(سبه‌ی):
دوێنێ سه‌رۆكی هه‌رێم له چوار فه‌رمانی جیادا بڕیاریدا، به ده‌ستگیركردنی ئه‌و كه‌سانه‌ی كه له دادگاكانی هه‌رێمی كوردستان بڕیاری ده‌ستگیركردنیان بۆ ده‌رچوه، ده‌ستگیرنه‌كردنی هیچ كه‌سێك به‌بێ رێوشوێنی یاسایی، هاوكات گه‌ڕاندنه‌وه‌ی بودجه‌ی ئۆپۆزسیۆن و هه‌ڵوه‌شاندنه‌وه‌ی سزادانی سیاسی چالاكوانانی ئۆپۆزسیۆن و گه‌ڕاندنه‌وه‌ی ماف بۆیان.
سبه‌ی ده‌قی بڕیاره‌كانی سه‌رۆكی هه‌رێم ده‌خاته‌ڕو بۆئه‌وه‌ی خوێنه‌ران سه‌رنج و تێبینی خۆیان بده‌ن له‌وباره‌یه‌وه.
ده‌قی بڕیاره‌كان:
كۆماری عێراق
هه‌رێمی كوردستان
سه‌رۆك
-1-
بڕیاری ژماره (23) ساڵی 2011
پاڵپشت به‌و ده‌سه‌ڵاته‌ی كه پێماندراوه به‌پێی یاسای سه‌رۆكایه‌تی هه‌رێمی كوردستان ـــ عێراق ژماره (1)ی ساڵی 2005ی هه‌مواركراو، بڕیارماندا به:
یه‌كه‌م: ئه‌و كه‌سانه‌ی له دادگاكانی هه‌رێمی كوردستان بڕیاری ده‌ستگیركردنیان بۆ ده‌رچوه، ئه‌وانه‌ی كه بڕیاری سه‌رۆكایه‌تی هه‌رێمی كوردستان ژماره (4) ساڵی 2011 ده‌یانگرێته‌وه له روداوه‌كانی مانگه‌كانی شوبات ـــ ئایار پێویسته راده‌ستی دادگاكان بكرێت.
دوه‌م: هیچ لایه‌نێك یان كه‌سێك بۆی نیه داواكراوێك داڵده بدات، به‌پێچه‌وانه‌وه به‌رپرس ده‌بێت به‌رامبه‌ر یاسا.
سێ یه‌م: پێویسته له‌سه‌ر ئه‌نجومه‌نی وه‌زیران و لایه‌نی په‌یوه‌ندیدار ئه‌م بڕیاره جێبه‌جێ بكات له رۆژی ده‌رچونیه‌وه.
-2-
بڕیاری ژماره (24) ساڵی 2011
پاڵپشت به‌و ده‌سه‌ڵاته‌ی پێماندراوه به‌پێی یاسای سه‌رۆكایه‌تی هه‌رێمی كوردستان ـــ عێراق ژماره (1)ی ساڵی 2005ی هه‌مواركراو، بڕیارماندا به:
نابێ هیچ كه‌سێك له ده‌ره‌وه‌ی رێوشوێنه یاساییه‌كان بگیرێت و ده‌بێ له كاتی لێكۆڵینه‌وه پارێزه‌ری هه‌بێت و كه‌سوكاری ئاگادار بكرێت له گرتنی و ئه‌و كه‌سه‌ش كه تۆمه‌تی یاسایی ده‌درێته پاڵی ده‌بێت له ماوه‌ی (24) كاتژمێر راده‌ستی دادگای تایبه‌تمه‌ند بكرێت بۆ دیاریكردنی چاره‌نوسی.
دوه‌م: ئه‌نجومه‌نی وه‌زیران و ئه‌نجومه‌نی دادوه‌ری راده‌سپێرین بۆ ده‌ركردنی رێنمایه‌كی یاسایی بۆ جێبه‌جێكردنی خاڵی یه‌كه‌م.
سێ یه‌م: پێویسته له‌سه‌ر لایه‌نی په‌یوه‌ندیدار ئه‌م بڕیاره جێبه‌جێ بكات له رۆژی ده‌رچونیه‌وه.
-3-
بڕیار یژماره (25) ساڵی 2011
پاڵپشت به‌و ده‌سه‌ڵاته‌ی كه پێماندراوه به‌پێی یاسای سه‌رۆكایه‌تی هه‌رێمی كوردستان ـــ عێراق ژماره (1)ی ساڵی 2005ی هه‌مواركراو، بڕیارماندا به:
یه‌كه‌م: به‌رده‌وام بون له خه‌رجكردنی سلفه‌ی دارایی حیزبه‌كانی به‌شداربوی په‌رله‌مانی كوردستان ــ عێراق، سلفه داراییه‌كان به‌و شێوه‌یه ده‌بێت كه ئه‌نجومه‌نی وه‌زیرانی هه‌رێمی كوردستان بڕیاری له‌سه‌ردابو.
دوه‌م: پێویسته له‌سه‌ر ئه‌نجومه‌نی وه‌زیرانی هه‌رێمی كوردستان ئه‌م بڕیاره جێبه‌جێ بكات له رۆژی ده‌رچونیه‌وه.
-4-
بڕیاری ژماره (26) ساڵی 2011
پاڵپشت به‌و ده‌سه‌ڵاته‌ی پێماندراوه به‌پێی یاسای سه‌رۆكایه‌تی هه‌رێمی كوردستان ـــ عێراق ژماره (1)ی ساڵی 2005ی هه‌مواركراو، بڕیارماندا به:
یه‌كه‌م: ئه‌نجومه‌نی وه‌زیرانی هه‌رێمی كوردستان راده‌سپێرین به پێكهێنانی لیژنه‌یه‌ك بۆ چاره‌سه‌ركردنی رێكاره نایاسایه كارگێریه‌كان ده‌رباره‌ی سزادراوه سیاسیه‌كانی ئه‌ندامانی ئۆپۆزسیۆن.
دوه‌م: پێویسته لیژنه‌ی ناوبراو كۆتایی به كاره‌كانی بهێنێت له ماوه‌ی سی ((30)) رۆژدا له مێژوی پێكهێنانی.
مه‌سعود بارزانی
سه‌رۆكی هه‌رێمی كوردستان
هه‌ولێر
27/8/2011