(سبه‌ی):
به‌پێی ئامارێكی ده‌زگای گشتی كاروباری مین، له ماوه‌ی 9مانگی رابردودا له سنوری پارێزگای دهۆك و هه‌ولێر، 11 كه‌س به مین و ته‌قه‌مه‌نی بون قوربانی.
زێبار خالید، له راگه‌یاندنی به‌ڕێوه‌به‌رایه‌تی جێبه‌جێكردنی هه‌ولێر سه‌ر به ده‌زگای گشتی كاروباری مین، به (سبه‌ی) راگه‌یاند: له ماوه‌ی 9 مانگی رابردودا له سنوری پارێزگای هه‌ولێر و دهۆك، به‌هۆی مین و ته‌قه‌مه‌نی جۆراو جۆر 3 كه‌س گیانیان له‌ده‌ستداوه و 8ی تریش برینداربون.
ناوبراو ئه‌وه‌ی رونكرده‌وه كه: زۆربه‌ی ئه‌و كه‌سانه‌ی برینداربون، ئه‌ندامێكی جه‌سته‌یان له ده‌ستداوه.
وتیشی: له‌و 11 قوربانیه، 7یان له سنوری پارێزی هه‌ولێر بوه و 4 یان له سنوری پارێزگای دهۆكه.
هاوكات زێبار باسی له‌وه‌كرد كه: له ناو قوربانیه‌كاندا 2 ژن و 9 پیاو هه‌یه.
كارمه‌نده‌كه‌ی به‌ڕێوه‌به‌رایه‌تی جێبه‌جێكردنی هه‌ولێر، راگه‌یاندنی هۆكاری روداوه‌كانیشی بۆ ده‌ستكاریكردنی مین و ته‌قه‌مه‌نیه‌كان و چڕی گژ و گیا گێڕایه‌وه، كه به‌و هۆیه‌وه مینه‌كان له به‌رچاودا نه‌بون.