محسن عه‌بدولره‌حمان

هەر ژ سەرهلدانا بهارا 1991ێ تا شەرێ رزگاركرنا ئیراقێ هێزێن سیاسیێن كوردی داكوكیێ لسەر كوردستانیەتا دەڤەرێن ماین لژێر دەستهەلاتا حوكمەتا بەغدا و پشكەك مەزن ژ گوتارا كوردی لدور ڤان دەڤەران بویە، كو لژێر فشارێن بێ راوەستیانێن دژوارێن ئەرەبكرنا رژێما بەعس دنالین، پشتی 2003ێ ب ژناڤچونا رژێما بەعس و پەیدابونا بار و سەقایەك نو، قوناغەك نو دەستپێكر كو گەهێن دەولەتێ ژبەرئێكچوی بون، ب هەلاتنا ئەلندا ئازادیێ خەلكێ ڤان دەڤەران ئومێدەكا مەزن هەبو بتایبەت پشتی دانان دەستورێ یەك ژ ماددەیێن سەرەكی تێدا هاتی ماددێ (140) لەورا مللەتی ب گەشبینی چاڤەرێی ئاسایكرنا باری دكر، ب قەرەبوكرنا هەر دو لایەنان چ ئەرەبێن هاوردە كو ڤەگەرن جهێن ژێ هاتین یان كوردێن ب سالان دەربدەركری، د ڤی ماوەی دا دەڤەرێن ڤەقەتیای بونە دەڤەرێن رزگاركری، لژنەك ژ پەرلەمانێ ئیراقی تایبەت ب ماددێ 140 ڤە هاتە پێكئینان، جیكێن قەرەبوكرنێ هاتنە بەلاڤكرن و بەردەوامە، لێ بكریارو لسەر ئەردی ئەرەبكرن یا بەردەوامەو گوتارا ئەرەبی د ڤی بواری دا توندترە و ئەو كوردێن ل وان دەڤەران ژ هەر دەمەكێ بوری پتر لژێر فشارو گڤاشتنێن گرۆپێن توندرەو شوفینی نە، كو هەر ژ پشتی 2003ێ بهزاران خێزانێن كورد نەچاربوینە بەرەڤ هەرێمێ هەلبهێن، یا بالكێش د ڤێ هەڤكێشێ دا گوتارا شەرمینوكا كوردییە ل بەرامبەر كوتارا دژ ئەوا هێزێن پێشمەرگەی ب میلیشیا ناڤدكەت و هەر هەبونەكا هێزێن كوردی و ئەگەر د چارچوڤێ هێزێن ئیراقی ژی دابیت، ب هێزەك داگیركەر و نا شەرعی دناسیت.

د ڤێ قوناغێ دا پرس ئەڤەیە ئەرێ (اسكندرونە المغتصبه‌، جولان المحتلە، اهواز، سبتەو ملیلە...) د راگەهاندن و پەیرەوێ خویندنێ و د ئەقلێ ئەرەبی دا دەڤەرێن ئەرەبی یێن داگێركرینە، لێ گەنگی ل كوردستانێ دێ پەیام ل ئاست بیتو وێرەكیێ دەینە خۆو بدەنگەكێ بلند ل جهێ دەڤەرێن (ڤەقەتیای، رزگاركری، كێشەدار) بێی ترسو شەرم بێژین دەڤەرێن داگێركری.