|
|
ره‌وشته‌كێ كوردینی نیشانبده!
محسن عه‌بدولره‌حمان |
|
04/07/2013 |
ئه‌رناڤێ مرۆڤی باشترین زێره‌ڤان و چاڤدێرێ نه دیارێ هه‌ر بهێز و هوشیاره و بهه‌ر تشتی ئاگه‌هداره و ب دژی هه‌ر به‌دكاری و سه‌ره‌ده‌رییه‌ك دگه‌ل زكمامێ مرۆڤی نه‌گونجایه، ئانكو ئه‌رناڤێ كه‌سی (الظمیر الشخصی) ئه‌و پاشڤه‌برێ هه‌ر بهێز و كاریگه‌ره دژی سه‌رداچون و ڤارێبونێ، چنكو دور ژ دیتن و بهیستنا جڤاكی لپشت دیوار و په‌ردان دشیاندایه گه‌له‌ك تشتێن نه‌ره‌وا بهێنه‌كرن و بێ سزا ده‌ربازببن.
لێ ئه‌و ئه‌رناڤێ هێلێن سور د هزر و ده‌رونی چێدكه‌ن، بساناهی ناهێنه به‌زاندن، چنكو چاڤدێر (خۆیه‌تیێ خۆدێ ب خۆیه) یێ هه‌رده‌م هوشیار تا بهزرێن د ناخێ مرۆڤی دا ئاگه‌هدار، لێ چه‌ند كه‌س دشێن ئه‌رناڤێ خۆ دور ژ كارتێكرنا حه‌زێن ده‌رونی بپارێزن، یان دژی ڤالیومێن به‌رژه‌وه‌ندان كاریگه‌ر بهێلن؛ رێژه‌یا كاریگه‌ریێ و ده‌مێ بسه‌رڤه‌چونێ (ئێكسپایر) چه‌نده؟ تێكستێن دینی و داخوازیا جاگسازان هه‌رده‌م كاریگه‌ر راگرتنا ئه‌رناڤێ مرۆڤی بویه، (هزرا چاك، په‌یڤا خۆش، كارێ باش) زه‌ره‌ده‌شت، (خۆ دادگه‌ه بكه‌ن، به‌ری بهێنه دادگه‌هكرن) مه‌سیح لێ چه‌ند ده‌لیڤه ب ئه‌رێ و نه‌رێ بۆ شرۆڤه‌كرنێن جودا هه‌نه، كو رێخۆشكه‌رن بۆ پێگیریێ ب پیڤه‌رێن ژیانه‌ك مرۆڤانه و سه‌رفرازانه، یان بۆ سه‌رپێچیێ ل سه‌ر هه‌ر تشته‌ك مرۆڤانه، تنێ ئه‌و كه‌سێن ژ سه‌رده‌مێ داود پێغه‌مبه‌ری ژبه‌ر جوانیا ژنا خۆ هاتینه كوشتن، به‌سسن كو هه‌ر تشت بكه‌فیتی لژێر زه‌ره‌بینا برس و گومانێ! متمانه و پشتبه‌ستن ب ئه‌رناڤێ مرۆڤی ئیك ژ ئه‌گه‌رێن سه‌ره‌كییه بۆ جه‌سپانه‌بونا قانونێ د جڤاكێن رۆژهه‌لاتی دا، د هه‌مان ده‌م دا ل جڤاكێن پێشكه‌فتی كو رێژه‌یه‌كا مه‌زن ژ خه‌لكێ وێ گرنگیێ ب مه‌سه‌لێن ئولی ناده‌ن یان دبێ ئولن، لێ ب هوری پیگیریێ ب رێنما و قانونێن وه‌لاتی دكه‌ن، پتر ژ پیگیرییا ئولدارێن رۆژهه‌لاتی ب تێكستێن دینی، له‌ورا ژیێاتی بۆ نه‌ته‌وه و نیشتمانی بكریار د كار و كریارێن وان یێن رۆژانه دا دهێته دیتن، به‌رۆڤاژی جڤاكێن رۆژهه‌لاتی كو ئه‌مه‌كداری بۆ كه‌سێ سه‌ركرده و كڕنۆش بون ل كاره، هه‌روه‌سا دزانن كو چاكی و پێشكه‌فتنا رۆژئاڤا ژ پێگریێ یه ب قانونێ و خرابی و به‌ره‌لایێ یا جڤاكێن رۆژهه‌لاتی نه ژ دینییه.
د ڤان رۆژان دا هه‌مو كوردستانی بۆ سه‌ره‌دانا بنگه‌هێن كوموسیونا هه‌لبژارتنان ڤه‌كرین د داخوازكرینه ب مه‌به‌ستا ته‌ئكیدكرنا ناڤێن خۆ، ئانكو رێكخستنه‌كا پێشوه‌خته بۆ رۆژا هه‌لبژارتنان...ن مخابن هێژ هنده‌ك ئه‌قله‌ییه‌ت و مه‌لاقفرۆش هه‌نه و دڤێن بشێوه‌كێ ڤه‌بر دیتن و بۆچونێن خۆ بسه‌پینن و ره‌ها و كۆرانه حوكم و بریاران بده‌ن، بێی رێزێ ل بیروبۆچونێن لایه‌ن و كه‌سێن به‌رامبه‌ر بگرن، تاكو بێرێزی دگه‌هیته رادده‌یا برینداركرنا لیسته و سه‌ركردان، مخابن گه‌نگه‌شه و دانوستاندنێن لایه‌نێن مه ژی جۆره توندییه‌ك د گۆتارێن وان دا هه‌یه، فه‌ره بهێته زانین و تێگه‌هاندن كو ئه‌م هه‌مو خه‌لكێ ڤی وه‌لاتینه، له‌ورا مه مافێ ده‌نگدانێ هه‌یه و به‌ربژێر و كاندید ژی ژ ڤی ملله‌تینه، و پرۆسا هه‌لبژارتنان هه‌ڤڕكییه نه‌ك دوژمنی، جوداهی دناڤبه‌را هه‌ڤڕكی و دوژمنی هه‌ر ناهێته هه‌ڤبه‌ركرن، لێ بدیتنا من ئه‌ڤ جۆره كه‌سه خۆدان كه‌ساتییه‌ك لاواز و كێم ئاگه‌هن و دكاری دا سه‌رنه‌كه‌فتینه، له‌ورا دڤێن داكه‌فتنا خۆ قه‌ره‌بوبكه‌ن و خۆ ب دلسۆز بده‌ن نیاسین و ئه‌ڤه سه‌رێكزێده‌كرنه‌كا ئه‌رزانه، چنكو دلسۆزی ب سه‌ركه‌فتنا هه‌لبژارتنه‌ك ده‌ستپاكه؛ كاندیدێن سه‌ركه‌فتی جهێ متمانه و باوه‌ریا ملله‌تینه و رێزگرتن ل سه‌ركه‌فتییان و قه‌بولكرنا ئه‌نجامان رێزگرتنه ل ده‌نگده‌ران كو ملله‌ته، سه‌ركه‌فتنا برۆسا هه‌لبژارتنان ئاستێ تێگه‌هشتن و شارستانیبونا جڤاكی، و كاریگه‌رییا ئوپۆزۆسیونێ پیڤه‌رێ دیموكراسیبونا ملله‌تی دیاردكه‌ت، ئانكو ئه‌ڤه ئه‌زمونه تێدا ملله‌ت سه‌ردكه‌فیت یان دادكه‌فیت، له‌ورا ئه‌ڤه داخوازییه بۆ وان ئولدارێن ب شریعه‌تی و علمانیێن ب قانونێ نه‌دپێگیر، بلا بكێمی ره‌وشته‌كی كوردینی لده‌ڤ هه‌بیت و نیشانبده‌ن! |
|
|
|