|
|
ژمارەی کۆبونەوەکان
مه‌لا فه‌رمان |
|
13/02/2015 |
بەرلەوەی بچمە ناو باسکردنی بابەتەکەوە، بە باشی دەزانم بۆ پشتیوانی وتارەکەی "کاک نەبەز گۆران" ئاماژە بەو هاوکێشە بیرکاریە بدەم کە بۆ دیاریکردنی ژمارەی ئەم جۆرە کۆبونە بیمانایانە دەتواندرێت بەکار بهێندرێت:
١- دیاریکردنی جۆرەکانی میوە، چەند جۆرە: سێو، پورتەقاڵ، کیڤی، مۆز ...تاد. لەهەر جۆرێک چەند کیلۆ کڕدراوە. دەکرێت ژمارەی هەمو بوتڵە ئاوەکانیش بەکاربهێندرێت.
٢- بۆ هەر کۆبونەوەیەک چەند کیلۆ کڕدراوە، نەک چەند خوراوە.
٣- بڕیار و دەرئەنجامی کۆبونەوەکان = نزیک دەبێتەوە لە سفر (ئەم خاڵە دیار و ئاشکرایە و هاوڵاتیان لەهەمو کەس باشتری ئەزانن).
٤- پاڵپشت بەم زانیارانەی سەرەوە دەتوانرێت بە یەکێ لەم دو رێگایە ژمارەی کۆبونەوەکان بزاندرێت:
بە نزیکراوەیی= ژمارەی کۆبونەوەکان= خاڵی ١/ خاڵی ٢
یان
ژمارەی کۆبونەوەکان= خاڵی ١/ خاڵی ٣= بێ کۆتایی
زۆری کۆبونەوە بۆ:
١- کەمی یان نەبونی متمانە لە نێوان لایەنەکان.
٢- نیەت پیسی و تەڵەکەبازی و شکاندنی ملی یەکتر، یەک لەمانە، هەوڵدانی دابەزاندنی پێگەی لایەنی بەهێز لە ناو جەماوەر بە مەبەستی شکاندنی لە هەڵبژاردنی داهاتو. لێرە هەمان سیاسەتی پیاوە کوێرەکە لە شەڕدا بەکاردەهێندرێت.
٤- مێژوی کۆبونەوە لە کوردستان دەریدەخەن کە لای هەندێ لایەن زۆری کۆبونەوە خوی پێوە گیراوە و بوە بە بەشێک لە کەلتوری حیزبی.
٥- بێ ئیشی و دەست بەتاڵی.
٦- نەبونی توانای بیرکردنەوە و داهێنانی نوێ لای سەرکردایەتی.
٧- زاڵبونی بەهرەی ئەکتەری لای هەندێ کەسی خۆ بەسیاسیزان.
قازانجەکانی زۆری کۆبونەوە
بۆ کات بەسەربردن و بێتاقەتی و خۆپاراستن لە هۆکارەکانی نەخۆشی دەرونی.
زیانەکانی زۆری کۆبونەوە
١- پارە خەرجکردنێکی زۆر لە پێناوی هیچ.
٢- دروستکردنی راڕایی و دڵە راوکێ لای کۆمەڵانی خەڵک.
٣- نەمانی متمانەی خەڵک بە قسە و گوفتەکانی دەسەڵات.
٤- ماندووکردن و سەرلێشێواندنی دەزگاکانی راگەیاندن، کەمکرندەوەی متمانەی خەڵک بە خۆیان و هەواڵەکانیان و زیادکردنی بیزاری گوێگرتن لێیان.
٥- شێواندنی بازاڕ و کڕین و فرۆشتن.
٦- درێژەدان بە گەندەڵی و رۆتین لە دامەزراوە حکومیەکان.
٨ - کەوتنەوەی ناڕەزایی لای ئەندامانی ئەو لایەنەی ئاڵای چاکسازی بەرزکردۆتەوە.
بۆیە، کاتی ئەوەیە شاندی ئەو هێزەی ئاڵای شەفافیەت و چاکسازی هەڵگرتوە و جەماوەر ئۆمێدی پێیەتی پێداگری بکات و هەوڵی جدی بدات بۆ زوو یەکلاییکردنەوەی دەرئەنجامی کۆبونەوەکان و نەبنە شەریک لە بێزاری خەڵک لە بیستنی ئەو هەمو هەواڵە چەند بارەبوانە، بەکورتی ئەگەر لایەنی بەرامبەر جدی نیە لە گفتوگۆکان و دەیەوێ بە هەمان ساڵانی نەوەتەکانی سەدەی رابردو کات بەسەر بەرێ، ئەوا هەقە لە کۆبونەوەکان بکشێنەوە و زۆر راشکاوانە بە جەماوەری کوردستانی رابگەیەنن. چونکە جەماوەر دەڵێ "لەگەڵ بەغدا ئەوە حاڵمانە، داعشیش شەڕمان دەکات، دونیا سەیرمان دەکەن و هەندێکیان هاوکاریمان دەکەن لە ناوخۆش هەر خەریکی ئەو جۆرە کۆبونەوانەن". سلYمانیش شوکور وشیارە و تێدەگات!
لە کۆاتاییدا دەمەوێ بڵێم:
ئەرێ ئەوا هەندێ لە سیاسیەکان راهاتون و سودمەند دەبن لە زۆری ژمارەی کۆبونەوەکان، ئەی میدیاکاران بۆ هێندە ئارەزوی چەند بارەکردنەوەی هەمان هەواڵ و روداو دەکەن و هەمان دەموچاوەکانمان پیشان دەدەنەوە؟ داواتان لێدەکەم بگەڕێنەوە بۆ روماڵکردنی یەکەم کۆبونەوە و لەگەڵ ئەوەندەیەمین کۆبونەوە بەراوردی بکەن. ئەگەر من میدیاکار بومایا و ئەو بەراوردەم بکردایا دورنەبو بیرم لە بایکۆتی روماڵکردنی هەمو ئەو جۆرە کۆبونەوانە بکردایا و تاکی سەر شەقامم بدواندایا.
|
|
|
|