|
بازنه
|
محسن عه‌بدولره‌حمان
پتریا مه ب داله‌هی و گازنده كۆتنه‌كێ دبێژین و هزار باره دكه‌ین، ئه‌و ژی گه‌نجێن ڤی سه‌رده‌می، د به‌ترانن، سه‌ربه‌رداینه، به‌رپرسیاری لده‌ڤ نینه، رێزێ ل كه‌سێ ناگرن، هه‌ستێ نه‌ته‌وه‌یی ل جه‌م نینه، هزر د پاشه‌رۆژێ دا ناكه‌ن، به‌ره‌بابه‌ك فه‌لیته‌یه داخوازیێن وی ب داوی ناهێن، به‌س دخۆت و ڤه‌دخۆت و دنڤیت، پتریا دایباب و مامۆستا ژێ نه درازینه؛ تاكو مه‌لا و به‌رپرسێن میری و حیزبی ژی مایتێكرنێ د سه‌وروبه‌ری وان دا دكه‌ن، به‌س ئه‌و یا مای بێژن ئه‌گه‌رێ سه‌ره‌كیێ نه‌راگه‌هاندنا ده‌وله‌تا كوردی گه‌نجن.
ل جهێ تنێ گازندان بكه‌ین، ما نه چێتره هه‌ر كه‌سه‌ك ژ مه ئه‌ڤێ پرسێ ژ خۆ بكه‌ت: ئه‌رێ ما ئه‌ڤ گه‌نجێ ئه‌ڤرۆ، نه ئه‌و زارۆیه یێ دوهی لاپه‌ره‌ك سپی و مه ئه‌ڤ هه‌مو تشتێن دبێژین لێ نه‌خشاندینه؟ بلا هه‌ر زارۆیه‌ك خه‌به‌ربێژ بهێته سزادان، بمه‌رجێ دایباب نه د خه‌به‌ربێژ بن، هه‌ر زارۆیه‌ك جگارێ بكێشیت، بهێته فه‌له‌قه‌دان، ب مه‌رجێ باب جگاره و نه‌رگیل كێش نه‌بیت، هه‌ر زارۆیه‌ك ژ خاندنگه‌هێ بره‌ڤیت یان د خواندنێ دا بڤه‌مینیت، بهێته زڕبه‌رهركرن ژ خه‌رجیێ، بمه‌رجێ دایباب دویڤچونێ بكه‌ن و ب ئه‌ركێ خۆ رابن، بلا هه‌ر كوڕ و كچه‌ك ئه‌ڤیندارببن، د مال دا بهێنه زیندانكرن، به‌س دایباب ب په‌رۆشی به‌حسێ ئه‌ڤینا مه‌م و زینێ، خه‌ج و سیابه‌ندی و... نه‌كه‌ن، ئه‌رێ زارۆ ژ كێ و ل كیڤه و گه‌نكی و بۆچی...
فێری دره‌و، خاپاندن، دزی، ئه‌زماندرێژی... دبیت؟ دایباب و جڤاكی مافێ ل سه‌ر زارۆكی هه‌ی، به‌س مافێ زارۆكی ل سه‌ر كێیه.. ژبلی بكارئینانا ده‌سته‌واژه‌یا مافێ زارۆكی بۆ مه‌به‌ستێن ریكلام و پرۆپاكندێ ژ لایێ سه‌نته‌ر و رێكخراو... زارۆكی چ ماف هه‌یه؟ ما نه هه‌مو زانین و ره‌وشتێن زارۆكان ژ مه‌زنان د وه‌رگرتینه (مكتسبه)، مه‌زنان دبینن و چاڤ ل ره‌فتارێن وان دكه‌ن، چ باش و چ خراب.
كه‌ڤچكه‌كێ هێڤێنێ خراب، مه‌نجه‌له‌كا شیری خراب دكه‌ت، بدیتنا من نه‌رێكخستنا خێزانێ ئه‌و كه‌ڤچكێ هێڤێنێ خرابه.
ئه‌رێ ئه‌و دایبابێن ده‌ه زارۆك هه‌بن، ئه‌گه‌ر بارێ وان یێ ئابوری ده‌لیڤێ بده‌ت هه‌مو پێدڤیێن وان زارۆیان ب باشترین شێوه به‌رده‌ست بكه‌ن، چ ده‌م بۆ هه‌ر زارۆیه‌كی هه‌یه كو ژ لایێ ده‌رونی و دلینی ڤه حه‌زێن وان تێر بكه‌ن، و ئه‌و دایكا هێژا یا ده زكێن زارۆكان ببن، ئه‌رێ ئه‌گه‌ر ماكینه بیت، ئه‌گه‌ر ژ كارنه‌كه‌ڤیت، دێ پێدڤی ب سه‌خبێریێ و ڤه‌ژاندن و نوژه‌نكرنا شیایان بیته‌ڤه، و یا گرنگ دێ چ ده‌م بۆ مێری هه‌بیت ئه‌وێ مێرێ پتریا جاران دێ چاڤ لده‌ر بیت و زه‌لامی هه‌ر ده‌مێ چه‌ند دولاره‌ك ب ده‌ست بكه‌ڤن، ئێدی ژنێ و زارۆیان پشتگوه دهێلیت، ئه‌و ژنا پاشی و د گه‌ل بورینا ده‌مێ ئه‌گه‌ر هات و توشی هه‌ر شاشی یان هه‌لنگڤتنه‌كێ بو ب ساناهی و شه‌رمزاری دهێته كوشتن، بدیتنا من نه‌رێكخستنا خێزانێ ئه‌گه‌ره‌كێ سه‌ره‌كیێ بلندبونا رێژه‌یا به‌ردانێ یه، هه‌روه‌سا بلندبونا رێژه‌یا ڤارێبونا زارۆیان و ڤه‌قه‌تیانا وان ژ خواندنێ یه... ئه‌و زارۆیێن پشتی چه‌ند ساله‌كێن كێم دێ بنه گه‌نج و دێ هه‌مان بابه‌ت د بازنه‌كێ دا دوباره بیته‌ڤه.
|
|
|
|