|
بهارا ملله‌تان... پاییزا دكتاتورانه
|
محسن عه‌بدولره‌حمان
چریسكا بهارا ئه‌ره‌بى ئه‌گه‌ر ب خۆسۆتنا (بوعوزیزى) یێ تونسى ده‌ستپێكربیت، لێ ژانێن ڤێ بهارێ گه‌له‌ك ڤه‌كێشا و به‌رهه‌ڤى و پێشه‌كى بۆ هه‌بونه، هه‌ر ژ ده‌ستپێكا چه‌رخێ بورى و ژ ئه‌نجامێ جه‌نگا جیهانى یا ئێكێ چه‌ندین ده‌وله‌تێن ئه‌ره‌بى ل سه‌ر كاڤلى ده‌وله‌تا ئوسمانى یا هه‌لوه‌شیاى هاتنه دامه‌زراندن، كو بچویكترین بنه‌مایێن ده‌وله‌تا هه‌ڤچه‌رخ ژ په‌یوه‌ندیێن ئابورى، ره‌وشه‌نبیرى، جڤاكى، شارستانى...
ژ ڤان ده‌وله‌تان دكێمبون، له‌ورا ئه‌ڤ قه‌واره‌یێن پتر ل سه‌ر بنه‌ماییێن هۆزه‌كێ دامه‌زراین بونه دویڤه‌لانكێن ده‌وله‌تێن زلهێزێن رۆژئاڤایی بتایبه‌ت بریتانیا و فره‌نسا بون و كوده‌تا و دیارده‌یێن له‌شكرى سیمایێ سه‌ره‌كى یێن ڤان ده‌وله‌تان بو، هوسا كوده‌تاچیان گه‌له‌ك جاران ل دژى هه‌ڤ كوده‌تا د ناڤ كوده‌تایێ دا دكر، هه‌ڤچه‌په‌ران یه‌كتر سێداره‌دان و د زیندانان دا لژێر ئه‌شكه‌نجه‌یێ ژناڤبرن، بناڤێ نه‌ته‌وه‌خوازیێ ب كرێترین رێك و توندترین شیواز شیوعى ژناڤبرن و شه‌مه‌نده‌فرا مرنێ (قطار الموت) و بزاڤا شه‌وافى ل ئیراقێ دیارترین نمونه‌یێن زیندیێن كومكوژیا شیوعیان بو، هه‌روه‌سا چاره‌نڤیسێ كرۆپین ئیسلامى ژ یێ شیوعیان باشتر نه‌بو، ئه‌وا رژێما حافز ئه‌سه‌دى ل دژى ئیخوانان ل باژێرێ حمایێ كرى ناهیته‌ژبیركرن، كوشتن، به‌رزه‌كرن، تیروركرن، خائینكرن... بۆ هه‌ر كه‌سێ ل دژى ده‌ستهه‌لاتێ؛ ل كاربو، له‌ورا ژبۆ مانێ و درێژه‌پێدانا ژیێ ده‌ستهه‌لاتێ ل سه‌ر ته‌ختێ حوكمرانیێ هه‌ر تشت د خزمه‌تێ دا و ل پێشیێ ژناڤبرنا هه‌ڤڕكان باجا ئه‌ڤێ مانێ بو، هه‌روه‌سا دوژمنێ سه‌ره‌كیێ هه‌ر ده‌وله‌ته‌كێ ژ ڤان ده‌وله‌تان هه‌ڤسویێن برا بون، ژ ترسا وان هه‌ر ده‌وله‌ته‌كێ خۆ چه‌كدارتر دكر، تاكو وه‌لات بویه چه‌بلخانه و حوكمه‌ت ده‌زگایه‌كێ پۆلیسى، له‌ورا حوكمێ تاكه كه‌س، تاكه‌هۆز، تاكه حیزب...
جاران نیڤ چه‌رخى ڤه‌كێشا تاكو سیسته‌مێ كومارى بۆ سیسته‌مێ پاشایه‌تى و بابێ ده‌ستهه‌لاتدار (سه‌رۆك كومار) كوڕ بۆ جهنشینیا خۆ به‌رهه‌ڤكر، مینا حافز ئه‌سه‌د، حوسنى موباره‌ك، سه‌دام...، د ڤى ماوه‌یى دا بهارا واسته‌كارى، مرۆڤكانێ، ئه‌مه‌كداریا ره‌هایی و مه‌لاقیێ بو، سه‌ركرده‌ى ئێك، حیزبا ئێك، ئانكو ل ته‌ڤایا ملله‌تى پاییزه‌كا دومدرێژ و ل ژماره‌كا كێم ژ تاقمێ ده‌ستهه‌لاتێ بهاره‌كا به‌رده‌وامبو، ژ ئه‌نجامێ ڤێ دكتاتوریه‌تێ و شكه‌ستنێن لدویڤ ئێك، ل سه‌ر هه‌مى ئاستان و ل ئێكه‌م هه‌لكه‌فت ملله‌تى داخوازیێن خۆ ده‌رێژكرن و ڕژیانه جادێ و دامهوده‌زگایێن میرى كرنه ئارمانج؛ و ل ئێكه‌م هه‌لبژارتنا ئازاد كرۆپێن ئیسلامى ده‌نگێن ئه‌وان ده‌نگده‌رێن ژ حیزبێن نه‌ته‌وه‌خواز بێهیڤى بوین دروین و كورسیكێن په‌رله‌مانى پڕكرن و ل په‌یسكا ده‌ستهه‌لاتێ بسه‌ركه‌فتن، به‌لێ د ڤى ماوێ درێژ دا ژ ئه‌نجامێ شكه‌ستنا دكتاتوریه‌تا نه‌ته‌وه‌خواز و داكه‌فتن د ئاڤاكرنا جڤاكێ ساخله‌م و ئابوره‌ك بهێز زه‌مینه هاته خوشكرن و جاده هاته به‌رهه‌ڤكرن بۆ هاتنه پێشا كرۆپێن ئیسلامى ل ئێكه‌م ده‌رفه‌ت، بدیتنا من كرۆپێن ئیسلامى دێ ب پیرۆزى سیاسه‌تا خۆ سه‌پینن، له‌ورا زویتر ژ نه‌ته‌وه‌خوازا دێ شكه‌ستنێ ئینن و دێ رێك بۆ لیبرالان هێته خوشكرن، لێ دگه‌ل بهارا ئه‌ره‌بى كو بهارا ملله‌تانه و پاییزا دكتاتورانه، كرۆپێن شیعى ل چه‌ندین ده‌ڤه‌ران (یه‌مه‌ن، به‌حرێن، سعودیێ...) سه‌رهلدانه و ده‌نگێن وان رۆژ ب رۆژ به‌ر ب بلندبونێ نه، له‌ورا لجهێ شه‌رێ ئیسلامى- رۆژئاڤایى ته‌نگژه و هه‌لچون دناڤبه‌را گرۆپێن شیعى- سوننى د بلندبون و زێده‌بونێ دا یه و هه‌ڤڕكى دژوارتره، و ل هه‌ر روب رونه‌كێ، كو ئه‌م كورد دپارستى نابین و بلا چالدێران و سیڤه‌ر و لوزان ژبیر نه‌كه‌ین، چنكو ئه‌و قۆناغا ده‌وله‌تێن ئه‌ره‌بى پشتى جه‌نگا جیهانییا ئێكێ تێدا بورین، پشتى سه‌رهلدانێ ئه‌م كورد یێ تیدا دبورین، ئانكو ل جادا كوردى زڤێرى و نه‌رازیبون ژ سه‌ره‌ده‌ریا پرۆژی نه‌ته‌ویێ كوردى هه‌یه كو دیارترین سه‌خله‌ت و سیمایێن وێ گه‌نده‌لیا كارگێرى و دارایی یه و پتر ژ كریارێ گۆتن و دروشم ل كاره و به‌ره‌ڤ زێده‌بونه و بایێ بهارێ ژ مه نه یێ دوره، ب وێ ئومێدێ كو ئه‌گه‌ر ب سه‌ر مه داهات چ دور چ نێزیك بێ توندوتیژى ده‌ربازببیت.
|
|
|