(سبه‌ی):
بناڤێ خودێ مه‌زن ودلوڤان
جه‌ماوه‌رێ تێكوشه‌رێ كوردستانێ...
دیاره جه‌ماوه‌رێ پارێزگه‌ها دهوكا داسنیان، باژێرێ چاڤنه‌ترسێ خوراگر، كو بدرێژیا مێژووا خو چوكنه‌دانایه بۆ دوژمنان ودكتاتوران، وسه‌ره‌رای كو بادینان بگشتی لبن فشار وسانسورا حزبا ده‌سه‌لاتداره وب تایبه‌تی ژی پارێزگه‌ها دهوك، ئه‌م وه‌كو جه‌ماوه‌رێ باژێرێ دهوكا جوان، ب هه‌می ته‌خ وچینێن خوڤه، ژ دله‌كێ پر دلسوزی ووه‌فاداری بۆ به‌ره‌ڤانیكرنێ ژداخوازیێن ره‌وایێن خه‌لكێ كوردستانێ، وپێخه‌مه‌ت به‌رقراركرنا ئازادیێ ودیموكراسییه‌تێ ویه‌كسانیێ ل وه‌لاتێ مه، برێكا ڤێ به‌یاننامێ بۆ رایا گشتی وخه‌لكێ كوردستانێ، پشتگیری وپشته‌ڤانیا خو بۆ قاره‌مانێن مه‌یدانا ئازادی لسلێمانیێ وگشت جه‌ماوه‌رێ خونیشانده‌رێن باژێركێن دی ل كوردستانێ رادگه‌هینین ودبێژین (داخوازیێن هه‌وه هه‌مان داخوازیێن مه‌نه، به‌لكو داخوازیێن هه‌وه یێن گشت خه‌لكێ كوردستانێنه وئه‌م ب دل گیان ووژدان دگه‌ل هه‌وه‌داینه تاكو سه‌ركه‌فتنێ بده‌ستخوڤه دئینن)..
خویشك وبرایێن قاره‌مانێن مه‌یدانا ئازادی...
خونیشاندان وپێداگریا هه‌وه‌كو ئه‌ڤه زیاتره ژهه‌یڤه‌كێ ل مه‌یدانا ئازادی بڤی ره‌نگێ مه‌ده‌نی و شارستانی،كاره‌كێ هه‌ره پیرۆز وره‌وایه، به‌لكو شوره‌شه‌كا مه‌ده‌نییه، ئێكه‌م جاره ل قادا بزاڤا رزگاریخوازیا گه‌لێ كورد بڤی شێوه‌ی دژی سته‌م ودكتاتوریه‌تێ دهێته پێش!!.بویه ئه‌م وه‌كو جه‌ماوه‌رێ باژێرێ دهوكا داسنیان، خونیشاندانێن هه‌وه ب (تاجا هه‌می شوره‌ش وراپه‌رینێن كوردان) دزانین، وئه‌م ب هه‌می ته‌خ وچینێن خوڤه،ب هیڤی وئومێدین ب سه‌ركه‌فتنا ئیرادا هه‌وه، وچاڤه‌رێینه كو ل بادینان هه‌مان رێك بده‌ینه‌به‌ر بۆ نه‌هێلانا كه‌لێن گه‌نده‌لیێ وبه‌رقراركرنا ئازادیێ ودیموكراسییه‌تێ ل كوردستانێ. له‌ورا داخوازێ ژ هه‌ردوو حزبێن ده‌ستهه‌لادار وهه‌ر سێ سه‌روكاتیان دكه‌ین ل هه‌رێماكوردستانێ خو دویر بكه‌ن ژ به‌لین دانا و(مجاملاتێن بێ ئاكام)،به‌لكو فه‌ره ب كریار پێكاڤان پاڤێژن وب ئه‌ركێ خو یێ نیشتمانپه‌روه‌رانه رابن وڤان خالێن ژێری بزوترین ده‌م بجه بینن:
1. بجه ئینانا گشت داخوازیێن ره‌وایێن خونیشانده‌رێن مه‌یدانا ئازادی بێ قه‌ید ومه‌رج.
2. گرتن ودادگه‌هكرنا تاوانبارێن كوشتن وبرینداركرنا خونیشانده‌ران.
3. هه‌لگرتنا بارێ نه ئاسای لسه‌ر باژێر وباژێركێن كوردستانێ ژ وانا ژی (هه‌ولێر ودهوك) وده‌لیڤه‌دان بۆ هاولاتیان كو ب ئازادانه ده‌ربرینێ هه‌ست وبوچوونێن خو بكه‌ن وداخوازیا مافێن خو یێن ره‌وا بكه‌ن.
هزار سلاف ل گیانێ پاكێ شه‌هیدێن راپه‌رینا 17/شوباتێ‌بن..وداخوازیا سلامه‌تیێ بۆ گشت برینداران دكه‌ین.
ژماره‌كا ته‌خ وچینێن پارێزگه‌ها دهوك
29/ 3/2011