|
|
|
یەکخستنەوەی هێزەکانی پێشمەرگە |
|
15/01/2015 15:54:42 |
(سبەی):
کەمتر لە دە رۆژ ماوە بۆ ئەو وادەیەی پەرلەمانی کوردستان دیاریکردبو بۆ یەکخستنەوەی هێزەکانی پێشمەرگە لەچوارچێوەی وەزارەتی پێشمەرگە بەتایبەت یەکەکانی (70 و 80) و هەروەها باشتركردنی گوزه‌رانیان، وتەبێژی ئەو وەزارەتەش دەڵێت: هەوڵەکان چڕکراونەتەوە.
لەئێستادا پرسی یەکخستنەوەو بە دامەزراوەیکردنی هێزەکانی پێشمەرگەی کوردستان، بوەتە خواستێکی نیشتیمانی و نەتەوەیی، هاوڵاتیان و هەرسێ سەرۆکایەتییەکەی هەرێم جەخت لە پێویستی بە نیشتیمانیکردنی هێزی پێشمەرگە دەکەنەوە، بەجۆرێک کە دور بێت لە دەستی حیزب و موڵکی هەموان بێت.
پێشمەرگەو بە نیشتیمانی کردنی
هێزی پێشمەرگەی کوردستان، هێزی سەربازیی هەرێمی کوردستانە و لەژێر دەسەڵاتی حکومەتی هەرێمی کوردستاندایە. بەپێی دەستوری نوێی عێراق هێزێکی دەستورییە و وەک پاسەوانی هەرێم ناسێنراوە.
سەرباری چەند هەوڵێک لە رابردودا بۆ بە دامەزراوەییکردنی ئەم هێزەو بێ ئەنجام بونی، بەڵام لە دوای پێکهێنانی حکومەتی هەشتەمی هەرێم و دەستبەکاربونی خولی چوارەمی پەرلەمانی کوردستان، لەئێستادا رێوشوێن و هەوڵەکان لەو پێناوەدا چڕکراونەتەوەو کۆمەڵێک بڕیارو راسپاردە لەلایەن هەرسێ سەرۆکایەتی هەرێمەوە بەو ئاراستەیە دەرکراون.
بەوتەی بەرپرسانی وەزارەتی پێشمەرگە، ژماره‌ی هێزه‌كانی پێشمه‌رگه ده‌گاته 150 هه‌زار كه‌س، کە ئێستادا بە هەماهەنگی لەگەڵ هێزەکانی ئاسایش و ناوخۆی هەرێم بە درێژایی دەیان کیلۆمەتر لە شەڕدان دژی داعش.
دوابەدوای سەرهەڵدانی رێکخراوی داعش و پەلاماردانی خاکی کوردستان، لەهەمو کات زیاتر پێویستی بە دامەزراوەییکردنی هێزەکانی پێشمەرگەو یەکخستنەوەیان رونبویەوە، بەجۆرێک موڵكی سه‌رجه‌م خه‌ڵكی كوردستان و سه‌رجه‌م حیزبه‌كان بێت.
وەک فەرماندە سەربازییەکانیش ئاماژەی بۆ دەکەن یەکنەخستنەوەی هێزەکانی پێشمەرگە زیانی لێکەوتوەتەوە، مستەفا چاوڕەش، ئەندامی سەرکردایەتی یەکێتی و یەکێک لە فەرماندە سەربازییەکان دەڵێت: "ئه‌و كێشمه كێشه‌ی له‌به‌ره‌كانی شه‌ڕ له‌نێوان پارتی و یه‌كێتیدا هه‌بوه، زیانی هه‌بوه".
له‌دوا كۆبونه‌وه‌ی ساڵی 2014ی ئه‌نجومه‌نی وه‌زیرانیشدا، نێچیرڤان بارزانی سه‌رۆكی حكومه‌تی هه‌رێم ئاماژەی بەوەکرد، نه‌بونی هێزێكی دامه‌زراوه‌یی و دواكه‌وتنی پرۆسه‌ی به‌نیشتمانیكردنی پێشمه‌رگه‌و رێكخستنی له‌چوارچێوه‌ی هێزێكی دامه‌زراوه‌یی نیشتمانی سه‌ر به وه‌زاره‌تی پێشمه‌رگه دیارترین كێشه‌و كه‌موكوڕییه‌كانه.
مەحمود حاجی عومەر، ئەندامی لیژنه‌ى كاروبارى پێشمه‌رگه له په‌رله‌مانی كوردستان بۆ (سبەی) رونیکردەوە، یەکنەخستن و بە دامەزراوەیی نەکردنی هێزەکانی پێشمەرگە لە بەرەکانی شەڕ زیانی بەرچاوی لێکەوتوەتەوە، بەجۆرێک ئەوەی لەمدواییە لە هەندێک لە میحوەرەکان رویاندا، بەڵگەن لەسەر زیانەکان.
بڕیارەکانی پەرلەمان
پەرلەمانی کوردستان لە دانیشتنی ئاسایی ژمارە (18)ی (23/7/2014)دا، لە پێناو باشتر كردنی ژیان و گوزەران و دابینكردنی پێداویستیەكانیان، دو بڕیاری لەبارەی ژیان و گوزەرانی پێشمەرگە و هێزەکانی ناوخۆی دەرکردو بەئیمزای سەرۆکی پەرلەمان رەوانەی سەرۆکایەتی هەرێمی کران، دواتریش مەسعود بارزانی لەرۆژی (25)ی ئابدا بڕیارەکانی واژۆ کرد.
بڕیارەکەی تایبەت بە پێشمەرگە، (21) خاڵی گرنگی لەخۆگرتوە، لەوانەش پێویستە وەزارەتی پێشمەرگە یەکەم وەزارەت بێت موچە وەربگرن، لەگەڵ سەرفکردنی دەرماڵەی مەترسی بۆ هێزی پێشمەرگە، لە خاڵی چوارەمیشدا، دەڵێت: پێویستە هەمو هێزەكانی پێشمەرگە لە ماوەی شەش مانگ لە دەرچونی ئەم بڕیارەوە لە چوارچێوەی وەزارەتی پێشمەرگەدا وەك هێزێكی نیشتیمانی یەك بخرێت، بەتایبەتی یەكەكانی (70 و 80).
جگەلەوەش، دابینکردنی خواردنی تەندروست بۆ هێزەکانی پێشمەرگە، پێویستە حکومەتی هەرێم ئەرکی چارەسەری بریندارەکان لە ئەستۆ بگرێت، پێویستە هەمو ئەو چەک و ئامێرە سەبازییانەی کەوتونەتە دەست هێزە جیاجیاکان بگەڕێنرێنەوە بۆ وەزارەتی پێشمەرگە، لەگەڵ چەند خاڵێکی تردا، پەرلەمانیش رونیکردوەتەوە، لە پێناو باشتركردنی ژیان و گوزەرانی هێزی پێشمەرگەو رێكخستنی كاروبارەكان و دابینكردنی پێداویستیەكانیان، ئەم بڕیارەیان دەرکردوە.
بەپێی راپۆرتێکی رۆژنامەی هاوڵاتی، ته‌نها 40 هه‌زار پێشمه‌رگه له‌ژێر ده‌ستی وه‌زاره‌تی پێشمه‌رگه‌دان كه به‌شێكی زۆری ئه‌وانیش سه‌ر به هێزه‌كانی 70 و 80ی یه‌كێتی و پارتین، سه‌ڕه‌رای ئه‌وه‌ی چه‌ندین هێزی تر هه‌ن، به ناوه‌كانی زێره‌ڤانی و گوڵان و دژه‌تیرۆر، كه له حیزبه‌كانه‌وه فه‌رمان وه‌رده‌گرن.
ئێستاش کەمتر لە (10) رۆژ ماوە بۆ ئەو وادەیەی پەرلەمان دیاریکردبو، بە مەبەستی یەکخستنەوەی هێزەکانی پێشمەرگەو هەوڵەکانیش بەردەوامن. هەڵگورد حیکمەت، بەڕێوەبەری رۆشنبیری و راگەیاندنی وەزارەتی پێشمەرگە بە (سبەی) وت: لەئێستادا بە کرداری هەوڵەکان چڕکراونەتەوە بۆ یەکخستنەوەی هێزەکانی پێشمەرگەو لە ئایندەیەکی نزیکدا ئەنجامەکان بەدیار دەکەون.
نامەکەی بارزانی بۆ وەزارەتی پێشمەرگە
لەبەرئەوەی کە وەزارەتی پێشمەرگە وەزارەتێکی گرنگە و ئەرکێکی قورس و پیرۆزی لەسەرشانە، بۆیە وەزارەتی هەمو گەلی کوردستانە. ئێستاش کە حکومەتی هەرێمی کوردستان، حکومەتێکی بنکەفراوانە، نەک پەنجا بە پەنجای نێوان دو حیزب، کەواتە دەبێ رەفتاری کارمەندانی وەزارەت رەفتارێکی نەتەوەیی بێت نەک حزبی.
نامەکە لەحەوت خاڵدا هەنگاوەکانی بۆ ئەو مەبەستە رونکردوەتەوەو داوای کردوە، "زۆر بەوردی رەچاو بکرێت"، کە پێکهاتون لە:
1. بەهیچ جۆرێک کاری رێکخستن و حیزبایەتی لەناو وەزارەت ناکرێت و ئەو کەسەی بیەوێت لەناو وەزارەت حیزبایەتی بکات با دەست لەکاربکێشێتەوە و بگەڕێتەوە بۆ لای حیزبەکەی خۆی.
2. دابەشکردنی چەک و تەقەمەنی بەپێی پێویستیی بەرەکانی جەنگ دەبێت، نەک لەسەر بنەمای پەنجا بە پەنجای حیزبی.
3. بودجەی هەمو هێزەکانی پێشمەرگە، بە لیواکانی وەزارەت و هەردو یەکەی ٧٠ و٨٠ شەوە، دەبێ لەلایەن وەزارەتی پێشمەرگەوە دابەش بکرێت، نەک بە شێوازی پێشو.
4. پێویستە هەرچی زوتر هێزی پێشمەرگەی کوردستان بە رێکوپێکی یەکبخرێتەوە. بە شێوەیەک کە نابێ حیزبایەتی تێدا بێت.
5. گۆڕانکاری لەو فەرماندەییانە بکرێت کە لە شەڕی دژی تیرۆریستاندا نەیانتوانیوە ئەرکی خۆیان بە باشی جێبەجێ بکەن و فەرماندەی تر کە چالاک بون لە جێگەیان دابندرێن.
6. هەر کارمەندێک، لە هەر ئاست و پۆستێکدا بێت، راپۆرت لەسەر رەوشی وەزارەت بداتە هەر حیزبێک، سزا دەدرێت و دەدرێتە دادگای سەربازی.
7. هەر هێزێک لە دەرەوەی وەزارەت هەبێت بە نایاسایی دەژمێردرێت و کەس بۆی نییە هێزی تازە لە دەرەوەی وەزارەت دروست بکات.
دوای ئەو نامەیەش، مەلا بەختیار، لێپرسراوی دەستەی کارگێڕی مەکتەبی سیاسیی یەکێتیی نیشتمانیی کوردستان، وتی: "هیچ کەسێک و حکومەتێک و وەزارەتێک، ناتوانێت تاک لایەنانە بڕیار بدات" جەختیشی کردەوە، جگه له پڕۆژه‌ی هاوبه‌ش له‌گه‌ڵ پارتی، یه‌كێتی نیشتیمانی بڕیاری یه‌كلایه‌نه بۆ یه‌كخستنه‌وه‌ی هێزی پێشمه‌رگه په‌سه‌ند ناكات، ئه‌وه‌ش بڕیاری مه‌كته‌بی سیاسی یه‌كێتییه.
دواتریش سەرۆکایەتی هەرێم هۆشداریدا لەهەر هەوڵێک بۆ دانانی کۆسپ لەبەردەم پرۆسەی یەکخستنەوەی هێزەکانی پێشمەرگەو رایگەیاند: "ئەگەر كەسێك بیەوێت كۆسپ لەبەردەم پڕۆسەیەكی وا بایەخداری نیشتیمانیدا دروست بكات، دەبێ خۆی تەحەمولی بەرپرسیارێتی بكات".
پەیامەکە بەناوی سەرۆکایەتی هەرێمەوە بڵاوکرایەوەو وەک وەڵامێک بۆ لێدوانەکانی مەلا بەختیار لەقەڵەمدراو ئەوەشی تێدا هاتبو: "ئەو بابەتە لە ئەنجامی راوێژی نێوان بارزانی و مام جەلال و سەركردایەتیی پارتی و یەكێتی هاتوەتە ئاراوە و پێشتر بە تێروتەسەلی قسەی لەبارەیەوە كراوە و پێویست ناكات پرس بە كەس بكرێت" هەروەک دەڵێت: ئەگەر بۆچونێكیش لەناو هەر لایەنێك هەبێت كە دژی پرۆسەكە بێت ئەوە دژی خواست و بەرژەوەندییەكانی گەلی كوردستانە".
لە راگەیەندراوێکیشدا، فراکسیۆنەکانی گۆڕان و کۆمەڵ و یەکگرتو لە پەرلەمانی کوردستان پشتگیری نامەکەی مەسعود بارزانی بۆ وەزارەتی پێشمەرگە دەکەن سەبارەت بەرێکخستنەوەو دروستکردنی هێزی نیشتیمانی و قەدەغەکردنی حیزبایەتی لەناو هێزی پیشمەرگەدا.
هەرسێ فراکسیۆن ئاماژەیان بەوەکردوە، نامەکەی بارزانی هاوئاهەنگە لەگەڵ یاسا و بڕیارەکانی پەرلەمانی کوردستان و خزمەتی تۆکمەبونی هێزەکانی پێشمەرگە دەکات.
پرۆسەکە و رێگری
هەرچەندە یەکخستنەوەی هێزەکانی پێشمەرگە دەستیپێکردوەو ژمارەیەک لیوای سەربازی هاوبەش لە چەکداری حیزبەکان دروستکراون، بەڵام هه‌تا ئێستا یەکێتی و پارتی و بەرپرسەکانیان خاوەنی هێزی چەکداری تایبەت بەخۆیانن و ئەو هێزانە موچە لە وەزارەتی پێشمەرگە و فەرمان لەحیزبەوە وەردەگرن.
بەپێی زانیارییەکانی (سبەی)، پرۆسه‌ی به‌نیشتمانیكردن و رێكخستنه‌وه‌ی هێزی پێشمه‌رگه به چه‌ند قۆناغێك ده‌بێت، له‌قۆناغی یه‌كه‌میشدا واده‌یه‌ك داده‌نرێت و هێزه‌كانی 70 و 80 له‌ڕوی ئیداری و دارایی و ژماره‌وه رێكده‌خرێنه‌وه‌و ده‌خرێنه سه‌ر وه‌زاره‌تی پێشمه‌رگه و ئه‌رك و مافه‌كانیان دیاریده‌كرێت.
لەئێستادا دابه‌شبونی هێزه‌كانی پێشمه‌رگه به‌سه‌ر هه‌ردو یه‌كه‌ی 70 و 80 به‌مشێوه‌یه‌یه: هێزه‌كانی (70)ی یه‌كێتی: فه‌رمانده‌یی گشتیی هێزی پێشمه‌رگه‌ی كوردستان، فه‌رمانده‌یی هێزه‌كانی 70ی یه‌كێتی، هێزی پشتیوانیی دوی یه‌كێتی، هێزی سكرتاریه‌تی گشتی، پاسه‌وانی فه‌وجی تایبه‌ت.
هێزه‌كانی (80)ی پارتی: فه‌رمانده‌یی له‌شكری هێزی پێشمه‌رگه‌ی كوردستان، فه‌رمانده‌یی هێزه‌كانی 80ی پارتی، هێزی پشتیوانیی یه‌كی پارتی، لیوای سه‌رۆكی هه‌رێمی كوردستان، پاسه‌وانی فه‌وجی تایبه‌ت.
مەحمود حاجی عومەر بۆ (سبەی) رونیکردەوە، کە یەکخستنەوەی هێزەکانی پێشمەرگە زەرورەتێکی ژیانیە بۆ ئەوەی سوپایەکی یەکگرتوی کوردستانی هەبێت و ئاسایشی نەتەوەییمان پارێزراو بێت و وتی: بۆ ئەوەش دو کۆڵەکەی بنەڕەتی پێویستە، یەکەمیان توانای مرۆییە بە مەشق و راهێنانی سەربازییەوە، دوەمیشیان توانای مادییە بۆ پشتیوانی لۆجستی و پڕچەککردنیان، ئێستاش بەهۆی نەبونی ئەم پێکهاتەیە کەموکوڕییەکان لەبەرەکانی جەنگ دەبینین.
لای خۆشیەوە ئاری هەرسین، سەرۆكی لیژنەی کاروباری پێشمەرگە لە پەرلەمانی كوردستان رایگەیاند: رێگریەکان لە یەكگرتنەوەی هەردو یەكەی (70) و (80) پەیوەندی بە رابردوەوە هەیە لە دوای ساڵی 1991ەوە، ئەویش مەسەلەی دو ئیدارەیی و براكوژییە، ئەگینا هەرسێ سەرۆكایەتییەكە كۆكن لەگەڵ ئەوەی یەكەكانی 70 و 80 یەكبگرێتەوە و وەزارەتی پێشمەرگە بە دامودەزگایی بكرێت.
بەڵام دەپرسێت، "ماقوڵە سێ سەرۆكایەتیی كە ئەم وڵاتە بەڕێوە دەبەن، هەرسێكی كۆك بن لەسەر ئەوەی یەكەی 70 و 80 یەكبگرێتەوە، كەچی لەولاوە كوتلەیەكی حیزبی یەكێك لەم حیزبەو یەكێك لەم حیزبە هەستێتە سەر پێ و حەزی لێبێت رێگری لێبكات" لە وەڵامی ئەو کەسانەشدا دەڵێت: ئەوانەی رێگری دەكەن لە یەكگرتنەوەی 70 و 80 حەزیان لە دەوڵەتی كوردی نییە، حیساب بۆ رێككەوتنەكەی كابینەی هەشتەم ناكەن، كە لە نێوان پێنج حیزبی سیاسی دروست بوە".
ئاشکراشی دەکات، "بودجەی یەكەی حەفتاو هەشتا لە بودجەی وەزارەتی پێشمەرگە زیاترە".
فەرماندە سەربازییەکان چی دەڵێن؟
هێزەکانی پێشمەرگەو فەرماندە سەربازییەکان جەخت لەسەر پێویستی و گرنگی بە نیشتیمانیکردنی هێزەکانی پێشمەرگە دەکەنەوە، بە تایبەت لەم دۆخەدا کە هێزەکانی پێشمەرگە بۆ پاراستنی خاکی کوردستان بە درێژایی سەدان کیلۆمەتر لە روبەڕوبونەوەدان لەگەڵ چەکدارانی داعش.
جه‌عفه‌ر شێخ مسته‌فا، به‌رپرسی هێزه‌كانی (70)ی یه‌كێتی نیشتیمانی كوردستان پشتگیریی له یه‌كخستنه‌وه‌ی هێزی پێشمه‌رگه دەکات و ئەوەش دەخاتەڕو، مام جه‌لال‌و مه‌كته‌بی سیاسیی یه‌كێتی بڕیاری یه‌كخستنه‌وه‌ی هێزی پێشمه‌رگه‌یان داوه، وتیشی: ئێمه په‌رله‌مان‌و حكومه‌ت‌و سه‌رۆكایه‌تی هه‌رێممان هه‌یه، له‌به‌رئه‌وه نابێت هیچ شتێك له‌ده‌ره‌وه‌ی یاسا‌و نیزام بێت.
ناوبراو کە پێشتر وەزیری پێشمەرگە بو، وەک وەڵامێکیش بۆ ئەوانەی کە دژایەتی یەکخستنەوەی هێزی پێشمەرگە دەکەن، دەڵێت: "ئەوەی دژی یەکگرتنەوەی هێزی پێشمەرگە بێت، ئەوا دژی بڕیارەکانی سکرتێری گشتی یەکێتییە، بۆیە قابیلی قبوڵ نیه‌‌و كه‌سیش گوێی لێناگرێت" هەروەک وتی: "تائێستا هیچ كه‌سێك له‌مه‌كته‌بی سیاسی و سه‌ركردایه‌تیی حیزبه‌كه‌ی دژی ئه‌وه نه‌بون پێشمه‌رگه یه‌كبگرێته‌وه، خۆ ئه‌گه‌ر یه‌كێكیش باسی ئه‌وه بكات، ئه‌وا قسه‌ی خۆی له‌به‌رد ده‌دات و له‌به‌لاشیش قسه ده‌كات و له نه‌زانین و تێنه‌گه‌یشتنه‌وه‌یه".
لەو بڕوایەشدایە، کە خەڵکانێک هێزی پێشمەرگە بە کۆمپانیا دەزانن بۆ پاراستنی دەسەڵات و بەرژەوەندی خۆیان، بەڵام وتی: "ئەوە نە خەڵک قبوڵی دەکات و نە قابیلی قبوڵە".
بەپێی راپۆرتێکی رادیۆی ده‌نگی ئه‌مەریكا، بە دامەزراوەیکردن و یەکخستنی هێزەکانی پێشمەرگەو دەرهێنانیان لەژێر کۆنتڕۆڵی حیزب تەنها لە چوارچێوەی خواستی شەقامی کوردیدا نەماوەتەوە، بەڵکو وڵاتانی نێودەوڵەتیش بە تایبەت ئەو وڵاتانەی بە دۆستی کورد دادەنرێن، هەمان داواکاریان لە سەرکردایەتی کورد هەیە.
لەوبارەیەوە سەفین مەلا قەرە هەڵسوڕاوی بزوتنەوەی گۆڕان، رایگەیاندوه، تا کۆتایی دونیا ئەمه‌ریکا‌و هاوپەیمانان بەرگری لە کورد ناکەن، بەڵکو دەبێت کورد هێزە چەکدارەکانی یەکبخاتەوە و لە بەرامبەر هەڕەشە نێودەوڵەتیـیەکان پشت بەخۆی ببەستێت.
هاوکات مسته‌فا چاوه‌ڕه‌ش، لێپرسراوی مه‌ڵبه‌ندی رێكخستنی پێشمه‌رگه‌ی یه‌كێتی، وێڕای پشتگیری بۆ یەکخستنەوەی هێزەکانی پێشمەرگە، وتیشی: "ئێمه مه‌بده‌ئیه‌ن له‌گه‌ڵ یه‌كخستنه‌وه‌ی هێزی پێشمه‌رگه‌داین، ئێمه له(2007)ه‌وه كارمان بۆ ئه‌وه كردوه له‌گه‌ڵ برایانی پارتی".
"هه‌تا هێزی پێشمەرگە لەژێر کۆنترۆڵی حیزبدا بێت میللەتی کورد لە ئازار و ناخۆشی رزگاری نابێت" ئەمە وتەی حامیدی حاجی غالی، ئەندامی سەرکردایەتی و فەرماندەی سەربازی یەکێتیە، باسی لەوەشکرد، یەکخستنەوە و بەنیزامیکردنی هێزی پێشمەرگە هەنگاوێکی گرنگە، بەڵام دەبێت مەسعود بارزانی سەرەتا لە بەنیزامیکردنی هێزەکانی پارتیەوە دەستپێبکات و جیاوازی نەکات.
بەڵام ئەندامەکەی لیژنەی کاروباری پێشمەرگە سەرسوڕمانی خۆشی پیشان دەدات لەوەی سەرکردە سیاسییەکان و ئەو بەرپرسانەی کە حیزبەکانیان خاوەن هێزی سەربازین، باس لە پەرۆشی بۆ یەکخستنەوەی هێزەکانی پێشمەرگە دەدەن، کەچی لە پراکتیکدا بەوشێوەیە نیەو دەپرسێت ئەگەر ئیرادە هەیە بۆ یەکناگرنەوە؟ ئەمەشی گەڕاندەوە بۆ "نەبونی متمانە، لە ئەنجامی ئەو ئێسقانەی لە رابردودا لە شەڕی ناوخۆدا لەنێوان ئەم هێزە کوردییانەدا شکێنراوە، بۆیە پێویستە هەرچی زوە ئەم متمانەیە دروستبکرێت و بڕیاری سیاسی هەبێ بۆ یەکگرتنەوەی هێزەکان".
هەروەک دەڵێت: پێویستە ئیرادەیەک هەبێت بۆ هەرچی زوی یەکخستنەوەی هێزەکانی پێشمەرگەو بە نیشتیمانی کردنی، بەوەش رەنگدانەوەی ئەرێنی بۆ دەرەوەو پشتیوانییەکانیش لە پێشمەرگە زیاتر دەبێت.
زیادكردنی موچه‌ى پێشمه‌رگه
بڕیاره‌كه‌ی په‌رله‌مانی کوردستان بۆ زیادكردنی موچەی هێزەکانی پێشمەرگە لەرۆژنامه‌ی وه‌قایعی كوردستان بڵاوبوه‌ته‌وه، لەوبارەیەوە مەحمود حاجی عومەر دەڵێت: ئەو بڕیارە له 1-8-2014 ەوه ده‌بێ حساب بكرێت و پێویسته وه‌زیری پێشمه‌رگه‌ش پێداگری له‌سه‌ر ئه‌وه بكات.
هۆكاری جێبه‌جێنه‌كردنی بڕیاره‌كه‌شی بۆ ئه‌وه گه‌ڕانده‌وه، قه‌یرانی دارایی هه‌بوه له‌هه‌رێم و وتی: "پێویسته له‌مه‌ودوا كه رێکكه‌وتننامه‌كه‌ی هه‌ولێر و به‌غدا ده‌كه‌وێته بواری جێبه‌جێكردنه‌وه، حكومه‌ت ئه‌و بڕیاره جێبه‌جێ بكات".
به‌ڕێوه‌به‌ری گشتی راگه‌یاندن‌و هۆشیاری له وه‌زاره‌تی پێشمه‌رگه‌ش بۆ (سبەی) ئاماژەی بەوەکرد، کە ئه‌و بڕیاره وابه‌سته‌یه به بودجه‌و ئه‌و گیروگرفتانه‌ی كه بودجه هه‌یه‌تی، بڕیاروایه ئه‌گه‌ر بودجه ئاسایی بویه‌وه ئه‌و بڕیاره‌ش جێبه‌جێبكرێت.
هەر لەسەر هەمان بابەت، سه‌رچاوه‌یه‌ك له وه‌زاره‌تی دارایی كه نه‌یویست ناوی بڵاوبكرێته‌وه، بە (سبەی) وت: "زیادكردنه‌كه په‌یوه‌ندی به بودجه‌وه هه‌یه‌و هه‌ركات بودجه به‌رده‌ست بو، بڕیاره‌كه جێبه‌جێ ده‌كرێت" به‌بێ ئه‌وه‌ی كاتی جێبه‌جێكردنه‌كه دیاریبكات. |
|
|
|