کاوە حەسەن  
زمانی سیاسی هەر حیزب و رێکخراوێک گوزارشت لە ئەخلاق و کولتوری سیاسی ئەو لایەنە ئەکات، پاش ئەوەی لە لقی چواری پارتیەوە لە سلێمانی بە فیشەکی زیندو تەقە لە خۆپیشاندەران کرا، ئەندامێکی مەکتەبی سیاسی پارتی رایگەیاند ئەوەی هێرش بکاتەسەر پارتی دەستی ئەبڕین، بۆچی پارتی ئەبێت دەستببڕێت؟ ئەی بۆچی قاچ نابڕن؟

لەوە ئەچێ پارتی بە حوکمی ئەزمونی پەنجا و یەک ساڵی گەشتبێتە ئەو دەرئەنجامەی کە دەستبڕین زۆر باشترە لە قاچبڕین بۆ کەپکردنی دەنگی ناڕەزایی، بەڵام لەڕاستیدا ئەم هەڵوێستەی پارتی وامان لێئەکات بەزەیمان بە پارتیدا بێتەوە، چونکە بەڕ‌ۆژی ئاشکرا دەری ئەخات تاچ رادەیەک ئەم حیزبە لە دەرەوەی مێژو و گۆڕانکاریە ریشەییەکانی ناوچەی خۆرهەڵاتی ناوەڕاست ئەژیت، لەهەمان کاتدا زۆر ترسناکە کە حیزبێك بە کولتور و عەقڵیەتی دەستبڕینەوە حوکمی ئەم هەرێمە ئەکات.

لەڕۆژی حەڤدەی دودا پارتی دو هەڵەی ستراتیجی کوشندەی کرد بە تەقەکردن لە خۆپیشاندەران و هێنانی زێڕەفانی بۆ سلێمانی، ئەمە دەری ئەخات کە پارتی نەک هەرعیبرەت وەرناگرێت لە شۆڕشەکانی تونس و میسر، بەڵام عیبرەتیشی وەرنەگرت لە بەروارێکی تر، مەبەستم 6\1 کاتێک لەژێر فشاری کۆمەڵگای مەدەنی کوردی و نێودەوڵەتی پارتی ناچار کرا داوا یاساییەکانی دژی مەریوان قانع و ئاراس فەتاح و میدیای ئازاد بکشێنەێتەوە، ئەو کاتە هیوایەک هەبو کە لەوانەیە باڵێک هەبێت لەناو پارتیدا مەبەستی بێت بەشێوەیەکی دیموکراتی و شارستانی هەوڵبدات ئەو کێشانەی ئەم پارتە لەگەڵ میدیای ئازاد، رۆشنبیران و ئۆپۆزیسیۆن هەیەتی چارە بکات، بەڵام 17\2 دەریخست ئەم هیوایە هیچ بناغەیەکی نیە، چونکە چۆن ئەتوانیت دیالۆگ بکەیت لەگەڵ حیزبێکدا کە باوەڕی بە دەست بڕین و سوتناندنی بارەگای نەیارەکانی هەیە؟

گەورەترین و کوشندەترین هەڵەی پارتی ئەوەیە هەست بکات لە 17\2 سەرکەوت، پارتی ئەبێ ئەوە بزانێت کە حەڤدەی دو، سی و  یەکی ئاب نیە، ساڵی 2011 ساڵی 1996 نیە، کۆمەڵگای مەدەنی کوردی، ئۆپۆزیسیۆنی سیاسی، خۆرهەڵاتی ناوەڕاست و جیهان بەشێوەیەکی ریشەیی گۆڕاوە، ئەوەی ماوە ئەبێت پارتی بەشێوەیەکی رێشەیی بگۆڕێت، ئەگینا یان گۆڕان یان گەردەلولی گۆڕان.