بەرپرسیاریەتی و چەند پرسیارێک
پارتی لە 7/3 یەکەمین براوەی گەمەی هەڵبژاردن دەرچو. لە ئاکامی تێکچونی هاوسەنگی هاوپەیمانی نێوان پارتی و یەکێتی و چەسپاندنی رۆڵی گۆڕان وەک بزوتنەوەیەکی نەتەوەیی لە ژیانی سیاسی هەرێم و عێراقدا و گەشەکردنی هێزی ئۆپۆزسیۆنی بزوتنەوە ئیسلامیەکان، چاوەڕوان دەکرا سیمای شەراکەت و تەوافوقی کوردی لە هەرێم وەک خۆی نەمێنێتەوە. راستیەکی حاشاهەڵنەگر زەمینەی ئەم چاوەڕوانیەی خۆشکردبو، ئەویش دەسەڵات و هێزی گەورە بەرپرسیاریەتی گەورەی لێدەکەوێتەوە. پارتی کلیلەکانی دەسەڵاتە فەرمیەکانی هەرێمی لەگیرفاندایە و بەتەنیا لە پارلەمانی عێراق زیاتر لەنیوەی کورسیەکانی کوتلەی کوردی بەدەستهێناوە. ئەم بەرپرسیاریەتیەی کەبەرادەی سەرەکی کەوتۆتە ئەستۆی پارتی دو لایەنەیە: لایەنێکی بەرچاو زادەی چەمکەکانی حوکمڕانی و یاسا و ئابوری و رێککەوتنمای شەراکەتە و لایەنێکی شاردراوە زادەی سەرجەم چەمکەکانی مێژویی و کۆمەڵایەتی و حیزبی دەسەڵاتدارانە.

ئایا پارتی توانی لەدوا ئەزمونی ناڕەزایی و هەڵچونی جەماوەر و شەقامی کوردی دژ بە تێرۆکردنی جوانەمەرگ کاک سەردەشت ئەو دو لایەنەی پێکهاتەی عەقڵیەتی بە شێوازێکی عەقڵانی و گونجاو لەگەڵ ئەم سەردەمەدا بیانخاتەگەڕ؟ یا وەک حیزبێکی نەتەوەیی بەهێز و کاریگەری چەمکە کلاسیکیەکانی ناوەڕاستی سەدەی پێشو تواناکانی خستەگەڕ و خواستەکانی بەیانکرد و بۆ نەریت و خەسڵەتە بەسەرچوەکانی مێژو گەڕایەوە؟ بەواتایەکی تر ئایا پارتی لەئاستی ئەو بەرپرسیاریەتە گەورەیەدایە؟.

دەیان ساڵە روخساری بزاڤی کوردایەتی لەلایەن دوهێزی موحافیزکاری تۆکمە و چەپی نەتەوەیی پەرتەوازەوە دیاریکراوە. ئەم دو هێزە کەتا سەرئێسک بەخوێنی سەری یەکتر تینوبون ولە قۆناغەکانی خەبات دژ بە دوژمن و داگیرکەران، لەسەردەمەکانی پەرتەوازەبون و پاشکۆیەتیان بۆ ئەم داگیرکەر و ئەو دوژمنی کورد، لە قۆناغەکانی شەرکردنی یەکتر و ماڵوێرانی کورد، لەدوا قۆناغی سەپاندنی سیستەمی شەراکەت و دابەشکردن، دەسەڵاتدار بون و بەو شێواز و مەزاج و بەرژوەندیانەی خۆیان سەرجەم جومگەکانی بزاڤەکە و حوکمڕانیان پاوان کردوە و بەرێوەیان بردون. شیانی سەرسوڕمان و تێرامینە کە دەسەڵاتدارانی ئەم دو هێزە بەدرێژایی ئەو قۆناغانەی مێژویان، لەگەڵ ئەوەشدا شەڕی خوێناوی یەکتریان بەرپاکردوە و بۆ سڕینەوەی یەکتر بێ سڵەمینەوە هیچ درێغیکیان نەکردوە، کەچی وەک دو روی یەک دراو بۆبەها و قورساییان و کار و پلانەکانیان تەواوکەری یەکتربون و زۆرباش لە مێشک و زمانی یەکتر گەیشتون. زەمینەی فیکری و سیاسی جیاوازیەکانی هەنوکەی نێوانیان زۆر کاڵبۆتەوە و ئەوەشی بەرچاوە جیاوازی قەبارەی بەرژەوەندیە تایبەتی و حیزبی و دەسەڵاتەکانیانە. لەگەڵ ئەمانەشدا ماوەی چەند ساڵێکە میانرەوی و عەقڵانیەت و هێمنی بەبەشێک لە کار و رەفتاری دەسەڵاتدارانی پارتیەوە بەدیدەکران و خەڵکیش بەخۆشیەوە ئەمەی هەڵدەسەنگاند، بەتایبەت سەرۆکی هەرێم دوای سەرهەڵدانی قەیرانی نانبڕاوەکانی گۆڕان و تۆقاندنی گۆڕانکاران، ئەگەر لەروانگای تاکتیشیەوە بێت، هێمن و حەکیمانەتر لە رەفتاری توندرەوی دەسەڵاتدارانی یەکێتی مامەڵەی لەگەڵ دۆسیەکەدا کرد. هەروەها رۆڵی بەرێزی دوای 7/3 بۆ کۆکردنەوەی لیستە کوردیەکان لە یەک ئیتلافی نەتەوەییدا شیانی ئومێد و دڵخۆشی و رەزامەندی خەڵک بو.

هەرچەندە لەم سەردەمەدا چاوی دنیا و میللەت لەسەر دەسەڵاتدارانە و ساڵانێکە شەریکی سیاسی و ئابوری یەکترن، وەلێ سەرجەم چەمکەکانی تری دەسەڵات، وەک سەروەری یاسا و دادپەروەری کۆمەڵایەتی و شەفافیەت و ئازادی و....تاد، بونەتە گیرۆدەی دیماگۆگی سیاسی دەسەڵاتداران و لەداوی فکریاندا تەراتێن دەکەن. لە ساتەکانی قەیران و تەنگ هەڵچنین پێیان ئەم بەرگە شانۆگەری سیاسیە لەجەستەیان فرێدەدەن و بەجیا و بەجوتە دەبنەوە بەو مەخلوقە ناسراوانەی دەیان ساڵی مێژویان. ئەم دیمۆگاگی و شیزۆفرینا سیاسیە سواو و بێتامانە بونەتە خەسڵەتە رەسەنەکانی عەقلیەتی دەسەڵاتی سیاسی کورد و هۆکارێکی سەرەکی نائارامی سیاسی و کۆمەڵایەتی کوردستانن.

خەتای میللەتە یا...
گەلێک هۆکار دەرفەتیان بۆ دەسەڵات لەبارکردبو تا بتوانێت بەو ئاراستانەدا لەگەڵ میللەت رەفتاربکات و بە نیازیشە بەم شێوازە خشکەییە تا رۆژی حەشر بەهەمان تاس و حەمام بەردەوام بێت.

لەکاتی داگیرکردنی هەولێر لە ساڵی 1996 لەلایەن هێزەکانی سەدامەوە، بێل کلنتون، سەرۆکی ئەو سەردەمەی ئەمریکا، لە دانیشتنێکی نافەرمیدا وتبوی: لە ئاکامی ئەم روداوە دەردەکەوێت کەپێکهاتە نەتەوەییەکانی کوردەکان لاوازن. لەدرێژەی قسەکەیدا رونیکردبوەوە: هێزێکی گەورەی کوردی داوای هاریکاری سەدامی بۆ گرتنی پایتەختی هەرێمەکەیان کردوە، کەچی خەڵکی چەپڵە بۆ ئەو هێزە لێدەدەن. ئەم بۆچون و هەڵسەنگاندە وردە لە 14 ساڵی رابوردودا لەسایەی دەسەڵاتدارانی کوردستانەوە بەردەوام قوڵتر و بەپێزتر کراوەتەوە.
 
تاکی کورد لەئاکامی ئەم دۆخە درێژ تەمەنەدا نائومێد و چەواشە بوە. سەرجەم هەڵبژاردنەکان، بەتایبەت دوا هەڵبژاردن، دەیسەلمێنن کە بەشێکی زۆری میللەت لەداوی قۆرخکردن و ناچاری و ململانێی ناوخۆ و حیزبایەتی و رابەرایەتی و گەندەڵی و دیماگۆگی سیاسیدا پەنگدەخواتەوە و دەستی بە کڵاوەکەی خۆیەوە گرتوە تا رەشەبای ئەو دیاردانە نەیبات و بۆتە پاشکۆیەکی حیزبی، بۆ رازیکردنی دەسەڵاتیش دەنگی پێدەدەن تا ئاورێکیان لێبداتەوە و بەپارە و بەخشین بچێک لە داخوازیەکانیان بێنێتەدی و خۆشیان لە ستەم و شاڵاوی دەسەڵات و حیزب و دەزگا تایبەتیەکانیان بپارێزن.
 
خه‌تای دەسەڵاتە؟
کەسێکی دڵسۆز هەیە بتوانێت وەڵامێکی لۆژیکی یەکلاییکەرەوە بدات لەمەر راستیەکی ئێجگار تاڵ، کە لەدوا هەڵبژاردندا کوردەکانی ناوچەیەکی دابراو، کە تائێستاش جەستەی بە زامەکانی سەدام و بەعس تەنراوە، دەنگی زیاتریان بە کاندیدێکی هاوپەیمانی کوردستان کە کۆنە بەعسیەکی هاروهاج بوە داوە لەوەی بە تێکۆشەرێکی بێگەردی دڵسۆزی خەڵکی هەمان ناوچەی بدەن و کردویانە بە نوێنەرێکی خۆیان لە بەغدا. ئەم جۆرە دیاردە قێزەوەن و ناشرینانە نەک تەنها مایەی شەرمەزارین، وەلێ سوکایەتیکردنێکی قەسدداری بەها پیرۆزەکانی کوردایەتیە و لە بەرهەمەکانی ئیبداعی عەقڵیەتی سیاسی دەسەڵاتدارانی کوردن و رەنگدانەوەی بۆچون و هەڵسەنگاندنیانە بۆ دیموکراسیەت و خۆشەکردن و دەستەمۆکردنی تاکی کورد. لەهەموی هەراسانکەرتر و شەرمەزارتر دەسەڵات بە شانۆگەری و میلۆدیای دەهۆڵی دیموکراسیەت نمایشی ئەم ئیبداعە نایابەیان دەکەن و دەیچڕنەوە.

کاڵکردنەوە و تەنانەت سڕینەوەی سنورەکانی نێوان خۆشەویستی و ئەمەک بۆ خاک و میللەت لەگەڵ خیانەتکردن و سیخوری بۆ دوژمن گەیشتۆتە ئاستێک کە تەنانەت لە خولی پێشوی پارلەمانی کوردستانیشدا خۆی سەپاندبو و رەنگدانەوەی توندو رەوای لەناو ئەو پارلەمانەدا بەرپاکرد. دەبێت دەسەڵاتێکی نەتەوەیی سەرقاڵی زەمەنیکی درێژ لە خەباتکردنی نەتەوەیی چ کاری بەم خۆفرۆش و کۆنە سیخور و تاوانبار و خائینانەی خاک و میللەت بێت؟ لێبوردنی گشتی لە خۆفرۆش و خائین ئەوە ناگەیەنێت بیانکەن بە نوێنەرانی میللەت.

شیانی تێرامینە کە دەسەڵاتی کوردی سەرکەوتو نەبوە دانیشتوانی کوردی ناوچە دابراوەکان و ناوچەکانی کارەساتە نەتەوەییەکانی ژێردەسەڵاتی راستەوخۆیان لە هەژاری و کولەمەرگی ژیان قورتاربکەن و سەرکەوتوش نەبوە چارەی بنەرەتی بوارەکانی نەتەوەیی و خزمەتگوزاری و کۆمەڵایەتیان بۆ دارێژن. ئاکام ئەو خەڵکە بەردەوام چاوی لە دەستی بە "بەرەکەتی" دەسەڵاتە و بۆ سادەترین پێداویستیەکانی رۆژانەی ژیانیان رویان لە رەحمەت و شەفاعەتی حیزبەکان و ئەم دەسەڵاتە دەکەن. بەکوردی و کورتی دەستەمۆ و گوێرایەل کراون.

گۆڕان لە گێژاوی گوێرایەڵی و دەستەمۆکردندا
ئاسەوارەکانی سیاسەتی پشتگوێخستن و دەستەمۆکردنی ئەو ناوچانە لەلایەن دەسەڵاتی حکومەت و سەرۆکایەتی هەرێمەوە لە دەرەنجەماکەنی دوا هەڵبژاردن لەو ناوچانە بەراشکاوی بەرچاون. هێزی هەریەک لە دو حیزبی دەسەڵاتدار سنورەکانی ناوچەکانی سەوز و زەردی دوای 1996ی تێنەپەڕاندوە و بونەتە حیزبی لۆکاڵی لە جوگرافیایەکی سیاسی نەتەوەیی پەرتەوازە و شێواودا. بزوتنەوەی گۆڕان لە ئاکامی ئەم سیاسەتەی دەسەڵات و فرت و فێڵەکانیشی نەیتوانیوە وەک پێویست پێگەیەکی بەهێز لەو ناوچانە بەدەست بهێنێت. لەگەڵ ئەوەشدا کە پەیامی گۆڕان بۆ ئەو ناوچانە راستگۆیانە و بۆ مەودای دور بو و تا کرابێت لەو دیماگۆگیەی دەسەڵات خۆی دورخستۆتەوە، وەلێ پەیامێک بو بەتەواوی لەگوێی خەڵکانی دەستەمۆکرا و پاشکۆی دەسەڵات و هیلاک و برسی و دەربەدەری ئەو ناوچانە نەزرنگایەوە. گۆڕانێک ئۆپۆزسیۆنە و بە گیرفانی بەتاڵ و خاوەنی سەدان نانبڕاو و گەمارۆدراو لەلایەن دەسەڵات و حیزب و مەقامدارەکانەوە لەئێستادا چی پێدەکرێت بۆ دەربەدەر و ئەنفالکرا و هەژارەکانی ئەو ناوچانە؟ کە دەسەڵات فێری کردون دەستیان بۆی پانکەنەوە و بە جورعە ناوبەناو و مەوسمیەکان لەژیاندا بیان هێڵنەوە. دۆخ و گۆڕانکاریەکان و پەیوەندی هاوڵاتی و دەسەڵات لەبەشەکەی تری کوردستان کە کەتۆتە ژێرسایەی حوکمڕانی دەسەڵاتەوە تارادەیەک بوژاندنەوەی ئابوری و کۆمەڵایەتی و رۆشنبیری و سیاسی بەدەستهێناوە زۆر جیاوازترە. هزری گۆڕان هەمیشە لەناو ئەو توێژ و گروپانەدا باشتر گەشونما دەکات کە قۆناغەکانی خێڵەکایەتی و کۆیلەیەتی و ترس و هەژاری و دەربەدەریان تێپەراندوە و هەوای ئازادیان هەڵمژیوە و خوازیاری گۆڕانکاری و ژیانێکی باشترن بۆ تاک و کۆمەڵگا. هزری گۆڕان لای ئەم چین و توێژانە لەئاکامی ئەزمونی چێژکردنی خودی گۆڕانکاریەکانەوە هەڵقوڵاوە و نەعەوداڵی حیزبی سەرکردە و پێشرە و نە رابەر و سەرۆکی موعجیزەکانن، چونکە بە ئەزمون فێربون کە ئازادی تاکی کەس و توانا و بەها بەنرخەکانی دەتوانن گۆڕانکاری ئەنجام بدەن.

دەسەڵات بۆ خۆسەپاندنی زۆرەملێی لەم ناوچانەش درێغی نەکردوە، بەکاریگەری چەمکە ستەم و تۆقێنەرەکان رەفتاریان بەرامبەر دیموکراسیەت و ئازادی و رەوتی گۆڕان کردوە و بڕیاری ناڕەوا و ستەمکاریان داوە.

نانبڕین، گواستنەوەی زۆرەملێ، گرتن و هەڕەشەکردن و تۆقاندن و بریندارکردن و تەنانەت کوشتنی گۆڕانخوازان و هەوادارانی گۆڕان و رۆژنامەگەران و نوسەرانیش ئاوێنەکانی ئەو چەمکانەن کە مێشک و فەزای ژیانی دەسەڵاتدارانیان تەنیوە.

رەفتاری نابەرپرسانەی دەسەڵاتدارانی پارتی     
بەدەر لەلاپەرە تەماویەکان لە مێژوی سەرانی پارتی و ئەو دۆسیانەی راستەوخۆ بەرپرسیاری یەکەم بون لە رودان و ئاکامەکانی و ئەو دۆسیانەی تر کە بەشداریان تێداکردوە و هۆکارێکی شەڕ و ماڵوێرانی بون، وەک چەندین خولی شەڕەکانی ناوخۆ لەسەر ئاستی کوردستانی گەورە، دەکرێت دور لەمانە وتەنیا لەسایەی کاریگەری روداوەکانی چەند هەفتەی رابوردو لە کوردستان ئەو کەمپینە توندوتیژەی راگەیاندنەکانی پارتی بەرپایان کردوە لە ئاکامی ناڕەزایی جەماوەر بەرامبەر بە تیرۆرکردنی جوانەمەرگ سەردەشت عوسمان، هەڵسەنگاندنێکی بابەتیانە بۆ رۆڵی پارتی و سەرکردایەتیەکەی بکەین تا نەکەوینە هەڵەوە وبە تێرامینێکی ئاقڵانە و بە هوشیاریەکی نەتەوەییەوە ئەم قەیرانە تێپەرێنین و رێگەش لە ناحەز و دوژمنانی میللەتەکەمان بگرین ئەم دۆخە بۆ مەرامە شەیتانیەکانی خۆیان بقۆزنەوە.

پرسیاری سەرەکی ئەوەیە ئایا لوتکەی دەسەڵاتی پارتی هیچ ئەڵتەرنەتیڤێکی تری نەبو لەجێی ئەم کامپینە توند و فاناتیکە و زمانی شەڕفرۆشتن و هەڕەشەکردنی دەست برین و لەگۆڕنانی نەیارانی؟ ئەمە زمانی پەیامی بەناو لوتکەی دەسەڵاتی ئەو پارتیە بو کە نزیکەی 70 ساڵە سەرقاڵی کوردایەتیە. قەڵەمحاڵەکانی پارتی هیچ بوار و دەرفەتێکیان نەهێشتۆتەوە تا مرۆڤێکی کوردی کە پارتی نەبێت و دەروێشی دروشمەکانیان نەبێت لەم بەشەی کوردستانی ئێمەدا شوێنێکی رەوای پێ رەواببینن. دیاردەیەکی زۆر ترسناکتر لە سڕینەوەی فیزیکی هەر تاکێکی کورد.

قەیرانی دوای تیرۆرکردنی جوانەمەرگ کاک سەردەشت تەنها کێشەیەکی تاوان و یاسایی ئاسا نیە، تا بە خستنەگەڕی لیژنەیەکی لێکۆڵینەوەی تەمدار و چەند قسەیەکی لابەلای وەزیری ناوخۆ و باڵا دەستەکانی ئاسایش و پاراستن و پۆلیس بتوانرێت چاو و مێشک کراوەکانی ئەم میللەتەی پێ دەستەمۆ بکرێن. ره‌واش نیه‌ بێ به‌ڵگه‌ هیچ که‌س و لایه‌نێک تۆمه‌تباربکرێت، ئەمە ئەو هەویرەیە کە ئاوی زۆر دەکێشێت و وا چاوەڕوان دەکرا جەنابی سەرۆکی هەرێم وەک سەرۆکی پارتی رەفتار و لێدوانی لەمەڕ ئەم قەیرانە نەکردایە و تەواوی بێلایەنی خۆی وەک لە یاسا و سوێندخواردنیدا هاتوە بسەلماندایە.
 
منیش وەک سەدان کەسی تر دەتوانین ئاگری ئەم قەیرانە زیاتر خۆشکەین و ئەوەندە بەئاگاین لەروی زانیاری و دۆکیۆمێنت و بەڵگەنامەی خۆماڵی و بیانی دەیان مەلەفی مێژوی کورد بە خاڵەکانی سەر وشەکانیشەوە بخەینەڕو. بەڵام باوەڕی تەواوم هەیە کە ئەمە خزمەتی دۆزی ئێستای میللەتەکەم ناکات و هەر کەس ولایەنێکیش بەو ئاڕاستەیەدا کاربکات دەیان پرسیار و گومانی لێ قوتدەبێتەوە.

ئەگەرەکانی توندڕەوی و هێرشەکانی پارتی
بۆچی چەمکی میانڕەوی و عەقڵانیەت لەناو پارتیدا لەم قەیرانەدا سەرکەوتو نەبو لە گرێدانەوەی چەمکە جیاواز و ناکۆکانی نێو جەستە و بونی بۆ رەفتارکردنێکی پەسندکراو لەگەڵ دوا روداوەکان؟.
 
هێشتا کاتی وه‌ڵامدانەوەی تەواوی ئەم پرسیارە نەگەییوە و باوەڕی تەواوم هەیە کە پشکی سەرەکی رەوینەوەی ئەو گومانە زۆرەی لەمەڕ تواناکانی بەڕێوەبردنی ئەو بەرپرسیاریەتیە گەورەیەی ئەستۆی پارتی لە ئارادان بە رەفتارکردن و هەڵوێستی دەسەڵاتدارانی پارتیەوە بەستراون و پشکەکەی تریش لەئەستۆی سەرجەم حکومەتی هەرێم و ئوپۆزسیۆن و جەماوەری میللەتەکەماندایە.
 
ئەگەر دەسەڵاتدارانی پارتی لایان وایە بەشەڕفرۆشتن بە گۆڕان دەروازەکانی بەردەم یەکێتی دادەخەن و ناچاری دەکەن ئەمجارەش تەواوکەری پلان و کارەکانی ئەوان بن و ببنە "هاوپەیمانە ستراتیژیەکەی" وەک لەسەر ئەو پارچە کاغەزەی نێوانیاندا واژۆ کراوە، من دڵنیام کە ئەم هێرش و شەڕفرۆشتنە توندەی پارتی بەگۆڕان و هەڵدانەوەی ئەو لاپەرانەی پارتی هەڵیبژاردون بۆ زیندوکردنەوەیان، بەشێکن لە خەبات و مێژوی یەکێتی نیشمانی کوردستان و تەخوینکردنی ئەو رۆژانەی مێژو تەخوینکردنی سەرجەم رێباز و خەباتی هەزاران پێشمەرگە و کادر و سەرکردەی یەکێتیین کە خۆشبەختانە بەشێکی بەرچاو لێیان شەهید نەبون و بەرپرسیاریەتی گەورەیان لە یەکێتی و بزوتنەوەی گۆڕان و چەند لایەنێکی تری کوردیدا هەیە.

ئەگەر لە حساباتی دەقیقی پارتیدا گەیشتبنە ئەو سەرئەنجامەی لە ئاکامی ئەوەی گەورەترین حیزبی کوردستانن کاتی ئەوە هاتوە تەواوی دەسەڵاتی پارتی لە هەرێم و لە بەغدا بچەسپێنن، لاشیان وابێت گۆڕان کۆسپی سەرەکی و سەرسەختە لەبەردەم بەدیهێنانی ئەو خەونەیان، بەتایبەت کە گرێی ناڕەزایی و هەڵچونی شەقام سەرودڵی ئەوانی لە پایتەخت و ناوچەکانی دەسەڵاتیشیانی گرتەوە، بۆیە بە هەڵسەنگاندنی توندڕە و فەناتیکەکانی دەسەڵاتدارانی پارتی بۆ لێدانی بەهێزترین ئەڵقەی کۆسپی بەردەمیان کە گۆڕانە و لەهەمان کاتیشدا بەگەڕخستنی ئەڵقە لاواز و پەرتەوازەکەی حوکمڕانی و سیاسیەت لە کوردستان کە یەکێتی هاوپەیمانیانە گونجاوترین کات و دۆخ لە ئارادیە. بەم هەڵسەنگاندنە و چاوەڕوانیەوە بەیانێکیان بڵاوکردەوە کە لەبۆنی خوێن و ماڵوێرانی و دەستبرین و گۆڕلێنان زیاتری لێناکەیت. ناشێت تا رۆژی حەشر خەڵک بێدەنگی هەڵبژێرێت لەبەرامبەر کار وروداوانەی مەترسین بۆ ئازادی و دیموکراسیەت بەبیانوی ئەوەی با ئەم ئەزمونەمان لەدەست نەدەین. لەهەناو رۆحی ئەم قۆناغەی میللەتەکەماندا تەنیا بە یەکریزی رەوا و ئازادی و دیموکراسیەتی راستەقینە دەتوانین حوکمڕانی خۆمان بپارێزین و گەشەی پێبدەین.

خەیاڵ و فانتازیای پارتی زادەی خاوەنەکانیەتی و بەهیچ پاساو و هزرێک کەسانێکی تری دەرەوەی ئەو بازنەیە پێوەی پابەند نین. دەکرا دەسەڵاتدارانی پارتی لەبری هەڕەشە و دابڕانی خۆی دەرگاکانی دیالۆگی بەکراوەیی بهێشتایەوە. هیچ ساتێک درەنگ نیە کاربکەین تا میانڕەوی و عەقڵانیەت بەسەر خەسڵەت و هزر و خواستە تایبەتیەکانماندا زاڵ بکه‌ین و ئەمەش تەنها رێگەیە بۆ خزمەتکردنی خاک و میللەت.