سازدانی: رۆژنامە
بە مەبەستی زانینی بارودۆخی رێكخستنی بزوتنەوەی «گۆڕان» و مەسەلەی ئەنجامدانی كۆنفرانس و چه‌ند ته‌وه‌ره‌یه‌کی تری په‌یوه‌ندیدار، ئەم چاوپێكەوتنەمان لەگەڵ سەڵاح رەشید، رێكخەری رێكخستنی بزوتنەوەی «گۆڕان»دا، سازکرد.

رۆژنامە: بارودۆخی رێكخستن و پێگەی جەماوەریتان لە ئێستادا لە چ ئاستێكدایە؟
سەڵاح رەشید: رێكخستنی بزوتنەوی «گۆڕان» لە باشیدایە و گەشەی كردوە و هیچ شار و شاروچكە و كوچە و كۆڵانێك نییە لە كوردستاندا، كە بە شێوەیەك لە شێوەكان جەماوەری بزوتنەوەی «گۆڕان»ی تێدا نەبێت، یاخود «گۆڕان» دەستی پێی نەگەیشتبێت و چالاكی تێدا نەنوێنێت.
هەردو هەڵبژاردنیش بۆ پەرلەمانی كوردستان و عێراقیش، نیشانیاندا كە پێگەی جەماوەریی بزوتنەوەی «گۆڕان» زۆر فراوان و هەمەڕەنگ و هەمە لایەنە.

رۆژنامە: لەدوای خرۆشانەكانی هاوڵاتییانی كوردستان لە (17)ی شوباتەوە دژ بەگەندەڵی و ناعەدالەتی دەسەڵات، پێگەی جەماوەریتان هەڵكشاوە، یان داكشاوە؟
سەڵاح رەشید: "گۆڕان" پشتگیری خۆپیشاندان و داخوازییەكانی شەقامی كوردی كردوە، كە داخوازیی عادیلانە و رەوای جەماوەر بوە، بۆیە پشتگیری و خۆشەویستی و هەڵكشان و دڵسۆزی هاوڵاتییان بۆ «گۆڕان» لە جاران زیادی كردوە، ئەویش لە روانگەی ئەوەی كە «گۆڕان» وەفای بۆ بەڵێنەكانی بەرامبەر بە جەماوەر هەبوە و سور بوە لەسەری.

رۆژنامە: میكانیزم و سیاسەتی رێكخستنی جەماوەر لەلای بزوتنەوەكەی ئێوە چۆنە، ئایا ئێوە «ئیعتماد» دەكەنە سەر زۆریی ئەندام و پێدانی ناسنامە پێیان، وەك حیزبەكانی دەسەڵات، یاخود بەجۆرێكی ترە؟
سەڵاح رەشید: "گۆڕان" لەسەر دو بناغە كاری رێكخستنی خۆی ئەنجام دەدات، یەكێكیان پێی دەڵێین؛ (بازنە)، كە لەسەر بناغەی جوگرافی و نەخشەی كۆمسیۆنی باڵای هەڵبژاردنەكان دانراوە، واتا بنكەی دەنگدەران لە ناوچە جیاوازەكاندا و لەوێوە كاری بۆ دەكەین، بناغەی دوەم، پێی دەڵێن: (رایەڵە)، كە ئەوەش لەسەر بناغەی پیشەیی دامەزراوە، واتا ئێمە ئەو كەسانەی كە پێشەی جیاوازیان هەیە، یان پیشەكانیان لەیەكەوە نزیكن، رێكیان دەخەین.
بە واتایەكی تر، ئێمە دەمانەوێت نوێنەرایەتی هەمو چین و گروپ و پێكهاتەیەكی كۆمەڵگەی كوردی بكەین، دور لە رەچاوگرتنی بۆچونی ئایدیۆلۆژی و دینیو تایەفی... بە مەرجێک كە بەرنامەو پەیڕەوی ناوخۆی «گۆڕان»ی قبوڵ بێت.
"گۆڕان" ئامانجی بە حیزبكردنی كۆمەڵگە نییە، ئێمە دەمانەوێت ژمارەیەكی بەرچاوی چالاكی لەخۆبوردەی ئازاو دڵسۆز رێك بخەین و ئەوانە ببنه هەوێنی رێكخستنەكانمان و دەنگ و رەنگی «گۆڕان» بن لە هەمو كوچە و شاقامو بازاڕ و دامودەزگا جیاوازە مەدەنییەكاندا.
ژمارەی هەڵسوڕاوی «گۆڕان» گرنگ نییە، ئێمە دەمانەوێت ببینه بزوتنەوەیەكی سیاسی دەنگدەران، نەك هێزێكی سیاسی، كە تەنیا پشت بە ئەندام و كارمەندە حیزبییەكان ببەستێت، بەلای «گۆڕان»ەوە گرنگە، كە زۆرترین هاوڵاتی دەنگ بە بەرنامەكەی بدات، «گۆڕان» هەوڵدەدات زۆرترین دەنگدەری هەبێت و راستگۆیانە و شەفافانە و راستەوخۆش لەگەڵ دەنگدەرەكاندا مامەڵە بكات و راو بۆچون و تێبینییەكانیان بە گرنگ و پێویست وەربگرێت، چونكە ئەوان سەرچاوەی هێز و توانا و بەرگرین، بێ هاوكاری و لەخۆبوردەیی خەڵكی كوردستان «گۆڕان» بە هیچ شێوەیەك نەیدەتوانی ئەم هەنگاوە گەورانە بنێت و نەخشەی سیاسی كوردستان بەم جۆرەی ئێستا نەدەبو.

رۆژنامە: بۆچی ئەو شێوە رێكخستنە بەرامبەر جەماوەر ئەنجام دەدەن؟
سەڵاح رەشید: "گۆڕان" خەریكی خۆڕێكخستنە لە هەمو كوردستاندا، ئێمە كارەكانمان بە هێمنی و وردو دور لە چاوی راگەیاندنەوە دەكەین، دەسەڵات هەرچی بۆ بكرێت دژ بە «گۆڕان»و هەڵسوڕاوەكانی دەیكات، رابردو نیشانی دا، كە هیچ درێغی ناكات لە نانبڕین و دورخستەوە و زیندان و ئەشكەنجەدانی هەڵسوڕاوانی «گۆڕان»، بۆیە گرنگ و پێویستە كە «گۆڕان»یش رەچاوی ئەم بارو زروفە كاتییە پۆلیسییە بكات، وەك باسمكرد هەنگاوی باش و گرنگمان ناوە بۆ خۆڕێكخستنەوە، ئەو خۆڕێكخستنە هەنگاوی گرنگ و سەرەكییە بۆ كۆنفرانس و كۆنگرە و هاوشێوەكانی... ئەگەر تەنیا مەبەست گرتنی كۆنفرانس بێت، ئێمەش بێگومان وەك زۆر هێزی تر دەتوانین بە زوترین كات بیبەستین، بەڵام بەستنی كۆنفرانسی ئێمە بە دڵنیاییەوە زۆر جیاواز دەبێت لە حیزبە تەقلیدییەكانی تر...

رۆژنامە: مەسەلەی كۆنفرانسی گشتیی بزوتنەوەی «گۆڕان» بەكوێ گەیشت، لەكاتێكدا دومانگ بەر لەئێستا رەشنوسی پەیڕەوی ناوخۆی كاركردنتان بڵاوكردەوە؟
سەڵاح رەشید: بڵاوكردنەوەی رەشنوسی پەیڕەوەی ناوخۆش هەمان مەبەستی هەیە، بۆئەوەی زۆرترین هاوڵاتی كوردستان (نەك تەنیا ئەندام) راو بۆچون و پیشنیازی خۆیان دەربڕن بۆ ئەوەی كە بە كەمترین هەڵە و گۆڕانەوە بخرێتە بەردەم كۆنگرە.

رۆژنامە: ماوەیەكە لایەنی دەسەڵات و بەتایبەت «یەكێتی» لە راگەیاندنەكانییەوە باس لە گەڕانەوەی ئەندامانیان لەناو «گۆڕان»ەوە بۆ ناو «یەكێتی» دەكەن، راستی ئەم مەسەلەیە چۆنە؟
سەڵاح رەشید: ئێمە لە بزوتنەوەی «گۆڕان»دا، ئەنداممان نییە تا گەڕابێتەوە ناو ریزی «یەكێتی»، ئێمە هەڵسوڕاوی «گۆڕان»مان هەیە لەگەڵ گۆڕانخواز... هەڵسوڕاوی «گۆڕان» که‌سانی خۆبه‌خشی چالاكین و له كارەكانی «گۆڕان»دا بەشدارن و بە شێوەیەك لە شێوەكان رێكخراون، گۆڕانخوازیش ئەوانەن كە هاوكاری و پشتگیریی هەمەجۆری بزوتنەوەكە دەكەن، بەڵام كاری حیزبی ناكەن و دەنگدەری «گۆڕان»ن.
ئەو هەواڵانەی كە لە راگەیاندنەكانی «یەكێتی»ەوە، نیشان دەدرێت، بەشێكە لە شەڕی چەواشەكاری و باسكردنی ناڕاستییەكان، ئێمە بەهیچ شێوەیەك گرنگیی پێ نادەین، خەڵكی كوردستان لەوە هۆشیارترە كە بەو شێوە پڕوپاگەندانە بڕوا بكات، «یەكێتی» هەمان سیناریۆی (25/7 و 7/3) دوبارەدەكاتەوە، كە لە دەزگا راگەیاندنەكانەوە، رۆژانە هەواڵی گەڕانەوەی چەندەها كەسی «گۆڕان»ی دەدا، كە چونەتە ناو ماڵەكەی خۆیان، ئەگەر بەپێی ئەو هەواڵانە بوایە، ئەبو ئێستا «یەكێتی» هێزی سەرەكی كوردستان بێت، بەڵام ئەنجامی هەڵبژاردنەكان دەریانخست، كە «یەكێتی»، نەك هەر نەبوە هێزی یەكەم، بەڵكو بوه هێزی سێیەم لە كوردستاندا و شكستی بەدەستهێنا.. دیارە «یەكێتی» دەیەوێت هەمان سیناریۆ دوبارە بكاتەوە و لە هەڵەی رابردو هیچ فێر نەبوە!...

رۆژنامە: «یەكێتی» زۆر كات باس لە بونی كادری موچەخۆری حكومەت دەكات لەناو بزوتنەوەی «گۆڕان»دا بێ ئەوەی كە دەوام بكەن، ئێوە دەڵێن چی؟
سەڵاح رەشید: بزوتنەوەی «گۆڕان» هەمیشە و بە دەنگی بەرز دژی بەفیڕۆدانی سەروەت و سامانی كوردستان بوە و لە هەمو كات و شوێنێكدا دژ بە دەستبەسەرداگرتن و بردنی سەروەت و سامان و پارەی دەوڵەت بوە لە لایەن هەردو حیزبی دەسەڵاتەوە، «گۆڕان» چەندەها جارو بە چەندەها شێوە داوای ئەوەی كردوە، كە پێویستە حكومەتی هەرێم چارەسەری ئەو موچەخۆرە حیزبییانە بكات، كە لە دەزگا حیزبییەكاندا كار دەكەن، موچەی حكومەت وەردەگرن و كار ناكەن، ئەوەندەی پەیوەندی بە كادرەكانی ناو بزوتنەوەی «گۆڕان»ەوە هەبێت، هەمو ئەوانە كایری دێرینی ناو ریزەكانی «یەكێتی» بون، كاتی خۆی دامەزراون و موچەیان هەبوە، كە هاتونەتە ناو «گۆڕان»یشەوە بەهەمان شێوە، هەرچەندە زیاتر لە ساڵێك ئەوانە سزای سیاسی دران و بێ موچە كران، لەبەر ئەوەی لەگەڵ «گۆڕان»دا كار دەكەن. سەرەڕای ئەوەش ئێمە هەمیشە وتومانە كە پێویستە چارەی ئەم كێشەیە بكرێت، یان بخرێنەوە سەر میلاكی حكومەت بەپیێ ئەو ناونیشانە حكومییانەی كە هەیانە، یان خانەنشین بكرێن، بۆ زانینتان ئەو برادەرانە ژمارەیان لە (250) كادر تێپەڕ ناكات، كە لەناو بزوتنەوەی «گۆڕان»دان، بەڵام چەندەها هەزار كادێر بە ئاشكرا لەناو هەردو حیزبی دەسەڵاتدا موچەی حكومەت وەردەگرن و دەیان هەزاری تریش بە نهێنیی، یان بە ناونیشانی جۆراوجۆر، موچە وەردەگرن و دەوام ناكەن.. با حكومەت دەست بكات بەكاری جدی و پارەی حكومەت بەبێ یاسا نەداته حیزبەكان.