|
گرێیا زمانێ گه‌نگی دێ ڤه‌بیت!؟
|
محسن عه‌بدولره‌حمان
باكورێ كوردستانێ ب حوكمێ كو مه‌زنترین پارچه‌یا وه‌لاتێ مه‌یێ دابه‌شكریه و پتر ژ نیڤا گه‌لێ كورد لێ دژین و بیاڤه‌ك گرنگ و هه‌ستدار د بزاڤا رزگاریخوازا كوردی دا ڤه‌گرتییه، هه‌روه‌سا ب سه‌روكانییا بزاڤ و هزر و ره‌وشه‌نبیرییا نه‌ته‌وه‌یی یا كوردی دهێته نیاسین، نها د گاودان و قۆناغه‌كه‌ك تایبه‌ت لژێر فشارێن شوفینیزمادا دژیت، ئه‌و ژی بو پتر ژ (60) رۆژانه ب ده‌هان هزار كه‌س و بتایبه‌تی زیندانی و په‌رله‌مانتار كو مانگرتن ژ خوارنێ كرینه، ئه‌ڤ خه‌بات و به‌رخودانا سڤیل و ئاشتییانه بۆ بده‌ستڤه‌ئینانا و دانپێدانێ یه ب مافێن نه‌ته‌وه‌یی یێن گه‌لێ كورد كو فشاره‌كا زێده ل سه‌ر حوكمه‌تا تركی كرییه، ب مانگرتن و خۆپێشاندانان رۆژ ب رۆژ ئه‌ڤ فشار پتردبن و پشته‌ڤانیێ زێده‌تر بده‌ستڤه‌دئینن، ئه‌ڤ مانگرتنا ژ سنورێن ده‌وله‌تا تركی ده‌ربازبویه جیهانه‌ك دیموكرسی و به‌رفره‌هتر و قه‌باره‌ك مه‌زنتر ژ دۆزه‌ك ناڤخۆیی وه‌رگرتیه.
مخابن تا خه‌لكێ بیانی پشته‌ڤانییا مانگرتیێن كورد دكه‌ن، لێ تا نها ل دهوكێ ژبلی هنده‌ك هه‌لویستێن كه‌سوكی ره‌وش یا بێده‌نگه، تاكو د شیان دایه بێژین پتریا جادێ هه‌ر ئاگه‌ه ژێ نینه، ئه‌ڤ هه‌می رێكخراوێن بناڤێ جڤاكی مه‌ده‌نی و سه‌نته‌رێن ره‌وشه‌نبیری و ئێكه‌تی و سه‌ندیگایێن پێشه‌یی بتایبه‌ت هونه‌رمه‌ند و نڤیسه‌ر و رۆژنامه‌ڤان د كۆره و كه‌ڕن! ئه‌ڤ كێشه‌یا چاره‌نڤیسساز د بارێ هه‌ڤبه‌ركرنێ دا ل گه‌ل هنده‌ك رودانێن دی یێن لاوه‌كی كو ئه‌ڤان رێكخستنان په‌یاننامه‌یێن رسواكرن و پشته‌ڤانیێ بۆ ده‌رئێخستییه، بڤێ ره‌فتار و سه‌ره‌ده‌ریا نه به‌رپرسیارانه ئه‌م ل دهوكێ عه‌شیره‌تگه‌ری و ناوچه‌گه‌ری و حزبایه‌تی و...
هه‌ر تشته‌كێ دی ژبلی نه‌ته‌وایه‌تیێ ب كریار په‌یره‌و و دوپاتدكه‌ین.
لڤێره پتر په‌یڤین ل سه‌ر ئه‌ڤ ته‌خا خۆ ب بژاره و روناكبیر و پێشه‌نگێن ملله‌تێ كورد دده‌ن نیاسین، ئه‌وژی تویژا نڤیسه‌ر و هونه‌رمه‌ند و رۆژنامه‌ڤانانن!
لێ هنده‌ك كه‌س هه‌نه به‌ربرسیارییا وان مه‌زنتره، چنكو هه‌ڤتیانه و بشێوه‌كێ راسته‌وخۆ ل گه‌ل خه‌لكی د ئاخڤن و په‌یامێ ئاراسته دكه‌ن، ئه‌وژی رۆلێ گرنگی و كاریگه‌رێ وتاربێژان (خگبا‌و) ئه‌و سه‌یدایێن رێزدار د جڤاكی كوردی دا تا نها ده‌نگێ وان ژ ده‌نگێ سیاسه‌تڤان و ره‌وشه‌نبیریێن نیمچه خوێنده‌ڤان بلندتره، ده‌مێ دبێژن (انصر اخاك ظالما او مظلوما) پشته‌ڤانییا برایێ خۆ بكه، زۆردار یان زۆری لێكری بیت! لدویڤ ڤێ گۆتنێ ئه‌گه‌ر هون به‌ره‌ڤانیێ ژ برایێن خۆ ژ خوین و زمانی و ئاخێ نه‌كه‌ن، هه‌ر بكێمی ڤێ گۆتنێ بجه ببینن و ده‌ست ژ برایێن خۆیێن داگیركه‌ر ب سه‌ركێشیا حیزبا داد و كه‌شه‌پێدانا ئیسلامی نه‌به‌رده‌ن و ژ زۆرداریكرنێ ب پارێزن، ئه‌وێن ب داگیركرنا كوردستانێ و قه‌ده‌غه‌كرنا زمانێ كوردی زۆرداریێ ل مرۆڤی و ئاخێ دكه‌ن.
ئه‌ڤه ل ده‌مه‌كی كو ب هزاران كورد روبروی مرنێ نه، هون یێن به‌رێز د داخازكرینه كو ژبلی نه‌ته‌وه‌یێ ب رولێ خۆ یێ دینی و مرۆڤینی رابن و چاوا ل سالێن بوری ب مه‌ردانه هه‌وه ده‌ستێن خۆ بلند دكرن و بگه‌رمی لاڤه و دوعا ب سه‌ركه‌فتنێ بۆ موجاهدێن پوسنه و شیشان و باشورێ ڤلپین و... دكرن و ئه‌ڤه ب ئه‌ركه‌كێ دینی ددیت، ڤیانا وه‌لاتی ژی ژ باوه‌ریێ یه و ئه‌ڤه ژی ئه‌ركه‌كێ دینی یه، ئه‌ڤه چه‌ندین ئه‌ینی ب سه‌ر مانگرتنا كوردێن باكوری ڤه بورین و هون دبێده‌نگن! ئه‌رێ به‌رهۆشه هون یێن دبێژن و فه‌رمانێ دده‌ن كو په‌یڤا راستیێ ل به‌رانبه‌ر هه‌ر كه‌سی بهێته گۆتن (افضل الجهاد كلمه حق عند سلطان جائر) وه‌كو رۆژنامه‌ڤان و هونه‌رمه‌ند و نڤیسه‌ران و هه‌ر رێكخستنه‌كا دی چاڤه‌ریێ ئیعازه‌كێنه دا گرێیا ئه‌زمانێن هه‌وه ڤه‌ببیت و گوتارا ئه‌ینییا داهاتی بۆ پشته‌ڤانییا مانگرتییان یا ته‌رخانكری بیت!؟
|
|
|