|
|
|
بێباوه‌ری د كابینا هه‌شتێ دا |
|
نوسه‌ر: محسن عه‌بدولره‌حمان
|
|
Monday, February 24, 2014 |
درێژبونا ماوه‌یێ راگه‌هاندنا ئه‌نجامێن داویێ یێن هه‌لبژارتنێن په‌رله‌مانێ كوردستانێ بشێوه‌ك بالكێش سه‌رباری قه‌بولكرنا پێشوه‌خت ژ هه‌مو لایه‌نان ب ئه‌نجامێن راگه‌هاندی، ئاماژه‌كرنه‌كا رێژه‌یا سه‌خته‌كاریێ بو، ئه‌و سه‌خته‌كاریا ژ راگه‌هاندن و دژواریا داخۆیانیێن لایه‌نێن هه‌ڤڕك و چاڤدێرێن سیاسی قه‌بارێ وێ دهاته ته‌خمینكرن، لێ پرسیارا بۆچی لیسته ب ئه‌نجامان رازیبون، ژ چ دترسیان، د هه‌ڤكێشێ دا چ فشارێن نافخۆیی و ده‌ره‌كی هه‌بون!؟ بێ به‌رسڤ دمینن.
هه‌روه‌سا گیرۆبونا راگه‌هاندنا پێكئینانا كابینا هه‌شتێ یا حوكمه‌تا هه‌رێما كوردستانێ سه‌رباری بورینا سێ هه‌یڤان، ژ دیاربونا ژمارا كورسیێن هه‌ر لیسته‌كێ؛ ژبلی هۆكارێ ده‌ره‌كی و سه‌ره‌ده‌ریكرنا لیسته‌یان دگه‌لدا وه‌كو ده‌ستكه‌فته‌ك ب ده‌ستڤه‌هاتی، نیشانا ئاستێ بێباوه‌ریێ یه دناڤبه‌را لیستێن سه‌ركه‌فتی د هه‌لبژارتنان دایه.
خواندنه‌ك بله‌ز و سه‌رپێ بۆ عه‌قلییه‌تا كوردی دگه‌هینه هه‌مان ئه‌نجامێن جاران یێن د مێژویێ دا مه دخواندن (گه‌ر مه هه‌با ئیتیفاقه‌ك)، ئه‌وژی هه‌ر ژ چالدێران (1514 - 20014) ئانكو د ماوێ (500) سالێن ره‌به‌ق و تێر مه‌رگه‌سات و ژناڤبرن، ده‌رده‌سه‌ری و خۆلیسه‌ری...، هه‌رده‌م كورد ملله‌ته‌كێ وه‌كو ئه‌ڤرۆ بۆ سه‌ركردێن خۆ گۆهدار و بۆ دۆزا خۆ خۆگۆریكه‌ر بویه، و سه‌ركرده به‌رۆڤاژی هه‌ر وه‌كو ئه‌ڤرۆ و خراپتر ل سه‌ر ده‌ستكه‌ڤتێن وه‌همی و به‌روه‌خت هه‌ڤدژ و ناكوك بونه، بۆیاخه‌ك بازرگانی بخۆڤه دیتینه، خۆپه‌رێسێن كورتبین و بێدادبونه، به‌رژه‌وه‌ندێن خۆیێن كه‌سوكی ب سه‌ر چاره‌نڤیسێ گه‌ل دا زالكرینه، له‌ورا بساناهی هاتینه ژناڤبرن. د پێنچ چه‌رخان دا گه‌له‌ك تشتان د جڤاكێ مرۆڤی دا رودا كو د هزر و ئاشۆپا مرۆڤی دا نه‌بو، لێ هه‌ر كه‌س نه‌شیایه ببیته ئه‌و زه‌لامێ بنه‌مایێن ده‌وله‌تا كوردی ئاڤابكه‌ت.
مخابن سه‌ركردێن پتریا وان (سیداره‌دای، تیرۆركری، زیندانكری، دورئێخستی...) ئه‌و دیوانا ب دلخۆشی برایێ خۆ تێدا قه‌بولنه‌كری، ب سه‌رشۆری داده‌ست داگیركه‌ری و ب شه‌رمزاری و كه‌سه‌ر چون.
پێنج سه‌د سالێن گران و ملله‌ت ب ده‌ستێن خوینه‌لو ده‌رگه‌هێ كه‌لا ئازادیێ دهه‌ژینیت و ژبلی سه‌ركردێن كورد، دور و نزیك، دوست و دوژمن ڤێ راستیێ دبینن و دبێژن. هه‌ر چاره‌نڤیسێ تالێ مالباتێن به‌ردرخانێ مه‌زن، نه‌هری، پیران، شكاكی و قازی...، بۆ خۆ ناكه‌نه وانه و سه‌ربۆر، لجهێ وه‌لاتێ خۆ بكه‌نه بازار و ملله‌تێ خۆ بازرگان، یێ بازرگانیێ ب وه‌لات و ملله‌تێ خۆ دكه‌ن.
|
|
|
|