|
قاره‌مان نامرن
|
محسن عه‌بدولره‌حمان
هه‌ر ده‌م و چه‌رخه‌كی قاره‌مانێن خۆ هه‌نه؛ هه‌ر قاره‌مانه‌كى ساخله‌تێن وى ژ قاره‌مانه‌ك دى جودا دكه‌ت هه‌نه، لێ نه مه‌رجه قاره‌مان وه‌كو ئه‌م تێدگه‌هین، ڤیابیت شه‌ركه‌ر، سه‌ركرده، سیاسه‌تڤان، وه‌رزشڤان...بیت، به‌لكو هه‌ر كه‌سێ كاره‌كێ سه‌ربشك ژ بۆ به‌رژه‌وه‌ندا گشتى بكه‌ت، گیانه‌كێ خۆ گوریكرنێ لده‌ڤ هه‌بیت، ب وژدان كاربكه‌ت، به‌رامبه‌ر رودانان هه‌لویستان وه‌رگریت...، بۆ ماوه‌كێ درێژ پشتى مرنێ د وژدانا مرۆڤاتى و ملله‌تێ خۆدا زیندى دمینیت، ئه‌ڤان جوره مرۆڤان دشێین ناڤێ قاره‌مان ل سه‌ر دانین.
ل رۆژا دویێ جه‌ژنا ره‌مه‌زانێ كو دگه‌ل بیرهاتنا نه‌هێ یا رودانا 11سیپته‌مبه‌رێ رێككه‌فتى، كه‌نالێ (mob) فیلمه‌كێ بیانى بناڤێ سامورایێ داویێ (The last samurai) نمايشكر، تێدا ئه‌كته‌رێ ئه‌مه‌ریكى توم كروز رۆلێ ئه‌فسه‌ره‌كێ ئه‌مه‌ریكى دگێرا ل ته‌نیشت دوماهیك شه‌ركه‌رێ ژابونى ژ مالباتا ساموراى ئه‌وێن بۆ ماوێ 900 سالان پارێزه‌رییا پادشاهـ و گه‌لێ ژابونى كرى، ناڤه‌رۆكا فیلمى وه‌كو من دیتى و تێگه‌هشتیم، دانه‌نیاسین و به‌رچاڤكرنا قاره‌مانى و هه‌لویست و مرۆڤینى و راستگویا ئه‌فسه‌رێ ئه‌مه‌ریكى و قاره‌مانى و دلسۆزى يا ساموراى بۆ گه‌ل و شاهینشاهێ ژابونێ دیاردكر، دناڤ رودانێن دژوارێن فیلمى دا و د ده‌لیڤه‌كا به‌رته‌نگ و هه‌ستدار و چاره‌نڤیسساز بۆ ساموراى ئه‌وێ یاخیبونا خۆ لبه‌رامبه‌ر ده‌ستهه‌لاتا شاهینشاهى كو لبه‌ره رێككه‌فتنه‌كا نه هه‌ڤسه‌نگ دگه‌ل ئه‌مه‌ریكا موهر بكه‌ت، راگه‌هاندى، كو ڤیابیت هه‌لویسته‌ك وێره‌ك و زیره‌كانه وه‌ربگریت، ئه‌فسه‌رێ ئه‌مه‌ریكى ئه‌وێ پشتى شه‌ره‌كى بویه دیلێ ساموراى؛ نها د گه‌ل دا دوست و هاریكاره ل دوڕیانێ دهێلیت، دا ئه‌و ب خۆ رێكا دروست بۆ خۆ بهه‌لبژێریت، ئه‌وژى ده‌مێ دبێژیتێ (ل شه‌رێ تریمبولى 300 شه‌ركه‌رێن گریكى ب گیانێ خۆ به‌رسینگێ هێرشا له‌شكره‌كێ ب هه‌ژمارێ نێزیك ملیونه‌كێ گرتن، پێشڤه‌چونا وان بۆ داگیركرنا یونانستانێ نه‌تنێ راوه‌ستاندن، به‌لكو پیلانا داگیركرنێ تێكدا و له‌شكرێ فارسى نه‌چاركر پاشڤه بزڤریت، و ده‌ست ژ داگیركرنا یونانستانێ به‌رده‌ت) قاره‌مانێن دو چه‌رخێن ژێك دور، 300 شه‌ركه‌رێن پێش زایینێ و سامورایێ 18 چه‌رخان پشتى زاینێ به‌رچاڤبون.
لڤێره پرس ئه‌ڤه‌یه، مه كوردان قاره‌مان هه‌بونه یان نه‌ء؟ ئه‌گه‌ر بێژین مه نینن، دشیاندایه كه‌سه‌ك ب ده‌هان ناڤێن ژن و مێرێن خودان هه‌لویست و دلسۆزێن گه‌ل و وه‌لاتێ خۆ كو گیان و مالێ خۆ گوریكرینه رێزبكه‌ت، ئه‌رێ پیرێ شه‌هیدان سه‌عیدێ پیران ب چ ژ عومه‌ر موختارى كیمتر بو؛ و ب چ محه‌مه‌د عه‌بده و جه‌مالودیینێ ئه‌فغانى ژ مه‌لایێ كورد سه‌عیدێ نورسى د زانا و روناكبیرتربون، ب چ جه‌میلا جه‌زائیرى ژ له‌یلا قاسم خۆگوریكه‌رتر بو...ئه‌حمه‌دێ خانێ، مه‌لایێ جزیرى، حاجى قادرێ كویی، پیره‌مێرد، خانزادا سۆران، فاتا ره‌ش...
لڤێره نه وه‌كو حوكمه‌ت و حیزب لێ وه‌كو تاكه كه‌س و بیردانكا مللى، ئه‌م چه‌ند بكریار رێزى ل ڤان كه‌سان دگرین، رێزگرتن ژى ئه‌وه ئه‌م چ ژ ژیان و خه‌بات و خۆگوریكرنا وان دزانین و بۆ زارۆكێن خۆ دبێژین، چاوا یادا سه‌ركه‌فتن و شه‌هیدبونا وان... ل بیر دئینین و سه‌رهاتیێن وان ڤه‌دگێرین و زیندى دكه‌ینه‌ڤه، دا د دبیردانكا به‌ره‌بابێ پێگه‌هشتى دا ببنه نمونه‌یێن هه‌ره‌بلند و مێژویه‌ك سه‌رڤراز و بۆ پاشه‌رۆژێ خه‌تیره.
|
|
|
|