(سبه‌ی):
كومه‌كا كه‌سایه‌تی و رێكخراوێن جڤاكا سڤیل ل باره‌گایێ رێكخراوا مافێن مدنی ل كوردستانێ (دهوك) ل 18\2 كومبون ده‌رباره‌ی ره‌وشا كوردستانێ و روژهه‌لاتا ناڤین و ئه‌ڤ داخویانیه ده‌رئیخست:
-- ئیرو مه بڤیت نه‌ڤیت شوره‌شه‌كا جڤاكی، سیاسی، دیموكراسی، مه‌ده‌نی ل روژهه‌لاتێ ناڤین ژئه‌نجامێ گه‌نده‌لی و نه‌بونا ئازادیا راوده‌ربرینێ و ئازادیێن گشتی و خوسه‌پاندنا رژیمێن دیكتاتور ده‌ست پێكریه. ل هه‌رده‌م و جهه‌كی ده‌ست بسه‌ر داگرتنا ئیرادا گه‌لان ده‌رئه‌نجامێن خراب ژپه‌یدا دبن. ژبه‌ر ڤێ ئیكێ ئه‌م شوره‌شا گه‌لێن تونس و مسرێ پیروز دكه‌ین هیڤیدارین ته‌ڤایا ده‌ستهه‌لات و حكومه‌تین روژهه‌لاتی گوه ل داخوازێن گه‌ل و وه‌لاتێن خو بگرین و هه‌مو پرس گریكان ب ریێن ئاشتی و دیموكراسی ب ئه‌قله‌كێ شارستانێ و سه‌رده‌میانه چاره‌سه‌ر بكه‌ین.
ئه‌م ل وێ باوه‌ریێ نه دێ چریسكین ڤێ شوره‌شێ گه‌هنه هه‌ر چوار ده‌وله‌تێن كوردستان دناڤ خودا دابه‌ش كری (توركیا، ئێران، سوریا، عێراق) ژبه‌ر ڤێ ئیكێ ئه‌م بانك ل گه‌لێ خو و ته‌ڤایا رێكخیستنێن سیاسی، دیموكراسی و جڤاكا مه‌ده‌نی دكه‌ین ژبو هه‌ر پێشهاته‌كێ ئاماده بن ڤان گورانكارییان دبه‌رژه‌وه‌ندییا بلندا نیشتیمانی و نه‌ته‌وه‌یی و سه‌روه‌ریا گه‌ل و وه‌لاتێ مه‌دا بكار بینن.
ئه‌م ب موخابنی ڤه دبیژین ل ڤی هه‌یامێ چویی هنده‌ك داخویانی هاتنه دان گرژی و ئالوزی ل باشورێ كوردستانێ په‌یدا كرن ده‌رئه‌نجامین وان هیرشكرنا لسه‌ر باره‌گایێ لقی چوار یا (پ.د.ك) ل 17\2\2011 ل سلیمانیێ ژچێبو هه‌روه‌ها هێریشین ب هه‌مان ره‌نگ لسه‌ر باره‌گایێن گۆڕان ل هه‌ڤلیر و دهوكێ و سوران ل په‌ی هاتن.
ئه‌م ئه‌ڤ كه‌ساتی و رێكخراوین لڤێره كوم بوین هه‌مو ره‌نگه هیرش و توندو تیژی و كاره‌كێ نه‌شارستانی ژلایێ هه‌ر كه‌س و هیزو لایه‌نه‌كی ڤه‌بیت رسوا و شه‌رمیزار دكه‌ین. دیسان بكارئینانا چه‌كی و ڤه‌گه‌ران بو قوناغا ئیكێ چاره‌سه‌ری نینه. ئه‌م داخواز دكه‌ین سه‌روه‌ریا حكومه‌تا كوردستانێ و ده‌ستكه‌فتی و ئارامیا هه‌ریمێ به‌رچاڤ بهیته وه‌رگرتن. هه‌می لا ب به‌رپرساری ره‌فتار بكه‌ن وهه‌ر تشتێ چێبوی بلا ڤه‌گه‌رێن بو یاسا ودادگاهان.
ئه‌م داخواز دكه‌ین:
1- ئه‌م داخواز دكه‌ین دام وده‌زگه‌هێن حیزبی و حكومی ژێك بهینه جودا كرن و حكومه‌ت و په‌رله‌مان و سه‌روكایه‌تی یا هه‌ریمێ رولێ خوه به‌رامبه‌ر پاراستنا ملله‌تی و خه‌لكێ سڤیل و ده‌ستكه‌فتیت نه‌ته‌وه‌ی ببینیت.
2- داخوازێ ژدام و ده‌زگه‌هێن ئاژانسا پاراستنا هه‌ریمێ و پولیسان و له‌شكه‌رێ كوردستنانێ دكه‌ین ب ته‌مامی بێ لایه‌ن بن و به‌رێ چه‌كێ خو نه‌ده‌نه خه‌لكێ سڤیل.
3- داخوازێ ژگشت كه‌نالێن راگه‌هاندنێ دكه‌ین نه‌بنه هوكاره‌ك بو گرژی و ئالوزی تیكدانا ره‌وشا هه‌ریمێ .
4- داخوازێ دكه‌ین حكومه‌تا كوردستانێ گورانكارین بله‌ز ێن سیاسی و ئیداری ئه‌نجام بده‌ت، چونكو ئه‌ڤ ده‌ست وداره بڤێ ره‌نگی ناچیته سه‌ری. ژئه‌نجامێ گه‌نده‌لی و بێ دادی و نه‌وه‌كهه‌ڤیێ ئه‌ڤ ره‌وشه په‌یدا بویه.
5- داخوازێ دكه‌ین چ هیزو لایه‌ن ئینیه‌تا پاكتاو كرنا لایه‌نێ به‌رامبه‌ر و نه‌هیلان دمه‌یدانێ دا نه‌كه‌نه سه‌رێ خودا و گیانێ لێبورین و ئیك دو قه‌بولكرنێ ب ره‌نگه‌كێ شارستانی په‌یره‌و بكه‌ن.
6- داخواز دكه‌ین هه‌ر كه‌س هه‌ست ب هاوه‌لاتی بونا خوبكه‌ت و ب ئه‌ركێ خویێ نیشتیمانی رابیت.
__ فیدراسیونا رێكخراویت جڤاكا مه‌ده‌نی _ دهوك
__ كومه‌كا چالاكڤانێن رێكخراوه‌یی و مه‌ده‌نی ل دهوكێ
18 \2 \ 2011