|
خوزیكێن هه‌وه
|
محسن عه‌بدولره‌حمان
ل رۆژا 23/8/2012 دا د راپۆركه‌كا كه‌ناڵی (N.R.T) دا خه‌لكه‌كی نه‌رازیبونا خۆ دیاركر كو رێڤه‌به‌ر و هاریكار ل په‌روه‌رده‌یا قه‌زا هه‌له‌بجا شه‌هید ب په‌سه‌ندا حیزبی دهینه دامه‌زراندن، و ئه‌و ئه‌ڤێ ده‌ستویوه‌ردان و مایتێكرنا حیزبی د خواندنگه‌هان دا ره‌تدكه‌ن، ل ڤێره دبێژینه خه‌لكی هه‌له‌بجه‌یا شه‌هید خوزیكێن هه‌وه ژنوی پشتی بیست سالان ئه‌ڤی خلتی ژ هه‌وه گرت.
هه‌مو سیسته‌مێن سیاسی گرنگییه‌ك تایبه‌ت دده‌نه كه‌رتی په‌روه‌ردێ لی ئه‌ڤ گرنگییه ژ سیسته‌مه‌كی بۆ سیسته‌مه‌ك دی جودایه، د سیسته‌مێن دیموكراسی دا ئازادكرنا په‌روه‌ردی بمه‌به‌ستا ئازادكرنا هزرێ یه ژ بۆ پیشكه‌فتنا مرۆڤی كو تاكه كه‌س جڤاكی پێكدئین و كومه‌كا تاكه كه‌سێن ئازاد ئانكو جڤاكه‌ك ئازاد، لێ د سیسته‌مێن شمولی دا گرنگییا په‌روه‌ردی ڤه‌دگریت بۆ گرنگییاجه و رۆلێ كه‌سێن سه‌ر بڤی كه‌رتی ڤه چ مامۆستا یا خوێندكار و هه‌ر جوره كارمه‌نده‌كێ سه‌ر ب وه‌زاره‌تا په‌روه‌ردێ هه‌ی، ئانكو بده‌ستڤه‌ئینان و زالبون ل سه‌ر كارمه‌ندێن كه‌رتێ په‌روه‌ردێ بده‌ستڤه‌ئینانا ئه‌مه‌كداریا رێژه‌یه‌كا هه‌ره مه‌زن و كاریگه‌ره ژ جه‌ماوه‌ری كو كارتێكرنه‌كا تایبه‌ت و راسته‌وخۆ ل جادێ وه‌ك هاولاتی یان وه‌كو ده‌نگده‌ر دكه‌ت، هه‌روه‌سا كه‌رتێ په‌روه‌ردێ ئێك ژ ئامرازێن سه‌ره‌كیێن ئه‌نجامدانا پرۆسا ده‌نگدانێ یه، بۆ نمونه هه‌ر ژ ئێكه‌م هه‌لبژارتنا گشتی ل سالا 1992ێ تانها مامۆستا رۆله‌ك مه‌زن و به‌رچاڤ د هه‌لبژارتنان دا هه‌یه، ژبه‌ر بوشییا ڤی تویژه‌یی و ئاستێ وان یێ زانستی دهێنه ده‌ستیشانكرن وه‌كو هاریكار ل گه‌ل كارمه‌ندێن كوموسیونا بلندا هه‌لبژارتنان چ وه‌كو نڤیسه‌ر یان چاڤدێر ل سه‌ر سندوقان...
هوسا ئه‌و راسته‌وخۆ رۆله‌كێ سه‌ره‌كی د هه‌ر گه‌ڕه‌كا ده‌نگدانێ دا دگێرن، له‌ورا سیسته‌مێن شمولی گرنگییه‌كا هه‌ره مه‌زن دده‌نه كونترۆلكرنا ڤی كه‌رتی و بده‌ستڤه‌ئینانا ئه‌مه‌كداریا مامۆستایان، بۆ ڤێ كونترۆلكرنێ ژی پێدڤی ب چه‌ندین فلته‌رانه، ئێكه‌م پێنگاڤ به‌ره‌ڤ كونترۆلكرنێ برێكا رێكخستنا (ئێكه‌تی – سه‌ندیكا ماموستایان) ده‌ستپێدكه‌ت، كو ژ رێكخسته‌ك پیشه‌یی ژ بۆ خزمه‌تكرنا ماموستایی به‌ره‌ڤ رێكخسته‌ك حزبی ته‌سك دهاژون، ئانكو رێكخستنا ماموستایان ب مه‌به‌ستا هه‌ڤساركرنێ یه بۆ هه‌ر كار و بزاڤ و شیان و داهێنانه‌كێ ژ لایێ ماموستایه‌كێ نه سه‌ر ب حیزبا ده‌ستهه‌لاتدارڤه و ئه‌ڤ كونترۆل و هه‌ڤساركرن ب چه‌ند رێكا دهێته‌كرن، پێش هه‌ر تشته‌كی نابیت مامۆستا هندێ خودان شیان و داهێنه‌ربیت ببیته رێڤه‌به‌ر یان هاریكارێ رێڤه‌به‌رێ خواندنگه‌هێ ئه‌گه‌ر ئه‌مه‌كداریا وی بۆ حیزبێ یا مسوگه‌ر نه‌بیت، هوسا ده‌رگه‌هێ خزمانی و مرۆڤكانێ و واسته‌كاری و به‌رتیل و مه‌لاقیێ... ل پێش كه‌سێن نه ل ئاست و شیانێن رێڤه‌برنێ نه‌بن ل تاق ڤه‌دبن، ئه‌ڤه سه‌ره‌ده‌رییه كارتێكرنه‌كا نێكه‌تیف دكه‌ته سه‌ر برۆسا خواندێ چنكو رێڤه‌به‌ر و ده‌سته‌یا رێڤه‌برنێ برێیا په‌سه‌ندا حزبی هاتینه، له‌ورا سه‌ره‌ده‌ریا شانه‌یا حزبی ل گه‌ل مامۆستایان دكه‌ت و خواندنگه‌هێ ب پاوانێ خۆ دزانن و ده‌ستهه‌لاتا وان یا ره‌هایی یه و هه‌ر پێشنیار یا گازنده ب چ ناچیت، ئه‌و هه‌لبژاتیێن حیزبێ نه و ژبلی حیزبێ كه‌سێ چ ده‌ستهه‌لات ل سه‌ر وان نینه، رێڤه‌به‌ریا سه‌رنه‌كه‌فتی كارتێكرنه‌كا نیكه‌تیف دكه‌ته سه‌ر هه‌مو ئالیێن پرۆسا فێركرنێ و ئێك ژ ئه‌گه‌رێن هه‌ره سه‌ره‌كیێن نزمبونا ئاستێ زانستی یه ل كوردستانێ.
|
|
|
|