|
چاوەڕوانی و فرمێسکەکانی ''مریەم''
|
نەوزاد کەریم
لەنێوان بێباکی دەسەڵاتداران و کێشمەکێشی بە حزبی کردنی کەیسەکەیدا..
نۆ ساڵ بەر لەئێستاو لە بەهاری ساڵی ٢٠٠٦ دا ئەو دەمەی کە رقی پەنگخواردوی چەندساڵەی خەلکی هەڵەبجە بەڕوی دەسەڵاتداران دا تەقیەوە و بە سوتاندنی مۆنومێنتەکە کۆتایی هات، لەناخەوە ئازاری دام بۆ لەناوچونی چەندین بەلگەنامەی گرنگ وەک باسکرا، بەڵام وەرچەرخانێکی ئێجگار گەورە لە فیکر و بیرکردنەوەو هەڵوێستمدا رویدا، هەستمکرد کە لەقۆناغی لەقاڵبدانی حیزب و بەچاوی حیزب بینین و بەگوێی حزب بیستن دەربازم بوە، بەدەر لە هەڵڕشتنی درۆی بەرپرسە حیزبیەکان لە کەناڵ و مینبەری هەڵڕشتنی درۆکان و تۆمەتبارکردنی خەڵکە بەشمەینەتەکەی ئەو شارە بە تابوری پێنجەم و هاندانیان و تۆمەتبارکردنیان دەستی دەرەکی و هتد، تێگەیشتم لەوەی لەچەند سەد مەترێک ئەولای مۆنۆمێنتەکەو لەودیو ئەوەوە چی ئەگوزەرێت، لەوە تێگەیشتم کە مۆنومێنتەکە کە ئەوەندەی بۆ نەبیستنی هاوار و ناڵەی بەرکەوتوەکان و شاردنەوەی نەهامەتیەکانی ئەو شارەیە و بۆ رەمزی هەڵەبجەو قوربانیەکانی نیە.
لەو رۆژانەدا زۆر بەجوانی لێوە لەرزەی بەرپرساکانم لەسەر شاشەکان هەست پێدەکرد، کە بۆ شاردنەوەی شکۆی تێکشکاویان لەبەرچاوی ئەو بیانینانەی کە هاتبون، بەپیلان گێڕی خەڵکیان تۆمەتبارئەکرد. ئەوەندەی هەڵەبجەو مەسەلەی هەڵەبجەیان وەک تورەکەی سواڵ بەکارئەهێنا، مەبەستیان لە ساڕێژکردنی برینەکانی ئەو شارە و نەهامەتیەکانی نەبو. بەمەش لەهاوار و نەهامەتیەکانی خەڵکی ئەو شارە تێنەگەیشتن و زەرەیەک ویژدانیان نەجوڵا، هێندەی مەکینەی ئیعلامیان خستە گەڕ بۆ تەخوینکردنی کەسوکاری قوربانیەکان لەخەمی بەدەنگەوە چونی کێشەکانیان نەبون، نەیانهیشت دەنگ و هاواری بریندارەکان و خەڵکە بێلانە و دڵپر لەناسۆرەکە بگاتە ئەمدیوی مۆنۆمێنتەکە، ئەوەی خەمی ئەوان بو سپیکردنەوەی روخساریان بو لە بەرچاوی بیانیەکان و چەواشەکردنیان لەوەی کە چی رویداوە.
لەدوای ٢٧ ساڵ و لە ئێستادا جگە لە بەردەوامی نەهامەتیەکانی خەڵکی ئەو شارە و تلانەوەی بریندارەکان بە ئازارەوە و لە چاوەڕوانی مەرگ دا، دەیان خێزانیش لەچاوەڕوانی گەڕانەوەی منداڵە ونبوەکانیان ساتەکانی ژیانیان بەڕێ دەکەن، کە لە بارێکی سایکۆلۆژی ئیجار سەختدان، لە تازەترین حاڵەتدا مریەم ئەو کچەی وەک منداڵیکی ونبوی ئەو دەمەی هەڵەبجە خۆی ناساندەوە، لە ئێرانەوە گەڕاوەتەوە ئەو شارە، بەڵام ئەوەی چێگای سەرنجە و کە تێبنی ئەکرێت، کە کاربەدەستان و لایەنی پەیوەندیدار چەندە نابەرپرسانە مامەڵە لەگەڵ ئەو کەیسەدا ئەکەن، چەند بێباکانەو بێ گوێدانە فرمێسکاکانی میریەم و چاوەڕوانی و دڵەکوتێی ئەو خێزانانەی کە تەمەنا ئەکەن مریەم یەکێک بیت لەمنداڵە وونبوەوکەی ئەوان رەفتار ئەکەن. ئاخر چی گەورەترە لەچاوەڕوانی ٢٧ ساڵی دەیان خێزان لە دۆزینەوەو سۆراخی منداڵە ونبوەکان دا، بێویژدانینە.
چی تراژیدیاترە لە بەڕێکردنی ٢٧ ساڵ ژیانی ئەو منداڵانە دور لەباوەشی گەرمی دایک و بێبەش لەسۆزی باوکایەتی.
ماوەیەکی زۆرە مریەم بەپێی خۆی و لەئێرانەوە گەڕاوەتە زۆر خەمساردانە مامەڵە لەگەڵ ئەم دۆسیەدا ئەکرێت، وەک سەرۆکی کۆمەڵەی قوربانیانی هەڵەبجە ئەڵێت هیچ لیژنەیەک تاکو ئێستا لەسەر کەیسی مریەم دروست نەکراوە و دکتۆریک وەکو کەسێکی خۆبەخش لەدوای دەوامی ئاسایی خۆی هەستاوە بە بەراورد کردنی سمپلی خوێنەکان، باس لەوەش دەکرێت کە کەیسەکەی مریەم تێکەڵ بە ململانی حیزبی کراوە و دەرون نەخۆشەکان ئەیانەوێت لەسەر فرمێسک و چاوەڕوانی مریەم وزەیەک بەگیانی حیزب و بەرژەوەندیەکانیان دا بهێننەوە.
حکومەتێک و بەرپرسانی هێندە نامەسئول و بێباک بن بەرامبەر بە هاوڵاتیانی خۆی و لەئازارەکانی نەگات و هاوکار نەبێت، هیچ قسەیەکمان نیە بۆ وتن تەنها ئەوە نەبیت کە بڵێین (نەفرەت لەو رۆژەی کە تیایا لە دایک بوین)
|
|
|