ی نانبڕین له‌به‌رده‌م مه‌ڵبه‌ند كۆكرابونه‌وه، زۆربه‌ی ئه‌وانه هه‌ر به‌جه‌سته له‌وێ بون، دڵ و گیانیان له‌مه‌یدانی سه‌رای ئازادی هاواری عه‌داله‌ت و یه‌كسانی و ئازادیان ئه‌كرد، به‌رده‌وام له‌رێگای ته‌له‌فۆنه‌وه هه‌واڵ و ده‌نگوباسی مه‌یدانی سه‌رایی ئازادیان وه‌رده‌گرت .
ئاخر ئیوه ده‌تانه‌ویت ئه‌م كورسی ده‌سه‌ڵاته تاكوی له‌گه‌ڵ خۆتان به‌رن؟ ئێوه په‌ندێكتان له‌و دیكتاتۆرانه‌ی وڵاتانی ده‌وروبه‌ر وه‌رنه‌گرت؟ ئێوه تینه‌گه‌یشتون له‌سه‌رده‌می عه‌وله‌مه و فه‌یسبوك و تویته‌ر؟ ئیتر ناتوانن پێچه‌وانه‌ی شه‌پۆله‌كانی لافاوی توڕه‌یی جه‌ماوه‌ر مه‌له بكه‌ن و سوره‌ماسی له‌ئاوی لێڵدا راوبكه‌ن؟، ئێوه تائێستاش له گۆڕانكاریه‌كانی ئه‌م سه‌رده‌مه تێنه‌گه‌شتون، كه هیچ بوارێك بۆ ده‌سه‌ڵاتی دیكتاتۆریانه نه‌ماوه‌ته‌وه، ره‌نگه بتوانن به‌خۆڵكردن له‌چاوی خه‌ڵك چه‌ند رۆژیكی تریش ته‌مه‌نی كورسی ده‌سه‌ڵاتی خۆتان درێژ بكه‌نه‌وه، به‌ڵام سه‌رئه‌نجام ئه‌و مه‌سه‌له‌یه بۆ هه‌موكه‌س رونه كه‌ده‌بێ ئیوه‌ش ئه‌م ده‌سه‌ڵاته ناعادیلانه‌یه به‌جێ بهێڵن، كه‌واته باشترنیه به‌رله‌وه‌ی بكه‌ونه‌به‌ر لافاوی توڕه‌یی جه‌ماوه‌ر، به‌رێگایه‌كی ئاشتیانه و دیموكراسییانه به‌جێی بهێڵن، خۆسه‌رئه‌نجامی ده‌سه‌ڵاته دیكتاتۆریه‌كانتان به‌چاوی خۆتان بینی له عێراق و تونس و میسر و لیبیا، ئه‌گه‌ر ته‌سلیم به‌ئیراده‌ی جه‌ماوه‌ر نه‌بن دڵنیاتان ئه‌كه‌م چاره‌نوستان له‌مانه باشترنابیت .
تارۆژێك زوتر گوێ له داخوازیه‌كانی خه‌ڵك بگرن باشتره، تازیاتر ده‌ستان سور نه‌بوه به‌خوێنی رۆڵه‌كانی ئه‌م گه‌له، ده‌ست له كورسی ناعادیلانه‌ی ده‌سه‌ڵاتی خۆتان هه‌ڵگرن، بۆئه‌وه‌ی له‌كاتی روبه‌روبونه‌وه‌تان له دادگا و رۆژی لێپرسینه‌وه‌ی جه‌ماوه‌ری خه‌ڵكدا سزای تاوانه‌كانتان سوكتر بێت...
چیتر مه‌ڵێن ئیمه ده‌نگی زۆرینه‌ی خه‌ڵكی كوردستانمان به‌ده‌ستهێناوه، خه‌ڵكی كوردستان و هه‌مو دنیاش باش ئه‌زانێت كه ئێوه به درێژه‌دانی شه‌ڕی ناوخۆ و به‌هه‌ڕه‌شه‌ی نانبڕین و ته‌وافقاتی حیزبی و پارله‌مانێكی 50 به 50 و ئیداره‌یكی دوسه‌ر و به‌ته‌زویر و ساخته‌كاری هه‌ڵبژاردنه‌كان تائێستا درێژه‌تان به ته‌مه‌نی ده‌سه‌ڵاتی خۆتانداوه و ئه‌گه‌ر تائێستاش خۆتان نه‌ناسیوه ئیتر بزانن هه‌ویه و پێناسه‌ی ئێوه ئه‌مه‌یه لای خه‌ڵكی كوردستان...