|
نیازپاكی... خوزیكه‌ك دورده‌سته
|
محسن عه‌بدولره‌حمان
د رۆژنامه‌یا ئه‌ڤرۆ یا ژماره 1143 ل رۆژا 17\3\2013 د گوشه‌یا (گڤانده)دا كو هه‌مو ئێكشه‌مبیان نڤێسه‌رێ هێژا (محه‌مه‌د چه‌لكی) دنڤیسیت، ڤێ جارێ ژی بناڤێ (نیازپاكی) گڤانده‌ك دی به‌زاندییه، ب ئاماژه‌كرنێ لدور رۆلێ لاوازێ رێكخراوێن جڤاكی مه‌ده‌نی و پێكئینانا لیژنه‌یان بو هه‌ر بابه‌ت و ئاریشه‌كێ و هه‌لبه‌ت ئه‌وان لیژنه‌یان پێدڤی ب ده‌مێ و بودجه‌كێ بو كومبونان هه‌یه، كاك محه‌مه‌دی ده‌ستێ خۆ دانایه سه‌ر برینه‌كێ ژ له‌شه‌كێ خوینه‌لو، لێ پرسه‌ك خۆ د سه‌پینیت ئه‌رێ رێكخراوێن جڤاكی مه‌ده‌نی و مافێ مرۆڤی ژبلی تێكدان و پێشێلكرنا مافێ مرۆڤی و زێده‌گاڤی ل سه‌ر مافێ ژیانێ و ژینگه‌هێ و گیانه‌وه‌رێن كویڤی تاكو ماسییان د روبار و گۆمێن كوردستانێ دا چكرییه.
سه‌نته‌رێن ره‌وشه‌نبیری ژبلی مژویلكرنا گه‌نجان و ڤێركرنا مه‌لاقی و دوریاتیێ چ ره‌وشه‌نبیرییه‌ك به‌لاڤكرییه؟ و دیموكراسیێ بلا هه‌ر به‌حسنه‌كه‌ین ئه‌ڤه سه‌نته‌ر و رێكخراو و سه‌ندیگایێن پیشه‌یی یێن هه‌لبژارتنێن دیموكراسی دكه‌ن و به‌رپرس و ده‌سته‌یێن رێڤه‌به‌ر د بیست سالان دا هه‌ر ئه‌ون رویێن كه‌ڤنن و ناهێنه گوهۆرینو ئه‌گه‌ر هاتنه گوهارتن ژی مینا به‌ركێن شترنجێ گۆهورین ژ چارگۆشه‌كێ بۆ چارگۆشه‌كا دییه، ژبلی توندره‌وییا عه‌شیره‌تگه‌ری و حزباتییا ته‌سك، چ به‌رهه‌مئینایه؟ كارێ وان ئه‌ڤه چنكو ئارمانجا وان وه‌رگرتنا كرێ و به‌خشیه‌ك هه‌یڤانه‌یه ژ حوكمه‌تێ ژبلی هێڤه و وێڤه بۆ برۆژه و كارێن نیمچه وه‌همی و پسۆله‌یێن خه‌رجكرن و مه‌زاختی پێشوه‌خت د داگرتنی و واژوكرینه.. و ویستگه‌ها لێ دراوه‌ستین و چ جار ژی ده‌رباز نابین، كی به‌رپرسێ راسته‌قینه‌یه ژڤێ دیاردا؟ كاك محه‌مه‌د ...ده‌مێ كه‌سه‌كێ پاله‌بیت و به‌رامبه‌ر رۆژانه‌یا وه‌رگرتی كار نه‌كربیت، رۆژا د دویڤدا خۆدانێ كاری؛ كار پێناكه‌ت؟ لێ هنده‌ك ئه‌ڤه پشتی سه‌رهلدانێ بناڤێ رۆژنامه‌ڤانیێ و ره‌وشه‌نبیریێ، ئه‌ده‌بیات و نڤێسه‌ریێ، مافێ مرۆڤی... به‌س دخۆن و رۆژه‌كێ حه‌ق و حیساب دگه‌ل نه‌هاتیه‌كرن و لایه‌نێ پاره‌ده‌ر نه‌تنێ ژێ ناپرسیت، به‌لكو پشته‌ڤانیێ لێ دكه‌ت؟ تو بێژی بۆچی؟ به‌رسڤ گه‌له‌ك یا بساناهییه، تنێ ل هه‌لكه‌فتان به‌یاننامه‌یێن په‌سه‌ندكرن و رسواكرنێ بۆ و دژی هه‌ر كه‌س و لایه‌نی لدویڤ داخوازێ ده‌دئێخن، هوسا پتریا كه‌سێن خراب دهێنه پێش و یێن باش دهێنه داپۆشین و پشتگۆه ئێخستن، له‌ورا نیازپاك یان بانگه‌وازیا زه‌ره‌ده‌شتی نورانی (گوتنا پاك، نیازپاك، كارێ پاك) ژ كیڤه بینین و مه كه‌لتورێ خۆ و یێ خه‌لكه‌كێ سه‌ركه‌فتی هێلایه و بدویڤ خه‌لكه‌كی چ وچ ژخۆنه‌گرتی كه‌فتینه.
نه‌تنێ د سیسته‌مێن ده‌وله‌ت و حوكمرانیێ دا، به‌لكو د رێڤه‌برنا د گۆندی و مالباتێ دا دو تشت ستونێن سه‌ره‌كی ژبلی رێڤه‌برنێ هه‌نه، ئه‌و ژی سزا و خه‌لات؛ سزا ب مه‌به‌ستا پاشڤه‌برنێ و خه‌لات ب مه‌به‌ستا هاندانێ، مخابن د سیسته‌مێ مه دا نه‌تنێ خه‌لاتێ بێ سزادان هه‌یه، به‌لكو چه‌ند خرابكارتره ب چێتره دهێته خه‌لاتكرن.
|
|
|