Print WWW.SBEIY.COM
 هه‌لبژارتن
محسن عه‌بدولره‌حمان
26/01/2012

هه‌لبژارتن پشكدارییا هه‌ولاتییه‌ د حوكم و رێڤه‌برنا وه‌لاتی و چێكرنا بریارێ‌ دایه‌، به‌خشینا شه‌رعییه‌تا ده‌ستهه‌لاتێیه‌، له‌ورا هه‌لبژارتن ب گیانێ‌ دیموكراسییه‌تێ‌ و ماكا مه‌ده‌نییه‌تی دهێته‌ هژمارتن، چنكو هه‌لبژارتن د كوكا خو دا وه‌رگرتن و ته‌سلیمكرنا ده‌ستهه‌لاتێیه‌ بشێوه‌كێ‌ ئاسان و نه‌رم بێی په‌یداكرنا كوسپه‌ و ئاسته‌نگان و هه‌لبژارتن باشترین به‌لگه‌ و كرۆڤه‌یه‌ بۆ مه‌ده‌نیبونا جڤاكی و رێزگرتنا ده‌ستهه‌لاتێ‌ ل ملله‌تی (ده‌نگده‌ران) و هوشیاری و پێشكه‌فتنا ملله‌تی یه‌، هه‌روه‌سا باشترین پیڤه‌رێ‌ دیموكراسییه‌تێ‌ ل هه‌ر وه‌لاته‌كی ده‌ستپاكیا هه‌لبژارتنانه‌.

هه‌لبژارتن شه‌رعییه‌كا حوكمرانی و برێڤه‌برنێ‌ ل سه‌ر چ ئاست بیت دده‌ت كه‌سه‌كی یان كومه‌له‌كێ‌ بۆ ماوه‌كێ‌ ده‌ستنیشانكری؛ بداوی هاتنا وی ده‌می دبیته‌ بداوی هاتنا شه‌رعییه‌تا ده‌ستهه‌لات و برێڤه‌برنێ‌ كو ئه‌و شه‌رعییه‌تا ب هه‌لبژارتن وه‌رگرتی ژ ده‌ستدده‌ت، ئه‌ڤه‌ د ده‌م و كاودانه‌ك گونجای و ئاسایی دا و ئه‌گه‌ر هه‌لبژارتن هاتنه‌ پاشخستن و بۆ ماوه‌یه‌كێ‌ ده‌ستنیشانكری پێدڤی ب درێژه‌پێدانێ‌ بو، ڤیابیت هنده‌ك ئه‌گه‌رێن  گرنگ و چاره‌نڤیسساز هه‌بن و ببن رێگر ل پێش ئه‌نجامدانا هه‌لبژارتنان وه‌كو توشبونا وه‌لاتی بو كاره‌ساته‌كا سرۆشتی یان په‌یدابونا قه‌یرانه‌كا سیاسی...، ژبه‌ر هێز و گرنگی و شه‌رعییه‌تا هه‌لبژارتن  دده‌نه‌ ده‌ستهه‌لاتێ‌ كو مه‌زنترین په‌سه‌نده‌ ب رزامه‌ندیا ئاره‌زومه‌ندانه‌یا گه‌له‌ دهێته‌ ئه‌نجامدان، ل جیهانا پێشكه‌فتی و دیموكراسی گرنگییه‌كا هه‌ره‌زێده‌ و مه‌زن دده‌ن ده‌م و ده‌ستپاكیا هه‌لبژارتنان تاكو ل ڤێ‌ داویێ‌ و سه‌رباری زیانێن مه‌زنێن باهۆزا (ساندی) لدویڤ خۆ هێلایی، هه‌لبژارتنێن سه‌رۆكاتیا ئه‌مەریكا پاشنه‌ئێخستن... و ل ئیراقا د گه‌ڕا هه‌ڕی یا تاكره‌وی، تائیڤگه‌ری و گه‌نده‌لییا كارگێری و دارایی و كریارێن تیرورێ‌ دا دكه‌فزیت، ئه‌ڤه‌ ژبلی هه‌ڤڕكیێن سیاسی و ئاریشه‌یێن خزمه‌تگوزاری كو ژێ‌ دنالیت، ده‌مه‌ك بۆ هه‌لبژارتنێن پارێزگه‌هان هاتیه‌ راگه‌هاندن، د هه‌مان ده‌م دا و سه‌رباری بورینا سالان ب سه‌ر ده‌مێ‌ هه‌لبژارتنێن پارێزگه‌هێن هه‌رێما كوردستانێ‌ ڤه‌ ئه‌وێن ل سالا 2009ێ‌ بداوی هاتین، ئه‌ڤه‌ سالا نو 2013 ژی هات و ل ده‌رازینكێ‌ یه‌ و هێشتا هه‌ر چ به‌حسێ‌ هه‌لبژارتنا جڤاتێن پارێزگه‌هێن كوردستانێ‌ نینه‌، ژ ئه‌نجامێن نه‌باش یێن پاشئێخستنا هه‌لبژارتن لدویڤ خۆ دهێلن ژ بلی نه‌مانا شه‌رعییه‌تێ‌، ده‌نگده‌ر بێئومێد دبیت كو رێز ل ده‌نگێ‌ وی نه‌ هاتیه‌ گرتن و ئێدی باوه‌ری ل ده‌ستهه‌لاتا وی هه‌لبژارتی ناهێت.